កម្ពុជាអនុម័តសេចក្តីព្រាងកម្មវិធីវិនិយោគសាធារណៈ៣ឆ្នាំរំកិលដែលមានតម្លៃ៥២៣៤លានដុល្លារអាមេរិក
រដ្ឋាភិបាលកម្ពុជា កាលពីថ្ងៃទី៨កក្កដាបានអនុម័តរួចហើយនូវសេចក្តីព្រាងកម្មវិធីវិនិយោគសាធារណៈ (ក.វ.ស) ៣ឆ្នាំរំកិល (២០១៧-២០១៩) ដែលមានតម្លៃ៥២៣៤លានដុល្លារអាមេរិកលើគម្រោងជាង៥១៩។ សេចក្តីព្រាងកម្មវិធីវិនិយោគសាធារណៈ ៣ឆ្នាំរំកិល (២០១៧-២០១៩) គឺដើម្បីធានាកំណើនសេដ្ឋកិច្ចក្នុងរង្វង់៧% ក្នុងមួយឆ្នាំ និងទិសដៅអាទិភាពនានាដែលគាំទ្រប្រជាជនក្រីក្រ ជាពិសេសតំបន់ជនបទ។
ចុះផ្សាយនៅថ្ងៃ៖
ស្តាប់ - ០២:៣៦
សេចក្តីព្រាងកម្មវិធីវិនិយោគសាធារណៈ (ក.វ.ស) ៣ឆ្នាំរំកិល (២០១៧-២០១៩) ដែលមានតម្លៃ ៥២៣៤ លានដុល្លារអាមេរិក ត្រូវបានអនុម័តដោយទីស្តីការគណៈរដ្ឋមន្រ្តី កាលពីថ្ងៃទី៨កក្កដា ដោយមានការចូលរួមពីលោកនាយករដ្ឋមន្រ្តី ហ៊ុន សែន ផង។
តាមរយៈសេចក្តីព្រាងច្បាប់ ស្តីពី កម្មវិធីវិនិយោគសាធារណៈ (ក.វ.ស) ៣ឆ្នាំរំកិល (ឆ្នាំ២០១៧-២០១៩) ដែលត្រូវបានរៀបចំឡើងដោយក្រសួងផែនការនេះ បានបង្ហាញថា ក្នុងចំណោមគម្រោងសរុប៥១៩គម្រោង មានចំនួន១៤៩គម្រោង ជាគម្រោងកំពុងដំណើរការដែលត្រូវការថវិកាចំនួន ២៥៩៥ លានដុល្លារអាមេរិក និង៣៧០គម្រោងទៀត ជាគម្រោងសម្រាប់អនុវត្តផែនការអភិវឌ្ឍជាតិ (ផ.យ.អ.ជ) ២០១៤-២០១៨ ដែលត្រូវការទុនសរុប ចំនួន ២៦៣៩ លានដុល្លារអាមេរិក។ នេះបើយោងតាមសេចក្តីប្រកាសព័ត៌មានរបស់ទីស្តីការគណៈរដ្ឋមន្រ្តី។
ជាសរុប បរិមាណទុនតាមឆ្នាំនីមួយៗគឺ ឆ្នាំ២០១៧ មានចំនួន ១៧៤៦ លានដុល្លារអាមេរិក, ឆ្នាំ២០១៨ ចំនួន១៧៤៤ លានដុល្លារអាមេរិក និងឆ្នាំ២០១៩ ចំនួន ១៧៤៤ លានដុល្លារអាមេរិក។
សេចក្តីប្រកាស បង្ហាញថា បរិមាណទុនសរុបទាំង ៥២៣៤ លានដុល្លារអាមេរិកនេះ រួមបញ្ចូលនូវបរិមាណទុនដែលបានសន្យាផ្តល់ដោយរាជរដ្ឋាភិបាលកម្ពុជា និងដៃគូអភិវឌ្ឍមានចំនួន ២៨២៦,៤ លានដុល្លារអាមេរិក (ក្នុងនោះពីរាជរដ្ឋាភិបាលកម្ពុជាចំនួន៥២៧,១លានដុល្លារអាមេរិក និងពីដៃគូអភិវឌ្ឍចំនួន ២២៩៩,៣ លានដុល្លារអាមេរិក)។
សូមបញ្ជាក់ថា ការអនុម័តសេចក្តីព្រាងច្បាប់ស្តីពីកម្មវិធីវិនិយោគសាធារណៈនេះ គឺដើម្បីធានាការសម្រេចឲ្យបាននូវកំណើនសេដ្ឋកិច្ច (ផ.ស.ស.) ក្នុងរង្វង់៧% ក្នុងមួយឆ្នាំ និងទិសដៅអាទិភាពនានាដែលគាំទ្រដល់ប្រជាជនក្រីក្រ ជាពិសេសតំបន់ជនបទ ដូចជា ការអភិវឌ្ឍកសិកម្ម និងជនបទ តាមរយៈការលើកកម្ពស់ផលិតភាព និងពិពិធកម្មកសិកម្ម ដូចដែលបានកំណត់នៅក្នុងយុទ្ធសាស្ត្រចតុកោណដំណាក់កាលទី៣ និងផែនការអភិវឌ្ឍជាតិ (ផ.យ.អ.ជ) ២០១៤-២០១៨។
គួរជម្រាបជូនថា កម្ពុជា ទើបតែត្រូវបានធនាគារពិភពលោកបានធ្វើការកែតម្រូវជាផ្លូវការដោយបានចាត់ឋានៈសេដ្ឋកិច្ចពីក្រុមប្រទេសមានប្រាក់ចំណូលទាបទៅជាប្រទេសមានប្រាក់ចំណូលកណ្ដាលទាបដែលជាមធ្យមនៃចំណូលក្នុងមនុស្សម្នាក់ៗចំនួន ១២២៥ ដុល្លារអាមេរិកក្នុងមួយឆ្នាំ និងស្របពេលដែលអត្រាក្រីក្រនៃប្រទេសនេះ ត្រូវបានកាត់បន្ថយពី៥៣%នៅឆ្នាំ២០០៤ មកនៅត្រឹម ១៤% នៅឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ