ស្ថានទូតបារាំងរៀបចំកម្មវិធីសប្តាហ៍នៃរសជាតិបែបបារាំងនៅកម្ពុជា
ស្ថានទូបារាំង និងសភាពាណិជ្ជកម្មបារាំង-កម្ពុជា នឹងរៀបចំកម្មវិធី« សប្តាហ៍នៃរសជាតិបែបបារាំងនៅកម្ពុជា»ក្នុងរយៈពេលមួយសប្តាហ៍ចាប់ពីថ្ងៃទី ១៣ ដល់ថ្ងៃទី ២០ មីនាខាងមុខនេះ ។ កម្មវិធីនេះនឹងផ្តល់ជូនប្រជាជនខ្មែរ និងបរទេស នូវឱកាសដើម្បីស្វែងយល់ពីរបៀបរស់នៅតាមបែបបារាំង ដែលមានទាំងកម្មវិធីភ្លក់ម្ហូបអាហារ ការតាំងពិព័ណ៌ ការបញ្ចាំងភាពយន្ត សន្និសីទ និងជំនួបអាជីវកម្មនៅតាមទីតាំងដៃគូនានាក្នុងរាជធានីភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
នេះគឺជាលើកទីមួយហើយដែលរដ្ឋាភិបាលបារាំងបានសម្រេចបង្កើតសប្តាហ៍នៃរសជាតិបែបបារាំងនៅកម្ពុជា ចាប់ពីថ្ងៃទី ១៣ ដល់ ២០ មីនាឆ្នាំ ២០១៥ខាងមុខនេះ។ ឯកអង្គរដ្ឋទូតបារាំងប្រចាំនៅកម្ពុជា លោកហ្សង់ក្លូដ ពាំបឺហ្វបានបញ្ជាក់នៅក្នុងសន្និសីទកាសែត នៅព្រឹកថ្ងៃទី ៤មីនានេះ ក្នុងស្ថានទូតបារាំង ក្នុងទីក្រុងភ្នំពេញថាកម្មវិធីនេះត្រូវបានបង្កើតឡើងដើម្បីប្រជាពលរដ្ឋខ្មែរ ស្វែងយល់ឲ្យបានកាន់តែច្រើននិងច្បាស់ពីម្ហូបអាហារ ពាណិជ្ជកម្ម និងវប្បធម៌របស់បារាំង។ ហើយជាពិសេសនៅថ្ងៃទី ១៩មីនា អាហារពេលល្ងាចតាមបែបបារាំង នឹងត្រូវរៀបចំឡើងក្នុងភោនីយដ្ឋានចំនួន៤ ក្នុងទីក្រុងភ្នំពេញ។
ការរៀបចំនេះត្រូវបានធ្វើឡើងក្នុងក្របខ័ណ្ឌនៃព្រឹត្តិការណ៍«សប្តាហ៍នៃរសជាតិបែបបារាំង» ដែលនឹងត្រូវប្រារព្ធធ្វើនៅជុំវិញពិភពលោក ដោយមានការចូលរួមពីមេចុងភៅជាង ១ពាន់ ៣រយនាក់និងបណ្តាស្ថានទូតបារាំងទាំងអស់។ ព្រឹត្តិការណ៍នេះ ត្រូវបានធ្វើឡើងដើម្បីអបអរ អាហារបារាំងដែលត្រូវបានចុះបញ្ជីបេតិកភណ្ឌអរូបិយពិភពលោករបស់អង្គការយូណេស្កូ។
លោកហ្សង់ក្លូដ ពាំបឺហ្វបានបន្តថា នៅកម្ពុជាកម្មវិធីនឹងត្រូវធ្វើឡើងក្នុងរយៈពេលមួយសប្តាហ៍ដោយរួមបញ្ជូលបន្ថែមនូវកម្មវិធីវប្បធម៌ និងពាណិជ្ជកម្ម ដែលបើកទូលាយឲ្យសាធារណៈជនទូទៅអាចចូលរួមបាននៅតាមទីតាំងមួយចំនួនដូចជា វិទ្យាស្ថានបារាំងនៅកម្ពុជា ហាង សណ្ឋាគារ និងភោជនីយដ្ឋានជាដើម។
ជាមួយគ្នានេះដែរ ប្រធានសភាពាណិជ្ជកម្មបារាំង-កម្ពុជាលោក Arnaud Darc ក៏បានបន្ថែមថា រហូតមកដល់នឹងពេលនេះ សភាពាណិជ្ជកម្មបារាំង-កម្ពុជាទទួលបានសមាជិកសហគ្រិនបារាំងនៅកម្ពុជាចំនួន១៥០នាក់ ហើយក្រុមហ៊ុនបារាំងទាំងអស់នៅកម្ពុជា ដែលរាប់បញ្ចូលទាំងការបណ្តាក់ទុនរួមគ្នាទាំង ក្រុមហ៊ុនតូច និងធំ គឺមានចំនួន២៥០ក្រុមហ៊ុន។ ហើយក្រុមហ៊ុនទាំងអស់នោះវិនិយោគទៅលើវិស័យសំណង់ ទឹកស្អាត ប្រេងឥនន្ទៈ គ្រឿងសំអាង និងថ្នាំពេទ្យជាដើម។
សូមបញ្ជាក់ថានៅក្នុងឆ្នាំ២០១៤ កម្ពុជានាំចូលផលិតផលពីប្រទេសបារាំងមានចំនួន ជិត ៧០លានអឺរ៉ូ កើនឡើងចំនួនជាង ១១% ធៀបនឹងឆ្នាំ ២០១៣។ផលិតផលដែលនាំចូលមកកម្ពុជាមានដូចជាថ្នាំពេទ្យ អាហារ ស្រា និងគ្រឿងសំអាងជាដើម។ ដោយឡែកកម្ពុជានាំចេញផលិតផលទៅកាន់ប្រទេសបារាំងមានទំហំទឹកប្រាក់ចំនួន ជិត៤០០លានអឺរ៉ូ កើនឡើងចំនួនជាង ៣៣% ធៀបនឹងឆ្នាំ ២០១៣។ ផលិតផលដែលកម្ពុជានាំចេញទៅកាន់ប្រទេសបារាំងរួមមានអង្ករ សម្លៀកបំពាក់ ស្បែកជើង ហើយនិងផលិតផលមួយចំនួនផ្សេងទៀត។ «សប្តាហ៍នៃរសជាតិបែបបារាំងនៅកម្ពុជា»គឺជាផ្នែកមួយនៃការបង្កើនទំនាក់ទំនងរវាងប្រជាជននិងប្រទេសទាំងពីរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ