មន្រ្តីជំនាញ៖ ខេត្តចំនួនបី អាចនឹងចាប់ផ្តើមលិច នៅសប្តាហ៍ក្រោយ
បរិមាណទឹកនឹងបន្តកើនឡើង ក្នុងរយៈពេលមួយសប្តាហ៍ខាងមុខទៀត នៅក្នុងខេត្ត ស្ទឹងត្រែង ក្រចេះ កំពង់ចាម។ ខេត្តទាំងបី នៅតំបន់ទំនាបសងខាងទន្លេមេគង្គនេះ ក៏អាចនឹងចាប់ផ្តើមលិច ដោយសារតែបរិមាណទឹកទន្លេមេគង្គហក់ឡើងខ្ពស់។ នេះបើតាមការឲ្យដឹងពី លោក ចាន់ យុត្ថា អ្នកនាំពាក្យក្រសួងធនធានទឹក នៅថ្ងៃទី ៣ សីហា នេះ។
ចុះផ្សាយនៅថ្ងៃ៖
ស្តាប់ - ០១:១០
តំបន់ទំនាបដែលនៅសងខាងទន្លេមេគង្គលើ ពោលគឺខេត្ត ស្ទឹងត្រែង ក្រចេះ កំពង់ចាម នឹងចាប់ផ្តើមលិច ដោយសារតែបរិមាណទឹកនឹងកើនឡើងនៅសប្តាហ៍ក្រោយ។យ៉ាងណាមិញ បរិមាណទឹកកើនឡើងនេះ គឺជាបរិមាណទឹកភ្លៀងធ្លាក់ចុះដែលមានស្រាប់ទេ ដោយមិនទាន់ធ្វើការគណនា បរិមាណទឹកភ្លៀងដែលធ្លាក់បន្ថែមនោះទេ។ នេះបើតាមការឲ្យដឹងពី លោក ចាន់ យុត្ថា អ្នកនាំពាក្យក្រសួងធនធានទឹក និង ឧតុនិយម នៅថ្ងៃ ទី ៣ សីហានេះ។
ការកើនឡើងនូវបរិមាណទឹក អ្នកនាំពាក្យរូបនេះ បានស្នើឲ្យប្រជាពលរដ្ឋ ដែលប្រកបរបរកសិកម្ម នៅតំបន់ទំនាបទាំងនេះ ឲ្យធ្វើការប្រមូលផលកសិកម្ម ឲ្យបានរួចរាល់ មុនពេលបរិមាណទឹកកើនឡើង។ បន្ថែមលើនេះ លោក អំពាវនាវ ឲ្យប្រជាពលរដ្ឋ មានការប្រុងប្រយ័ត្នខ្ពស់ ជៀសវាង គ្រោះថ្នាក់ជាយថាហេតុ ស្របពេល ដែលចរន្ត និង ល្បឿនទឹក មានការប្រែប្រួល។
លោក ចាន់ យុត្ថា បានបន្តថា បរិមាណទឹកភ្លៀងធ្លាក់រាយប៉ាយ នៅទូទាំងប្រទេសនេះ ដោយសារតែប្រទេសកម្ពុជា ទទួលរងឥទ្ធិពលប្រព័ន្ធសម្ពាធទាប ដែលអូសកាត់អាងលើទន្លេមេគង្គ ប្រទេសមីយ៉ាន់ម៉ា ប្រទេសថៃ និង ប្រទេសឡាវ និង ទីពីរ ជ្រលងសម្ពាធទាប។ បរិមាណទឹកភ្លៀងដែលធ្លាក់រាយប៉ាយនេះ អាចនឹងបន្តធ្លាក់ទៀត រហូតដល់ខែ កញ្ញា។
គួរជម្រាបជូនថា គិតត្រឹមថ្ងៃទី ៣ សីហា នេះ ថ្វីត្បិតតែបរិមាណទឹកទន្លេមេគង្គ ទន្លេបាសាក់ ទន្លេសាប មានការកើនឡើងក៏ពិតមែន ប៉ុន្តែវាមិនទាន់ឈានទៅដល់កម្រិតប្រកាសឲ្យមានការប្រុងប្រយ័ត្ននៅឡើយនោះទេ៕
អត្តបទដោយ៖ សរ ពិសី
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ