ការផ្តល់ដីសម្បទានសេដ្ឋកិច្ច នៅតែជាមូលហេតុនៃវិវាទដីធ្លីនៅកម្ពុជា
មជ្ឈមណ្ឌលស្រាវជ្រាវ តស៊ូមតិ និងទំនាក់ទំនង (RACC) នៃវេទិកាអង្គការមិនមែនរដ្ឋាភិបាល ស្តីពី កម្ពុជា បានចេញផ្សាយរបាយការណ៍វិភាគមួយ នៅថ្ងៃទី ២៨មិថុនានេះ ស្តីពី សម្បទានដីសេដ្ឋកិច្ចនៅកម្ពុជា។ នៅក្នុងរបាយការណ៍នេះ គេបានរកឃើញថា ចាប់តាំងពីឆ្នាំ១៩៩៥ ដល់ឆ្នាំ២០១៥មក កម្ពុជាបានផ្តល់ដីសម្បទានសេដ្ឋកិច្ចប្រមាណជិត២លានហិចតា ទៅឲ្យក្រុមហ៊ុនចំនួន២៦៧ ដើម្បីអភិវឌ្ឍដំណាំកសិឧស្សាហកម្ម ហើយថា ការផ្តល់ដីសម្បទានសេដ្ឋកិច្ចនេះ នៅតែជាមូលហេតុនៃវិវាទដីធ្លីនៅកម្ពុជា។ ប៉ុន្តែភ្លាមៗនេះ តំណាងរដ្ឋាភិបាលបានច្រានចោល និងថា ជារបាយការណ៍ចាស់ មិនឆ្លុះបញ្ចាំងស្ថាន ការណ៍ពិត។
ចុះផ្សាយនៅថ្ងៃ៖
ស្តាប់ - ០២:៣៥
បញ្ហាសម្បទានដីសេដ្ឋកិច្ចនៅកម្ពុជា នៅតែជាបញ្ហាមួយ ដែលផ្ដល់ផលវិបាកចំពោះប្រជាជនកម្ពុជាភាគច្រើន ដែលស្ថិតនៅជុំវិញតំបន់សម្បទានដីសេដ្ឋកិច្ចទាំងនោះ។
នេះបើយោងតាមរបាយការណ៍ «វិភាគស្ថិតិស្តីពីសម្បទានដីសេដ្ឋកិច្ចនៅកម្ពុជា» ដែលត្រូវបានដាក់បង្ហាញ ដោយមជ្ឈមណ្ឌលស្រាវជ្រាវ តស៊ូមតិ និងទំនាក់ទំនង (RACC) នៃវេទិកាអង្គការមិនមែនរដ្ឋាភិបាល ស្តីពីកម្ពុជា (NGO Forum) នៅថ្ងៃទី ២៨ មិថុនានេះ។
ផ្អែកតាមទិន្នន័យនេះ មានក្រុមហ៊ុនចំនួន ២៦៧ នៅទូទាំងប្រទេសកម្ពុជាបានទទួលដីសម្បទានសេដ្ឋកិច្ចទំហំជាង ១លានហិចតា (១.៥៣២.៧៨៣.៦៥ ហ.ត) ដែលលាតសន្ធឹងលើផ្ទៃដីក្នុងខេត្តចំនួន១៨។ ខេត្តទាំងនោះរួមមាន ខេត្តបន្ទាយមានជ័យ បាត់ដំបង កំពង់ចាម កំពង់ស្ពឺ កំពង់ធំ កំពត ខេត្តកោះកុង ក្រចេះ មណ្ឌលគីរី ឧត្តរមានជ័យ ព្រះវិហារ ពោធិ៍សាត់ ខេត្តរតនគីរី សៀមរាប ខេត្តព្រះសីហនុ ខេត្តស្ទឹងត្រែង ខេត្តស្វាយរៀង និងខេត្តត្បូងឃ្មុំ។
ជាមួយនឹងក្ដីសង្ឃឹមរបស់រដ្ឋាភិបាលថា ការផ្ដល់ដីសម្បទានសេដ្ឋកិច្ច គឺដើម្បីជួយសម្រាលជីវភាព និងផ្ដល់ការងារឲ្យប្រជាជនកម្ពុជា ប៉ុន្តែផ្ទុយទៅវិញ វាបានបង្កទៅជាទុក្ខទោសដល់ប្រជាពលរដ្ឋដែលពាក់ព័ន្ធទៅវិញ។ នៅក្នុងរបាយការណ៍នេះក៏បានបង្ហាញដែរថា ដីសម្បទានសេដ្ឋកិច្ចចំនួន ១៥៨ បានបង្កអោយមានវិវាទដីធ្លី ដែលបានធ្វើឲ្យប៉ះពាល់ ទៅដល់ប្រជាជនរហូតដល់ទៅ ៣៥៦០៤គ្រួសារ។ ហើយក្នុងចំណោមនោះ មានតែ ៤២ ករណីប៉ុណ្ណោះ ដែលត្រូវបានដោះស្រាយ ហើយ៥០ករណីទៀតបានដោះស្រាយខ្លះ, ៥៤ករណីមិនទាន់បានដោះស្រាយ និង១២ករណីទៀតដែលមិនបានដឹង។
យ៉ាងណាក៏ដោយ តំណាងរដ្ឋាភិបាលមកពីក្រសួងបរិស្ថាន លោក ស៊ី រ៉ាមន្នី បានចាត់ទុកថា របាយការណ៍នេះថា ជារបាយការណ៍ចាស់ និងមិនបានឆ្លុះបញ្ចាំងពីស្ថានភាពពិតចុងក្រោយរបស់រដ្ឋាភិបាលនោះទេ និងបានទាមទារឲ្យមានការកែប្រែតួលេខមួយចំនួន នៅក្នុងរបាយការណ៍នេះ ពិសេសតួលេខចន្លោះពីខែ៤ និងខែ៥ នៃឆ្នាំ២០១៦នេះ។
គួរជម្រាបជូនថា ការផ្ដល់ដីសម្បទានសេដ្ឋកិច្ចនៅកម្ពុជា បានចាប់ផ្ដើមតាំងពីឆ្នាំ ១៩៩៥ មក។ ប៉ុន្តែចាប់ពីឆ្នាំ២០១២ដល់ឆ្នាំ២០១៥ និន្នាការនៃការផ្តល់ដីសម្បទានសេដ្ឋកិច្ចបានធ្លាក់ចុះខ្លាំង បន្ទាប់ពីមានបទបញ្ជាលេខ ០១ របស់រាជរដ្ឋាភិបាលកម្ពុជា។ មានក្រុមហ៊ុនចំនួន ២៣ ត្រូវបានរដ្ឋាភិបាលសម្រេចដកហូតយកមកវិញ និងក្រុមហ៊ុនមួយចំនួនបានស្ម័គ្រចិត្តប្រគល់ដីវិនិយោគជូនរដ្ឋាភិបាលវិញ ខណៈដែលក្រុមហ៊ុនខ្លះទៀតត្រូវបានកាត់បន្ថយទំហំដីវិនិយោគ និងមួយចំនួនទៀត ត្រូវបានទុកពេលចន្លោះពី៦ខែទៅ១ឆ្នាំ ដើម្បីតាមដាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ