តំណាង UN ដាស់តឿនមេដឹកនាំពិភពលោកឲ្យពិចារណាលើសាលដីការសាលាក្តីខ្មែរក្រហម
បន្ទាប់ពីការប្រកាសសាលក្រមរបស់ចៅក្រមតុលាការកំពូល លោកគង់ ស្រីម ប្រកាសសាលក្រមស្ថាពរនៅក្នុងសំណុំរឿង ០០២វគ្គ១ ដោយដាក់ឲ្យ ខៀវ សំផន នួន ជា ជាប់ពន្ធនាគារអស់មួយជីវិត តំណាងសហប្រធានក្រុមការងារច្បាប់ និងដំណើរការកាត់ទោសមេដឹកនាំជាន់ខ្ពស់នៃរបបកម្ពុជាប្រជាធិបតេយ្យទាំងភាគីជាតិនិងភាគីអង្គការសហប្រជាជាតិបានចាត់ទុកថា ការប្រកាសសាលដីការស្ថាពរនៅពេលនេះជាជោគជ័យប្រវត្តិសាស្ត្រមួយ។
ចុះផ្សាយនៅថ្ងៃ៖
ស្តាប់ - ០១:៤០
រដ្ឋលេខាធិការទីស្តីការគណៈរដ្ឋមន្ត្រីលោក កែវ រ៉េមី តំណាងឲ្យលោកឧបនាយករដ្ឋមន្ត្រី សុខ អាន ដែលជាតំណាងក្រុមការងារច្បាប់ និងដំណើរការកាត់ទោសមេដឹកនាំជាន់ខ្ពស់នៃរបបខ្មែរក្រហមពីភាគីជាតិ បានអានសារលោក សុខ អាន នៅចំពោះមុខអ្នកកាសែតថា វាជាថ្ងៃប្រវតិសាស្ត្រសម្រាប់ប្រទេសកម្ពុជា និងសម្រាប់មនុស្សជាតិទាំងមូល។
លោក សុខ អាន តាមរយៈលោកកែវ រ៉េមី បានបញ្ជាក់ប្រាប់អ្នករស់រានមានជីវិតពីរបបកម្ពុជាប្រជាធិបតេយ្យ និងសង្ឃឹមថា ការជំនុំជម្រះក្តី និងការចេញសាលដីការស្ថាពរនៅពេលនេះ ពិតជាអាចរំលែកបាននូវការឈឺចាប់ និងទុក្ខវេទនារបស់ប្រជាពលរដ្ឋដែលរងគ្រោះដោយរបបនោះជាពុំខាន។
ជាមួយគ្នានេះលោក David Schefferតំណាងក្រុមការងារច្បាប់និងដំណើរការកាត់ទោសមេដឹកនាំជាន់ខ្ពស់នៃរបបខ្មែរក្រហមពីភាគីអង្គការសហប្រជាជាតិ បានលើកឡើងដែរថា អង្គការសហប្រជាជាតិបានជួយដល់សាលាក្តីខ្មែរក្រហមយ៉ាងច្រើន ទាំងធនធានមនុស្ស បច្ចេកទេសច្បាប់ និងថវិការ ដែលទាំងអស់នេះបាននាំមកនូវលទ្ធផលដ៏គួរឲ្យពេញចិត្តនៅថ្ងៃនេះ។
តំណាងអង្គការសហប្រជាជាតិរូបនេះ បញ្ជាក់ថាសាលដីការស្ថាពររបស់តុលាការកំពូលនៅ ថ្ងៃនេះ គឺជាសារមួយប្រាប់ដល់មេដឹកនាំពិភពលោកដទៃទៀត គួរតែពិនិត្យឡើងវិញនៅ ពេលដែលខ្លួនចង់ប្រព្រឹត្តិនូវឧក្រិដ្ឋកម្មនានានោះ។ លោកថា នេះគឺជាសារមួយដែរសំដៅទៅលើមេដឹកនាំបច្ចុប្បន្ន ដូចជាមេដឹកនាំនៅហ្វីលីពីន នៅស៊ូដង់ ឬស៊ូដង់ខាងត្បូង។ល។ ជាមួយគ្នានេះលោក Scheffer រំលឹកដល់មេដឹកនាំប្រទេសកូរ៉េខាងជើងដែរ ថាគួរតែមានការចាប់អារម្មណ៍អ្វីដែលកើតមាននៅសាលាក្តីខ្មែរក្រហមនៅថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ