នាយករដ្ឋមន្ត្រីសុំឲ្យមានការយោគយល់ខណៈដែលមានការតវ៉ាមួយឈុតនៅមុខសាលាក្រុងរឿងជំនន់ទឹកភ្លៀង
សកម្មជនដីធ្លីនៅតំបន់បឹងកក់បានបែកគ្នាទៅកាន់លំនៅឋានវិញបន្ទាប់ពីអាជ្ញាធរក្រុងបង្ហាញពីឆន្ទៈខិតខំជួយរំដោះទឹកចេញពីសហគមន៍របស់ពួកគេរស់នៅ បន្ទាប់ពីមានភ្លៀងធ្លាក់កាលពីថ្ងៃអាទិត្យ។ជាមួយគ្នានេះលោកនាយករយករដ្ឋមន្ត្រី ហ៊ុន សែន បានថ្លែងពីផលប៉ះពាល់អារម្មណ៍របស់ប្រជាពលរដ្ឋនៅទីក្រុងភ្នំពេញបណ្តាលមកពីជំនន់ទឹកភ្លៀងនិងស្នើសុំឲ្យមានការយោគយល់ផងដែរ។
ចុះផ្សាយនៅថ្ងៃ៖
ស្តាប់ - ០២:០៩
សកម្មជនដីធ្លីតំបន់បឹងកក់បានចេញមកតវ៉ានៅតាមដងផ្លូវ មុខសាលារាជធានីភ្នំពេញនៅព្រឹកថ្ងៃចន្ទនេះ ដើម្បីឲ្យអាជ្ញាធរក្រុងទទួលខុសត្រូវលើការលិចលង់ និងខូចខាតសំភារៈបណ្តាលមកពីជំនន់ទឹកភ្លៀងកាលពីព្រឹកថ្ងៃអាទិត្យកន្លងទៅនេះ។
ក្រុមអ្នកតវ៉ាដែលភាគច្រើនជាស្ត្រី បាននាំគ្នាដឹកអង្ករសហគមន៍របស់ពួកគេមកចាក់រាយនៅលើផ្លូវថ្នល់ខាងមុខសាលាក្រុង និងស្រែកទាមទាររកអ្នកទទួលខុសត្រូវ ដោយពួកគេចោទប្រកាន់ថាមកពីអាជ្ញាធរក្រុងអនុញ្ញាតិឲ្យមានការអភិវឌ្ឍន៍ដោយមិនគិតពីផលប៉ះពាល់។
បន្ទាប់ពីមានការសម្របសម្រួលពីមន្ត្រីសាលារាជធានី ក្រុមអ្នកតវ៉ាបានដកថយទៅវិញនៅព្រឹកនេះដែរ ដោយអាជ្ញាធរក្រុងបានដាក់គ្រឿងចក្រកាយប្រលាយបង្ហូរទឹកនៅម្តុំបឹងកក់ដោយមានការតាមឃ្លាំមើលពីក្រុមអ្នកតវ៉ានៅតំបន់នោះផងដែរ។ កញ្ញា សុង ស្រីលាភ សុកម្មជនបឹងកក់មួយរូបបានរៀបរាប់ថាអង្ករប្រមាណជា៤០បេ ឬ៤០ការ៉ុង ចំណុះ ៥០គីឡូក្រាមសម្រាប់ផ្គត់ផ្គង់ដល់ប្រជាសហគមន៍និងជួយដល់អ្នកតវ៉ាដីធ្លីនៅតំបន់បឹងកក់និងអ្នកមកពីតំបន់ផ្សេង ត្រូវទឹកលិច។ស៊ីម៉ង់សម្រាប់សង់អាគាសមាគមន៍ជាច្រើនបាវមិនអាចយកទាន់ពីការដែលទឹកភ្លៀងជន់យ៉ាងលឿន រួមទាំងសម្ភារៈមួយចំនួនទៀត។
មិនមានការធ្វើអត្ថាធិប្បាយអ្វីទាក់ទងទៅនឹងការតវ៉ានេះទេ ក៏ប៉ុន្តែជាក់ស្តែងអាជ្ញាធរខណ្ឌដឹកនាំដោយអភិបាលខ័ណ្ឌដូនពេញ បានចុះទៅដឹកនាំផ្ទាល់ក្នុងការរំដោះទឹកចេញពីតំបន់លិចលង់។
ដំណាលគ្នានេះដែរ លោក នាយករដ្ឋមន្ត្រី ហ៊ុន សែន បានលើកឡើងពីអារម្មណ៍មួរម៉ៅរបស់ប្រជាពលរដ្ឋនៅរាជធានីភ្នំពេញ ពីបញ្ហាទឹកលិចដោយទឹកភ្លៀងនេះ។ នៅក្នុងពិធីចែកសញ្ញាបត្រដល់និស្សិតសកលវិទ្យាល័យបៀលប្រាយនៅព្រឹកនេះដែរឯកោះពេជ្រ លោក ហ៊ុន សែន បានសុំការយោគយល់ពីប្រជាពលរដ្ឋ ដោយសារភ្លៀងធ្លាក់មានកំរិតខ្ពស់ពេករហូតដល់ ៧០ទៅ៨០ មីលីម៉ែត្រ។ស្ថានភាពបែបនេះត្រូវលោកនាយករដ្ឋមន្ត្រីប្រៀបធៀបថា កំរិតភ្លៀងបែបនេះទីក្រុងណាក៏លិចដែរ។
ក៏ប៉ុន្តែអង្គការសង្គមស៊ីវិល និងអ្នកជំនាញផ្នែកនគររូបនីយកម្មនានា បានរិះគន់ថា វាពិតជាជាប់ទាក់ទងទៅនឹងការអភិវឌ្ឍន៍ផ្នែកនគររូបនីយកម្មនៅក្នុងរាជធានីទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ