សហគមន៍ការពារព្រៃឡង់៖ការដឹកឈើចេញពីព្រៃឡង់ទៅវៀតណាមនៅតែបន្តកើតមាន
សហគមន៍ការពារព្រៃឡង់ នៅថ្ងៃច័ន្ទនេះបានធ្វើសន្និសីទសារព័ត៌មាន បង្ហាញលទ្ធផលផ្លូវការ នៃដំណើរចុះល្បាតព្រៃឡង់ដែលមានរយៈពេលប្រាំថ្ងៃក្នុងខេត្តចំនួនបួនរួមមានក្រចេះ កំពង់ធំ ស្ទឹងត្រែង ព្រះវិហារ។ ក្នុងនោះសហគមន៍ រកឃើញឈើជ្រៀករួចចំនួន៧៥ម៉ែត្រគូប ឈើកាប់រំលំមិនទាន់ជ្រៀកចំនួន១៥៩ដើម និង គល់ឈើកាប់រួចថ្មីចំនួន៧៨៧គល់ ហើយបានប្រគល់ជូនរដ្ឋបាលព្រៃឈើ។ បន្ថែមពីលើនេះទៀតពួកគេបានរកឃើញថា ការដឹកឈើចេញពីព្រៃឡង់ទៅវៀតណាមនៅតែបន្តកើតមាន បើទោះបីជាគណៈកម្មការជាតិកាលពីពេលថ្មីៗនេះប្រកាសបិទច្រកនាំ ចេញឈើទៅវៀតណាមក៏ដោយ។
ចុះផ្សាយនៅថ្ងៃ៖
ស្តាប់ - ០១:៤៤
ថ្លែងនៅក្នុងសន្និសីទកាសែតនាព្រឹកថ្ងៃច័ន្ទនេះលោក ហឿន សុភាព តំណាងសហគមន៍ការពារព្រៃឡង់មកខេត្តកំពង់ធំលើកឡើងថា បទល្មើសព្រៃឈើនៅជុំវិញតំបន់ព្រៃឡង់នៅតែបន្តកើតមានដដែល ។ ពិសេសការដឹកឈើចេញពីព្រៃឡង់នាំបន្តទៅកាន់ប្រទេសវៀតណាមតាមច្រកព្រំដែន។
តាមរយៈការចុះល្បាតជាបន្តបន្ទាប់ចាប់ពីថ្ងៃទី០១ដល់ថ្ងៃទី០៥កុម្ភៈ ក្នុងខេត្តចំនួនបួនសហគមន៍ការពារព្រៃឡង់សហការណ៍ជាមួយអាជ្ញាធរមូលដ្ឋានគឺចាប់បាន រណាយន្តសរុបចំនួន១៩គ្រឿងដោយបានប្រគល់ជូនរដ្ឋបាលព្រៃឈើនិងរកឃើញកាំភ្លើងឆ្នៃ២ដើមនិងស្នាតេះមួយដើម។ អ្វីដែលជាការព្រួយបារម្ភរបស់ប្រជាពលរដ្ឋសហគមន៍នៅពេលល្បាតព្រៃនោះពួកគេបានប្រទះឃើញកាំភ្លើងកែច្នៃ ដែលផលិតឡើងដើម្បីបំបាក់ស្មារតីដល់ដំណើរចុះល្បាតព្រៃរបស់ពួកគេ។
បន្ទាប់ពីការរកឃើញវត្ថុតាងទាំងអស់នេះពួកគេបានធ្វើរបាយការណ៍សង្ខេបដាក់ជូនរដ្ឋបាលព្រៃឈើ មុននឹងដាក់ជូនស្ថាប័នជំនាញ។
លោក ហឿន សុភាព ឲ្យដឹងថា ដំណើរចុះល្បាតរបស់សហគមន៍ការពារព្រៃឡង់ធ្វើឡើងដោយពុំមានកិច្ចសហការណ៍ជាមួយគណៈកម្មការជាតិរបស់រដ្ឋាភិបាលដឹកនាំដោយលោក សៅ សុខា ជាប្រធាននោះទេ។ តាំងពីរដ្ឋាភិបាលបង្កើតគណៈកម្មការជាតិនេះឡើងលោកថា គណៈកម្មការជាតិមួយនេះពុំដែលឃើញចុះទៅកាន់តំបន់ព្រៃឡង់នោះទេ។
ព្រៃឡង់បើតាមការអះអាងរបស់ប្រជាសហគមន៍គឺនៅពេលនេះកំពុងរង់ការកាប់បំផ្លាញយ៉ាងអនាធិបតេយ្យដែលបង្កផលប៉ះពាល់ផងដែរដល់សត្វព្រៃនិងមច្ឆាជាតិ ពីសំណាក់ក្រុមឈ្មួញដែលទទួលបានសិទ្ធិវិនិយោគ។ ដំណោះស្រាយចំពោះមុខសហគមន៍ការពារព្រៃឡង់ស្នើឲ្យគណៈកម្មការជាតិទប់ស្កាត់និងបង្ក្រាបបទល្មើសព្រៃឈើចាត់វិធានការនិងអន្តរាគមន៍ជាបន្ទាន់ដើម្បីទប់ស្កាត់បទល្មើសព្រៃឈើក្នុងតំបន់ព្រៃឡង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ