ជម្រើស ៤ យ៉ាង របស់សហភាពអឺរ៉ុប សម្រាប់ការធ្វើបញ្ជីបោះឆ្នោតនៅកម្ពុជា
អ្នកជំនាញការខាងបោះឆ្នោត របស់សហភាពអឺរ៉ុប កាលពីរសៀលថ្ងៃសុក្រ ទី២៣មករា បានបង្ហាញក្រុមការងារចរចាកំណែទម្រង់ការបោះឆ្នោតគណបក្សប្រជាជនកម្ពុជា និងក្រុមការងារគណបក្សសង្គ្រោះជាតិ នូវជម្រើស ៤ យ៉ាង សម្រាប់ការធ្វើបញ្ជីឈ្មោះអ្នកបោះឆ្នោត នៅកម្ពុជា។ ជម្រើសទាំង ៤ របស់សហភាពអឺរ៉ុប រួមមាន៖ ទី១-ការធ្វើបញ្ជីឈ្មោះអ្នកបោះឆ្នោត ដោយប្រើសំបុត្រកំណើតចេញដោយក្រសួងមហាផ្ទៃ ទី២-ធ្វើបច្ចុប្បន្នភាពលើបញ្ជីបោះឆ្នោតចាស់ របស់គជប សព្វថ្ងៃ ទី៣-ធ្វើបញ្ជីបោះឆ្នោតថ្មី ដោយប្រើស្នាមម្រាមដៃទាំង ១០ និងជម្រើសទី៤-ធ្វើបញ្ជីបោះឆ្នោតថ្មី ដោយប្រើអត្តសញ្ញាណប័ណ្ណសញ្ជាតិខ្មែរ។
ចុះផ្សាយនៅថ្ងៃ៖
ស្តាប់ - ០២:០៧
ក្នុងជំនួបដាច់ដោយឡែកពីគ្នា កាលពីរសៀលថ្ងៃសុក្រ ទី២៣ ខែមករា នៅរដ្ឋសភា ក្រុមអ្នកជំនាញការសហភាពអឺរ៉ុប ប្រចាំកម្ពុជា បានបង្ហាញជម្រើស ៤ នៃការធ្វើបញ្ជីឈ្មោះបោះឆ្នោត នៅកម្ពុជា។ ជម្រើសទាំង៤នោះ រួមមាន៖ ទី១-ការធ្វើបញ្ជីឈ្មោះអ្នកបោះឆ្នោត ដោយប្រើសំបុត្រកំណើតចេញដោយក្រសួងមហាផ្ទៃ ដើម្បីចុះឈ្មោះ ទី២-ធ្វើបច្ចុប្បន្នភាពបញ្ជីបោះឆ្នោតចាស់ របស់គជប សព្វថ្ងៃ ទី៣-ធ្វើបញ្ជីបោះឆ្នោតថ្មី ដោយប្រើស្នាមម្រាមដៃទាំង ១០ និងជម្រើសទី៤-ការធ្វើបញ្ជីបោះឆ្នោតថ្មី ដោយប្រើអត្តសញ្ញាណប័ណ្ណសញ្ជាតិខ្មែរ សម្រាប់ចុះឈ្មោះបោះឆ្នោត និងសម្រាប់បោះឆ្នោត។
ជម្រើសទាំង ៤ របស់សហភាពអឺរ៉ុបនោះ ត្រូវបានលោក ប៊ិន ឈិន ប្រធានក្រុមការងារកំណែទម្រង់ការបោះឆ្នោត មកពីគណបក្សប្រជាជនកម្ពុជា យល់ឃើញថា ជម្រើសទី៤ អាចយកប្រើប្រាស់ សម្រាប់ការធ្វើបញ្ជីឈ្មោះអ្នកបោះឆ្នោត ដូចអ្វីដែលក្រុមការងារចរចា បានលើកឡើងក្នុងការកែប្រែច្បាប់បោះឆ្នោតជ្រើសតាំងតំណាងរាស្ត្រ នៅពេលនេះ។
លោក ប៊ិន ឈិន បានបញ្ជាក់ថា “ជម្រើសទី៤ យើងប្រើ ប៉ុន្តែយើងប្រើអត្តសញ្ញាណប័ណ្ណ យកទៅបោះតែម្តង ហើយយកទៅបង្ហាញគេ ចុះឈ្មោះ មិនមែនមនុស្សម្នាក់ មានអត្តសញ្ញាណប័ណ្ណ ចេះតែទៅបោះឆ្នោតបានទេ ត្រូវតែទៅចុះឈ្មោះបោះឆ្នោត ព្រោះគ្មានឈ្មោះក្នុងបញ្ជីបោះឆ្នោត គេមិនឲ្យបោះឆ្នោតទេ។ ត្រូវតែមានឈ្មោះក្នុងបញ្ជីបោះឆ្នោត ហើយមានអត្តសញ្ញាណប័ណ្ណហ្នឹង បានទៅបោះឆ្នោតបាន។
ចំណែកលោក គួយ ប៊ុនរឿន ប្រធានក្រុមការងារចរចាកំណែទម្រង់ការបោះឆ្នោត មកពីគណបក្សសង្គ្រោះជាតិ បានបង្ហាញការពេញចិត្តចំពោះបទបង្ហាញរបស់ក្រុមអ្នកជំនាញការ សហភាពអឺរ៉ុប លើបច្ចេកទេស ប្រសិទ្ធភាព និងពេលវេលា សម្រាប់ធ្វើបញ្ជីចុះឈ្មោះអ្នកបោះឆ្នោត។ តាមលោក គួយ ប៊ុនរឿន គណបក្សសង្គ្រោះជាតិ ពេញចិត្តលើជម្រើសទី៤ តែចង់ឲ្យគជប ចេញប័ណ្ណបោះឆ្នោតមួយទៀត សម្រាប់ប្រើប្រាស់ពេលបោះឆ្នោត។
លោក គួយ ប៊ុនរឿន បានបញ្ជាក់ថា “ជំរើសទាំងអស់ មានបីបួន។ ប៉ុន្តែជំរើសដែលអាចងាយស្រួល ហើយលឿន គឺជំរើសទី៤។ ជំរើសទី៤ហ្នឹង បានន័យថា មានទិន្នន័យពីក្រសួងមហាផ្ទៃ ដែលទាក់ទងនឹងការផ្តល់អត្តសញ្ញាណប័ណ្ណ មកប្រគល់ឲ្យគជប ហើយគជប ត្រូវមានប្រព័ន្ធមួយទៀតហ្នឹង ដូចគ្នានឹងប្រព័ន្ធរបស់ក្រសួងមហាផ្ទៃ ហើយឲ្យគជប ធ្វើការត្រួតពិនិត្យជាមុនសិនថា សុក្រិតភាព ទិន្នន័យដែលក្រសួង មហាផ្ទៃ ផ្តល់មកឲ្យគជបហ្នឹង មានប្រសិទ្ធភាពយ៉ាងម៉េចថែមទៀត ដើម្បីបញ្ជាក់ថា អ្នកនោះ មានសិទ្ធិគ្រប់គ្រាន់ក្នុងការចុះឈ្មោះបោះឆ្នោត និងមានសិទ្ធិគ្រប់គ្រាន់ក្នុង ការបោះឆ្នោត។ អីចឹង ក្នុងនោះ គជប អាចបន្ថែមចំណុចមួយទៀត លើទិន្នន័យរបស់ក្រសួងមហាផ្ទៃ ដែលផ្តល់មកឲ្យនោះ រួមមាន ឈ្មោះ អាយុ ថ្ងៃខែឆ្នាំកំណើត ទីលំនៅបច្ចុប្បន្ន អីចឹងគជបអាចបន្ថែមមួយ គឺទីតាំងការិយាល័យ ដែលត្រូវបោះឆ្នោត។ អាហ្នឹងគឺថា អាចបញ្ចូលទិន្នន័យភ្លាម ហើយអាចព្រីនប័ណ្ណបោះឆ្នោត សម្រាប់អ្នកបោះឆ្នោតនៅពេលនោះតែម្តង។ អាហ្នឹងលក្ខណៈងាយស្រួលជាទីបំផុត។
ពីរសៀលថ្ងៃសុក្រ ទី២៣មករា ក្រុមការងារចរចាគណបក្សប្រជាជនកម្ពុជា និងគណបក្សសង្គ្រោះជាតិ មិនបានបន្តជួបប្រជុំចរចា កែប្រែច្បាប់បោះឆ្នោតតំណាងរាស្ត្រ នោះទេ។ នៅសប្តាហ៍ក្រោយ ក៏ក្រុមការងារគណបក្សទាំងពីរ មិនជួបគ្នាដែរ ដោយសារតែជាប់រវល់។ កាលពីថ្ងៃចន្ទដើមសប្តាហ៍នេះ ក្រុមការងារចរចាគណបក្សទាំងពីរ បានជជែកកែប្រែច្បាប់បោះឆ្នោត ដល់ជំពូកទី៨ ក្នុងចំណោម ១២ ជំពូក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ