រដ្ឋនឹងខាតបង់ប្រាក់ គណៈកម្មការនឹងបាត់បង់ប្រសិទ្ធភាពការងារ ប្រសិនបើឈើនៅតែឆេះ
ចុះផ្សាយនៅថ្ងៃ៖
ស្តាប់ - ០៥:១៧
គណៈកម្មាធិការជាតិបង្ក្រាបបទល្មើសព្រៃឈើ គួរមានការអង្កេតនូវហេតុការណ៍ភ្លើងឆេះឈើឲ្យបានច្បាស់លាស់ រួមទាំងមានវិធានការទប់ស្កាត់ផងដែរកុំឲ្យមានឆេះជាបន្តទៀត ដែលនេះគឺជាការខាតបង់ថវិកាចូលជាតិ។ មួយវិញទៀតប្រសិនបើអគ្គិភ័យនេះ ជាចេតនាដុតបំផ្លាញវត្ថុតាងវិញនោះ វាគឺជាការផ្គើននឹងយទ្ធនាការរបស់គណៈកម្មការ និងជាបរាជ័យក្នុងការទប់បទល្មើសព្រៃឈើដែរ ក្នុងការរក្សាព្រៃឈើដែលនៅសេសសល់ចុងក្រោយ។
ឈើប្រណីតៗជាច្រើនកំណាត់ ត្រូវបានភ្លើងឆេះ ជាបន្តបន្ទាប់ ខណៈដែលគណៈកម្មការជាតិបង្ក្រាប និងទប់ស្កាត់បទល្មើសព្រៃឈើ ដែលដឹកនាំដោយនាយកឧត្តមសេនីយ សៅ សុខា មេបញ្ជាការកងរាជអាវុធហត្ថលើផ្ទៃប្រទេស កំពុងធ្វើការ និងមិនទាន់បានចេញរបាយកាណ៍ជាលទ្ធផលម្តងនៅឡើយ បន្ទាប់ពីគណៈកម្មការនេះបង្កើតឡើងប្រមាណជា២ខែ។
កាលពីសប្តាហ៍មុនឈើប្រណីតរាប់ពាន់កំណាត់វែងៗ របស់ក្រុមហ៊ុន យូនីហ្គ្រីន និងក្រុមហ៊ុន កសិករខ្មែរអង្គរ មានទីតាំងនៅក្នុងដីសម្បទាននៃខេត្តមណ្ឌលគីរី បានក្លាយជារងើកភ្លើង ក្រហមឆ្អិនឆ្អៅ ដោយសារការឆេះមានលក្ខណៈធំធេង និងបង្កការខូចខាតឈើ ដែលសុទ្ធសឹងជាលុយរាប់លានដុល្លារ។ តាមការកត់សម្គាល់ អគ្គិភ័យបំផ្លាញឈើនេះ មិនមែនជាលើកទី១ទេនៅខេត្តមណ្ឌលគីរី គឺកាលពីខែមករាកន្លងទៅ ឈើក៏ត្រូវភ្លើងឆេះផងដែរ នៅក្រុមហ៊ុនដីសម្បទានវៀតណាមឈ្មោះប៊ិញហ្វឿក១ ក្នុងស្រុកកែវសីមា។
ការឆេះកំណាត់ឈើទាំងដុំៗក្រហមរងាល ដែលមើលទៅហាក់ចង់ស្រក់ទឹកមាត់គ្រប់គ្នានេះ ត្រូវគេមើលឃើញ និងលើកជាចំងល់ថា វាជារឿងចៃដន្យម៉្លេះ ដែលឈើបែបនេះកន្លងមកមិនដែលឮថាមានភ្លើងឆេះផ្តេសផ្តាសយ៉ាងងាយៗបែបនេះទេ។ ក៏ប៉ុន្តែទើបតែមានគណៈកម្មការថ្នាក់ជាតិទប់ស្កាត់ និងបង្ក្រាបបទល្មើសព្រៃឈើកើតឡើង ទើបមានរឿងឆេះព្រៃ និងឆេះឈើជាហូរហែ ដំណាលគ្នាដែរ!
តែនេះគ្រាន់តែជារឿងជួនគ្នាប៉ុណ្ណោះ ដរាបណាគណៈកម្មការបង្រ្កាបព្រៃឈើនៅមិនទាន់បញ្ជាក់ពីលទ្ធផលការងារផ្លូវការថាយ៉ាងណាទេ គេមិនអាចធ្វើការវាយតម្លៃថាយ៉ាងណាបានទេ។ ក៏ប៉ុន្តែមានការវិភាគមួយចំនួនបានលើកឡើងថា ឈើមិនដែលឆេះខ្លួនឯងបានទេ។ ហើយឈើប្រណីតបែបនេះមិនអាចឆេះដោយងាយៗទាំងគំនរបានដែរ បើទោះណាជាមានភ្លើងឆេះព្រៃយ៉ាងណាក៏ដោយ។
ម្យ៉ាងទៀតឈើប្រណីតៗក្រហមរលោង វាស្មើនឹងលុយដុល្លារដ៏ខៀវស្រងាត់យ៉ាងក្រាសក្រែល ការរៀបចំទុកដាក់របស់ឈ្មួញ ក៏មានការថែទាំ និងការពារឈើទាំងអស់នេះយ៉ាងប្រុងប្រយ័ត្នផងដែរ គឺការថែរក្សាប្រកបដោយសុវត្ថិភាពខ្ពស់ការពារពីអគ្គិភ័យ ដោយប្រការណាមួយនេះឯង។
ដំណាលគ្នានេះ ក៏មានការលើកឡើងផងដែរពីមជ្ឈដ្ឋាននានា ដែលតាមដានដំណើរការងារបង្ក្រាបបទល្មើសព្រៃឈើ និងអគ្គិភ័យនេះ ដោយមានការលើកឡើងថាពេលនេះឈ្មួញ លែងអាចទាញយកប្រយោជន៍ពីគំនរឈើដ៏ប្រណីតនេះទៀតហើយ ដូច្នេះអគ្គិភ័យ ដែលឆាបឆេះកំណាត់ឈើនេះ អាចជាចេតនារបស់ឈ្មួញឈើក៏ថាបាន។ ប្រសិនបើឈើ ទាំងអស់នេះ អាចជាវត្ថុតាងពាក់ព័ន្ធទៅនឹងបទល្មើសព្រៃឈើ គេគិតថាវាអាចជាចេតនាផងដែរក្នុងការបំបាត់ភស្តុតាងនិងវត្ថុតាងទាំងនេះ។
តាមការគិតមួយផ្នែក វាប្រហែលជាមិនមានការលំបាកទេក្នុងការអង្កេតដើម្បីស្វែងរកការពិតពីអគ្គិភ័យ និងរកអ្នកទទួលខុសត្រូវ ដោយហេតុថា អគ្គិភ័យដែលបានកើតឡើងទាំងពីរលើក ហើយបំផ្លាញឈើប្រណីតអស់ជាច្រើនកំណាត់កន្លងទៅនេះ គឺស្ថិតនៅលើដីសម្បទានសេដ្ឋកិច្ច ដែលរដ្ឋប្រគល់ឲ្យទាំងអស់!
មួយវិញទៀត ទីតាំងដែលមានភ្លើងឆេះឈើ គឺត្រូវសមត្ថកិច្ចបង្ក្រាបបទល្មើសព្រៃឈើ ដែលជាការសម្រេចដោយលោកនាយករដ្ឋមន្ត្រី ហ៊ុន សែន កាលពីថ្ងៃទី១៥ខែមករានោះ បានចូលទៅដល់ហើយ និងមានកម្លាំងគ្រប់គ្រងតំបន់នោះទៀតផង ហេតុដូចម្តេចបានជាមានការថ្លោះធ្លោយ ឲ្យភ្លើងឆេះឈើដូច្នេះ? សំណួរនេះត្រូវបានសួរពីគ្រប់ទិសទី និងលើកជាចំងល់លើចំណាត់ការរបស់គណៈកម្មការជាតិទប់ស្កាត់និងបង្ក្រាបបទល្មើសព្រៃឈើ ពីប្រសិទ្ធភាពការងាររបស់គណៈកម្មការនេះ។
ទោះយ៉ាងណាក៏ដោយ គេមិនអាចសន្និដ្ឋានពីខាងក្រៅបានទេ ខណៈដែលគណៈកម្មការជាតិមួយនេះកំពុងតែបំពេញការងាររបស់ខ្លួននៅឡើយ និងមិនទាន់បានប្រកាសពីលទ្ធផល ឬយ៉ាងណាដែរ គ្រាន់តែដឹងខ្លះៗថាមានជនសង្ស័យមួយចំនួនត្រូវបានកសាងសំណុំរឿងទៅកាន់តុលាការហើយ នេះបើតាមការបង្ហើបជាបន្តបន្ទាប់ពីអ្នកនាំពាក្យកងរាជអាវុធហត្ថលើផ្ទៃប្រទេស។
ក៏ប៉ុន្តែសាធារណៈជន នៅតែទទូចថា គណៈកម្មការជាតិ និងអាជ្ញាធរពាក់ព័ន្ធនានា គួរតែស្វាហាប់ ទប់ស្កាត់ ជាពិសេសបង្កាឲ្យបាននូវអគ្គិភ័យ ជាយថាហេតុ ឬក៏ដោយចេតនាណាមួយបន្ថែមទៀត ព្រោះថាការដុតឈើចោល ប្រៀបបាននឹងដុតលុយដុល្លារទាំងគីបៗចោលដូច្នោះដែរ។ ប្រសិនបើឈើដែលប្រមូលបានពីយុទ្ធនាការបង្ក្រាបនេះ ឬក៏តម្រូវឲ្យមានការបង់ពន្ធ នោះការបង្ក្រាបនេះមានអត្ថន័យច្រើន ពោលគឺជាសករាជថ្មីមួយនៃការជួយទប់ស្កាត់ការបំផ្លាញព្រៃឈើ និងបានចំណូលថវិកាចូលរដ្ឋផងដែរពីការរិបអូសឈើខុសច្បាប់ ឬឈើដែលត្រូវបង់ពន្ធ។ អត្ថន័យមួយទៀត លទ្ធផលជាវិជ្ជមានណាមួយពីការបង្ក្រាបឧក្រិដ្ឋកម្មព្រៃឈើនេះ នឹងអាចនាំមកនូវផលចំណេញច្រើនដែរ ដល់រដ្ឋាភិបាល ដែលដឹកនាំដោយគណបក្សប្រជាជនកម្ពុជា។ តែបើលទ្ធផលដែលចេញមកនៅពេលខាងមុខ មើលទៅមិនដុំកំភួនទេ វានឹងក្លាយជាបរាជ័យរបស់គណៈកម្មការមួយនេះ ហើយក៏វាអាចប៉ះពាល់ទៅដល់មុខមាត់របស់រដ្ឋាភិបាលផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ