លោក អេង ឆៃអ៊ាង៖ ទោះគ្មានការត្រួតពិនិត្យពីតុលាការ ក៏លោកកឹម សុខាមិនរត់ចោលស្រុកដែរ
ចុះផ្សាយនៅថ្ងៃ៖
ស្តាប់ - ២៦:៤៤
ភ្ញៀវប្រចាំថ្ងៃរបស់វិទ្យុបារាំងអន្តរជាតិ RFI នៅយប់នេះ លោក អេង ឆៃអ៊ាង ដែលជា មន្ត្រីជាន់ខ្ពស់របស់គណបក្សសង្គ្រោះជាតិ។ នៅថ្ងៃនេះ តុលាការក្រុងភ្នំពេញ បានសម្រេចដាក់ឲ្យឯកឧត្តម កឹម សុខា ប្រធានស្តីទី គណបក្សសង្គ្រោះជាតិ មិនឲ្យចេញទៅក្រៅប្រទេសទេ។ លោក អេង ឆៃអ៊ាង ប្រាប់ថា បើទោះជា តុលាការមិនសម្រេចដាក់លោក កឹម សុខា ឲ្យនៅក្រោមការត្រួតពិនិត្យ ក៏លោកប្រធានស្តីទីមិនរត់ចោលស្រុកដែរ! ទោះយ៉ាងនេះក្តី មន្ត្រីបក្សប្រឆាំងរូបនេះ នៅតែយល់ថា រាល់ចំណាត់ការរបស់តុលាការទៅលើ លោក កឹម សុខា គឺខុសច្បាប់ និងរំលោភរដ្ឋធម្មនុញ្ញ។ដោយឡែក ជុំវិញករណីឃាតកម្មសម្លាប់បណ្ឌិត កែម ឡី, បក្សសង្គ្រោះជាតិ នៅតែជំរុញឲ្យមានការស៊ើបសង្កេតដោយមានតម្លាភាព និងដោយមានរួមពីអ្នកជំនាញអន្តរជាតិ។ ក៏ប៉ុន្តែបក្សប្រឆាំង មិនតែទាត់ចោលការចោទប្រកាន់របស់លោក សម រង្ស៊ី ដែលកំពុងនៅក្រៅស្រុក នោះទេ។ទាក់ទងនឹងញត្តិថ្វាយព្រះមហាក្សត្រ ព្រមទាំងស្នាមមេដៃរបស់ពលរដ្ឋពីមុនមកនោះ លោក អេង ឆៃអ៊ាង មិនប្រាកដថា ស្នាមេដៃទាំងអស់នោះ សុទ្ធតែត្រូវទាំងអស់នោះទេ ប៉ុន្តែលោកអះអាងថា តំណាងរាស្ត្រគ្រាន់តែប្រមូលក្តីព្រួយបារម្ភរបស់ពលរដ្ឋជូនព្រះមហាក្សត្រ ដូច្នេះអាជ្ញាធរគួរតែពិចារណាលើខ្លឹមសាររបស់ញត្តិជាងស្នាមេដៃ។ តទៅនេះ សូមស្តាប់បទសម្ភាសរវាងហេង ឧត្តម និង លោក អេង ឆៃអ៊ាង៖
