អ្នករាយការណ៍ពិសេសUN៖ រដ្ឋាភិបាលត្រូវតែទទួលខុសត្រូវចំពោះការអនុវត្តឲ្យបានពេញលេញនូវសិទ្ធិនិងសេរីភាព
អ្នករាយការណ៍ពិសេសរបស់អង្គការសហប្រជាជាតិប្រចាំកម្ពុជាលោកស្រី រ៉ូណា ស្មីត (Rohna Smith) បានបញ្ចប់ដំណើរទស្សនកិច្ចជាលើកទី ៣ នៅកម្ពុជាហើយ នៅល្ងាចថ្ងៃទី ១៩តុលានេះ។ ក្នុងរយៈពេលជិត ១០ថ្ងៃមកនេះ លោកស្រី បានជួបជាមួយមន្រ្តីជាន់ខ្ពស់រដ្ឋាភិបាល អង្គការសង្គមស៊ីវិល និងមន្រ្តីគណបក្សប្រឆាំងផងដែរ។ ប៉ុន្តែសេចក្តីថ្លែងការណ៍ ដែលមានកម្រាស់ ១០ទំព័រនេះ ភាគច្រើន គឺជាការណែនាំ និងផ្តល់អនុសាសន៍ជាជាងការស្តីបន្ទោស។
ចុះផ្សាយនៅថ្ងៃ៖
ស្តាប់ - ០៣:០៥
នៅក្នុងសេចក្តីថ្លែងការណ៍ ដែលមានកម្រាស់ជាង ១០ទំព័រ ហើយត្រូវបានថ្លែងនៅក្នុងសន្និសីទកាសែត ដោយលោកស្រី រ៉ូណា ស្មីត (Rohna Smith) អ្នករាយការណ៍ពិសេសរបស់រាយការណ៍ពិសេសអង្គការសហប្រជាជាតិទទួលបន្ទុកខាងសិទ្ធិមនុស្សប្រចាំនៅកម្ពុជា នៅល្ងាចថ្ងៃទី ១៩តុលានេះ ភាគច្រើន គឺជាការណែនាំ និងជាការផ្តល់អនុសាសន៍ ជាជាងការស្តីបន្ទោស។
ក្នុងចំណោមចំណុចសំខាន់ៗ ដែលត្រូវបានលើកឡើងនៅក្នុងសេចក្តីថ្លែងការណ៍នេះ លោកស្រីបានជម្រុញឲ្យរដ្ឋាភិបាលកម្ពុជាមានការកែលម្អលើបញ្ហាមួយចំនួន ពិសេសលើបញ្ហារបស់ក្រុមងាយរងគ្រោះ, ក្រុមជនជាតិដើមភាគតិច បញ្ហាជម្លោះដីធ្លី ដែលនៅតែជាបញ្ហាប្រឈមធំនៅកម្ពុជា។ លើបញ្ហាគោលការណ៍ច្បាប់ និងយុត្តិធម៌វិញ ត្រូវបានលោកស្រីស្មីត ជំរុញឲ្យក្រសួងយុត្តិធម៌ ពិចារណាតាក់តែងគោលការណ៍ណែនាំ ស្តីពី លក្ខខណ្ឌត្រូវនៃការបង្ហាញភស្តុតាង និងធានាថា ចៅក្រមទាំងអស់ត្រូវទទួលបានការបណ្តុះបណ្តាលលើបញ្ហានេះ និងផ្សព្វផ្សាយសំអាងហេតុផ្នែកច្បាប់ ដែលបានប្រើប្រាស់នៅក្នុងសំណុំរឿងក្តីនីមួយៗ។ លើបញ្ហាពន្ធនាគារវិញ លោកស្រីបានបង្ហាញការបារម្ភពីការផ្ទុកលើសចំនួននូវអ្នកទោសនៅក្នុងពន្ធនាគារ រួមទាំងការកើនឡើងនៃជនជាប់ឃុំបណ្តោះអាសន្ននៅក្នុងសំណុំរឿងជាច្រើន។ លើបញ្ហាបោះឆ្នោតវិញ លោកស្រីមិនបានលើកឡើងច្រើននោះទេ ដោយសារបច្ចុប្បន្ននេះ គឺស្ថិតនៅក្នុងដំណាក់កាលដែល គ.ជ.ប កំពុងដំណើរការចុះឈ្មោះបោះឆ្នោតថ្មី។ ប៉ុន្តែបានអំពាវនាវឲ្យមានការធានាសិទ្ធិបោះឆ្នោត និងសេរីភាពរបស់ប្រជាពលរដ្ឋ។
យ៉ាងណាក៏ដោយ នៅក្នុងសេចក្តីថ្លែងការណ៍បញ្ចប់ដំណើរទស្សនកិច្ចរយៈពេល ១០ថ្ងៃនៅកម្ពុជានេះ លោកស្រីក៏បានជំរុញឲ្យរដ្ឋាភិបាលត្រូវតែជួយគាំទ្រដល់ប្រជាជនកម្ពុជាគ្រប់រូប ក្នុងការធ្វើសកម្មភាពលើកស្ទួយ និងគោរពសិទ្ធិមនុស្សយ៉ាងហោចណាស់ ក៏អនុវត្តតាមច្បាប់ស្តីពី ការធ្វើបាតុកម្មដោយសន្តិវិធីដែរ។ លើសពីនេះលោកស្រី ក៏បានស្នើឲ្យក្រសួងយុត្តិធម៌ គួរតែពិចារណាលុបចោលបទល្មើសព្រហ្មទណ្ឌបរិហាកេរ្តិ៍ពិសេសមាត្រា ៣០៥ និង ៣០៦ និងការប្រមាថជាសាធារណៈ មាត្រា ៣០៧ចេញ ដែលជាបទល្មើសកំពុងត្រូវបានយកមកប្រើធ្វើជាសម្អាង ដើម្បីប្រឆាំងនឹងអ្នកការពារសិទ្ធិមនុស្ស។ ចំណែកលើបញ្ហាបរិយាកាសនយោបាយ ដែលទាក់ទងនឹងគណបក្សប្រឆាំងវិញ ក៏អ្នករាយការណ៍ពិសេសមិនបានលើកឡើងច្រើននោះដែរ ប៉ុន្តែបានយោងទៅលើសេចក្តីថ្លែងការណ៍ ដែលត្រូវបានលើកឡើងរួចមកហើយដោយក្រុមប្រទេសចំនួនជាង ៣០នៅក្នុងកិច្ចប្រជុំរបស់ក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីខែមុន។
បន្ទាប់ពីបញ្ចប់ដំណើរទស្សនកិច្ចនេះ លោកស្រីនឹងសរសេរជារបាយការណ៍នេះ ដាក់ទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិនៅខែកញ្ញាឆ្នាំ២០១៧ខាងមុខ។
នៅក្នុងដំណើរទស្សនកិច្ចនេះ លោកស្រីបានជួបជាមួយមន្រ្តីជាន់ខ្ពស់រដ្ឋាភិបាលកម្ពុជា មន្រ្តីអង្គការសង្គមស៊ីវិល ប្រធានស្តីទីគណបក្សប្រឆាំងលោក កឹម សុខា និងបានធ្វើដំណើរទៅកាន់ខេត្តកំពង់ស្ពឺ ទស្សនកិច្ចនៅពន្ធនាគារព្រៃស និងធ្វើដំណើរទៅកាន់មជ្ឈមណ្ឌលព្រៃស្ពឺ ដែលជាកន្លែងប្រមូលផ្តុំមនុស្សអនាថានៅតាមផ្លូវ។ ប៉ុន្តែក្នុងដំណើរទស្សនកិច្ចលើកនេះ លោកស្រីមិនបានជួបជាមួយលោកនាយករដ្ឋមន្រ្តី ហ៊ុន សែន នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ