អង្គការអន្តរជាតិមួយទាមទារឲ្យអាជ្ញាធរកម្ពុជាបង្ហាញរបាយការណ៍ស៊ើបអង្កេតករណីវាយអ្នកការពារសិទ្ធិមនុស្ស
អង្គការអន្តរជាតិ Frontline Defender ដែលមានមូលដ្ឋាននៅប្រទេសអ៊ែកឡង់ និងប៊ែលហ្ស៊ិក បានអំពាវនាវឲ្យអាជ្ញាធររដ្ឋាភិបាលកម្ពុជា បង្ហាញរបាយការណ៍ស៊ើបអង្កេតករណីវាយអ្នកការពារសិទ្ធិមនុស្សលោក អំ សំអាត និងលោក ចាន់ ពុទ្ធិស័ក សកម្មជនដីធ្លីតំបន់បឹងកក់។ អង្គការអន្តរជាតិមួយនេះ ក៏បានជម្រុញឲ្យរដ្ឋាភិបាល ធានាសុវត្ថិភាពរបស់ក្រុមអ្នកការពារសិទ្ធិមនុស្សនៅកម្ពុជាផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
តាមរយៈសេចក្តីថ្លែងការណ៍ចុះថ្ងៃទី ២០តុលា អង្គការអន្តរជាតិ Frontline Defender បានទាមទារ ៣ចំណុច។ ក្នុងចំណោមចំណុចសំខាន់ៗទាំង ៣នោះ អង្គការអន្តរជាតិ ដែលមានមូលដ្ឋាននៅប្រទេសអ៊ែកឡង់ និងប៊ែលហ្ស៊ិកនេះ បានទាមទារឲ្យអាជ្ញាធររដ្ឋាភិបាលកម្ពុជាបង្ហាញរបាយការណ៍ស៊ើបអង្កេតករណីវាយដុំលោក អំ សំអាត អ្នកគ្រប់គ្រងការិយាល័យស៊ើបអង្កេតនៃសម្ព័ន្ធខ្មែរជំរឿន និងការពារសិទ្ធិមនុស្ស លីកាដូ និងលោក ចាន់ ពុទ្ធិស័ក សកម្មជនដីធ្លីតំបន់បឹងកក់ កាលថ្ងៃទី ១០តុលា ក្នុងអំឡុងពេល ដែលពួកគេបានចូលរួមក្នុងយុទ្ធនាការហែក្បួន ក្នុងទិវាសិទ្ធិលំនៅដ្ឋានពិភពលោក។ ក្រៅពីនេះ អង្គការអន្តរជាតិមួយនេះ ក៏បានទាមទារឲ្យអាជ្ញាធររដ្ឋាភិបាល ធ្វើការរួមគ្នាជាមួយក្រុមអ្នកការពារសិទ្ធិមនុស្សនៅកម្ពុជា និងធានាសិទ្ធិសេរីភាពក្នុងការបំពេញការងាររបស់ពួកគេដោយគ្មានការភ័យខ្លាច។
អង្គការអន្តរជាតិមួយនេះ ក៏បានស្តីបន្ទោសថា ការបំពានលើរូបរាងកាយរបស់អ្នកការពារសិទ្ធិមនុស្សនេះ គឺជាការរំលោភលើសិទ្ធិ និងការបំពេញតួនាទីរបស់ពួកគេប្រកបដោយសន្តិភាព។
ប៉ុន្តែយ៉ាងណាក៏ដោយ លោក ខៀវ សុភ័ក្រ អ្នកនាំពាក្យក្រសួងមហាផ្ទៃបានច្រានចោលចំពោះការលើកឡើងនេះ។
គួរជម្រាបជូនថា ក្រោយរងការវាយដំពីកងកម្លាំងសន្តិសុខខណ្ឌដូនពេញ ដែលដឹកនាំដោយលោក ទឹម វុត្ថា ហៅ ជាម រដ្ឋា កាលពីថ្ងៃទី ១០តុលានោះ លោក អំ សំអាត អ្នកគ្រប់គ្រងការិយាល័យស៊ើបអង្កេតនៃសម្ព័ន្ធខ្មែរជំរឿន និងការពារសិទ្ធិមនុស្សលីកាដូ បានដាក់ពាក្យបណ្តឹងទៅកាន់ប៉ុស្តិ៍នគរបាលខណ្ឌ ជ័យជំនះ។ ប៉ុន្តែលោក អំ សំអាត បានអះអាងថា ចាប់តាំងពីលោកបានដាក់ពាក្យបណ្តឹងតាំងពីថ្ងៃទី ១០តុលា រហូតមកដល់ថ្ងៃទី ២៥តុលានេះ លោកមិនទាន់ត្រូវបានកោះហៅទៅសាកសួរបន្ថែមនោះទេ។
សូមបញ្ជាក់ថា អ្នកការពារសិទ្ធិមនុស្សលីកាដូ លោក អំ សំអាត និងលោក ចាន់ ពុទ្ធិស័ក បានរងអំពើហិង្សា កាលពីថ្ងៃទី ១០តុលា ចំពេលដែលអ្នករាយការណ៍ពិសេសអង្គការសហប្រជាជាតិទទួលបន្ទុកលើផ្នែកសិទ្ធិមនុស្សនៅកម្ពុជា លោកស្រី រ៉ូណា ស្មីត (Rohna Smith) ក៏កំពុងទស្សនកិច្ចនៅកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ