ការចុះឈ្មោះឆ្នោតថ្ងៃទី១៖គ្មានភាពមិនប្រក្រតីនៃការចុះឈ្មោះជនបរទេស តែបក្សនយោបាយនៅតែប្រុងប្រយ័ត្ន
សម្រាប់ការចុះឈ្មោះបោះឆ្មោតថ្មីនៅថ្ងៃទី១កាលពីម្សិលមិញនេះ មានបញ្ហារំខានតិចតួចបានកើតឡើង ប៉ុន្តែមិនបានរាំងស្ទះដល់ដំណើរការចុះឈ្មោះបោះឆ្នោតឡើយ។ ចំពោះជនបរទេសដែលទៅចុះឈ្មោះបោះឆ្នោតវិញ ទាំងគ.ជ.ប ទាំងគណបក្សនយោបាយ សុទ្ធតែបញ្ជាក់ដូចគ្នាថា មិនមានភាពមិនប្រក្រតីណាមួយបានកើតមាននោះទេ។ ទោះជាបែបនេះក្តី គណបក្សនយោបាយនៅតែពង្រឹងការប្រុងប្រយ័ត្នខ្ពស់ចំពោះជនបរទេស ដោយពង្រាយអ្នកសង្កេតការណ៍រៀងៗខ្លួនដើម្បីត្រួតពិនិត្យជនបរទេសទាំងនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ការចុះឈ្មោះបោះឆ្នោតថ្មីនៅថ្ងៃទី១ គណៈកម្មការធិការជាតិរៀបចំការបោះឆ្នោតហៅកាត់ថា គ.ជ.បបានបញ្ជាក់ឲ្យដឹងថា មានប្រជាពលរដ្ឋចំនួន៥ម៉ឺន២ពាន់២៩៧នាក់បានទៅចុះឈ្មោះនៅទូទាំងប្រទេស។ ក៏ប៉ុន្តែនៅក្នុងចំណោមនេះ គ.ជ.ប មិនអាចញែកឲ្យចេញថាតើមានជនបរទេសនៅក្នុងប្រទេសកម្ពុជាចំនួនប៉ុន្មានបានទៅចុះឈ្មោះបោះឆ្នោតនោះឡើយ។ យ៉ាងណាក៏ដោយ គ.ជ.ប បានបង្ហាញថា នៅក្នុងការចុះឈ្មោះបោះឆ្នោតនៅថ្ងៃទី១ ដំណើរការចុះឈ្មោះបានជួបបញ្ហាខ្លះៗដែរ។
បើតាមលោកហង់ ពុទ្ធា អ្នកនាំពាក្យគណៈកម្មការធិការជាតិរៀបចំការបោះឆ្នោត បញ្ហាទាំងនោះរួមមានដូចជា អ្នកចុះឈ្មោះបោះឆ្នោតខ្លះបានច្រឡំកន្លែងចុះឈ្មោះដែលបញ្ហានេះបានកើតឡើងចំពោះឃុំដែលទើបបង្កើតឡើងថ្មី។ ចំណែកនៅក្នុងខេត្តខ្លះ មានភ្លៀងធ្លាក់ រីឯម៉ាស៊ីនចុះឈ្មោះបោះឆ្នោតមួយចំនួនបានខូចដែលបញ្ហាទាំងនេះ បានធ្វើឲ្យការចុះឈ្មោះបោះឆ្នោតត្រូវពន្យារពេល ប៉ុន្តែបញ្ហាទាំងនេះមិនបានរាំងស្ទះដល់ដំណើរការចុះបោះឆ្នោតរបស់ប្រជាពលរដ្ឋនោះទេ។
ដោយឡែកចំពោះករណីជនបរទេសចុះឈ្មោះបោះឆ្នោតដែលជាបញ្ហាក្តៅគគុកនៅក្នុងសង្គមខែ្មរនារដូវចុះឈ្មោះបោះឆ្នោតនេះវិញ លោកហង់ ពុទ្ធាបានលើកឡើងថា មិនមានភាពមិនប្រក្រតីណាមួយបានលើកមានទេនៅក្នុងអំឡុងពេលចុះឈ្មោះបោះឆ្នោតនៅថ្ងៃទី១នេះ។ ការលើកឡើងនេះក៏ដូចគ្នានឹងការសង្កេតឃើញរបស់បណ្តាគណបក្សនយោបាយដែលបានដាក់អ្នកសង្កេតការណ៍របស់ខ្លួនតាមការិយាល័យចុះឈ្មោះបោះឆ្នោតដែរ។ ទោះជាបែបនេះក្តី គណបក្សនយោបាយនៅតែពង្រឹងការប្រុងប្រយ័ត្នជានិច្ចចំពោះជនបរទេសដែលទៅចុះឈ្មោះបោះឆ្នោត។
លោកអេង ឆៃអ៊ាង មន្ត្រីជាន់ខ្ពស់គណបក្សសង្រ្គោះជាតិ បានសង្កត់ធ្ងន់ថា អ្នកសង្កេតការណ៍របស់បក្សប្រឆាំងនឹងកត់ឈ្មោះជនបរទេសដែលមកចុះឈ្មោះបោះឆ្នោត ដើម្បីទុកប្តឹងជំទាស់ទៅកាន់គ.ជ.បនៅពេលបិទបញ្ជីដំបូង។
ចំណែកលោកពេជ្រ ស្រស់ ប្រធានគណបក្សយុវជនកម្ពុជាដែលបានដាក់អ្នកសង្កេតការណ៍តែនៅក្នុងខេត្តត្បូងឃ្មុំ បានលើកឡើងថា អ្នកសង្កេតការណ៍របស់លោកនឹងធ្វើការត្រួតពិនិត្យអត្តសញ្ញាណប័ណ្ណ និងឯកសារផ្សេងទៀតរបស់ជនបរទេសដែលមកចុះឈ្មោះបោះឆ្នោតជំនួសក្រុមការងារគ.ជ.ប។ ចំពោះគណបក្សអំណាចខ្មែរវិញ លោកទេព វីរៈ ដែលអ្នកនាំពាក្យបានគូសបញ្ជាក់ថា អ្នកសង្កេតការណ៍របស់គណបក្សនឹងត្រួតពិនិត្យ និងសួរនាំជនបរទេសដែលមកចុះឈ្មោះបោះឆ្នោត អំពីឯកសារ និង អត្តសញ្ញាណប័ណ្ណ បើមិនមានភាពត្រឹមត្រូវទេ នឹងរាយការណ៍ទៅកាន់អាជ្ញាធរ និង ហាមឃាត់មិនឲ្យជនបរទេសនោះចុះឈ្មោះបោះឆ្នោតតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ