រដ្ឋាភិបាលកម្ពុជាបដិសេធ ពីទំនាក់ទំនងជាមួយម្ចាស់ថ្មីកាសែតភ្នំពេញប៉ុស្តិ៍
រដ្ឋាភិបាលកម្ពុជាបានបដិសេធថា ខ្លួនមិនមានទំនាក់ទំនងអ្វីជាមួយថៅកែថ្មីរបស់កាសែតភ្នំពេញប៉ុស្តិ៍នោះទេ ខណៈដែលកាសែតពីរភាសានេះទើបតែបណ្តេញបុគ្គលិកជាន់ខ្ពស់មួយចំនួនក្រោមហេតុផលចេញផ្សាយព័ត៌មានខ្លួនឯងពីការលក់កាសែតវ័យចំណាស់ជាង២៥ឆ្នាំមួយនេះ។ ការបដិសេធនេះធ្វើឡើងបន្ទាប់ពីកាសែតភ្នំពេញប៉ុស្តិ៍បានចុះផ្សាយអត្ថបទរបស់ខ្លួនថា អ្នកវិនិយោគិនម៉ាឡេស៊ី ដែលទិញកាសែតនេះ មានទំនាក់ទំនងជាមួយលោកនាយករដ្ឋមន្រ្តី ហ៊ុន សែន។
ចុះផ្សាយនៅថ្ងៃ៖
ស្តាប់ - ០២:២១
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានបញ្ជាក់ប្រាប់វិទ្យុបារាំងអន្តរជាតិRFIថា បញ្ហាបណ្តេញបុគ្គលិករបស់កាសែតភ្នំពេញប៉ុស្តិ៍គឺជារឿងផ្ទៃក្នុងរបស់ស្ថាប័ននេះ។ ដោយបដិសេធថា រដ្ឋាភិបាលមិនមានទំនាក់ទំនងអ្វីជាមួយនឹងថៅកែថ្មីនៃកាសែតពីរភាសានេះផងនោះ លោក សុខ ឥសាន បានចាត់ទុកការបណ្តេញបុគ្គលិកភ្នំពេញប៉ុស្តិ៍ជាន់ខ្ពស់មួយចំនួនរបស់កាសែតនេះថា ជាសិទ្ធិរបស់ម្ចាស់លុយដោយសារតែបុគ្គលិកមិនស្តាប់បង្គាប់។
យ៉ាងណាក៏ដោយ ក្រុមបុគ្គលិកជាតិ និងអន្តរជាតិជាង២០នាក់ របស់កាសែតភ្នំពេញប៉ុស្តិ៍ បានចេញសេចក្តីថ្លែងការណ៍មួយកាលល្ងាចពីម្សិលមិញ ដោយថ្កោលទោសម្ចាស់ថ្មីនៃកាសែតពីរភាសានេះ ដែលបានបណ្ដេញនិពន្ធនាយករបស់ខ្លួនគឺលោក កៃ គឹមសុង ចេញពីការងារភ្លាមៗកាលពីថ្ងៃចន្ទ។ សេចក្ដីថ្លែងការណ៍ដែលនាំមុខដោយបុគ្គលិកបរទេសនេះ បានលើកឡើងទៀតថា បុគ្គលិកជាច្រើននាក់ បានលាលែងចេញពីការងារនៅកាសែតភ្នំពេញប៉ុស្តិ៍នេះរួចទៅហើយ ដើម្បីតវ៉ាប្រឆាំងនឹងការបណ្ដេញចេញនេះ។
ការបណ្ដេញបុគ្គលិកជាន់ខ្ពស់ដែលភាគច្រើនជាជនបរទេសនេះកើតឡើង បន្ទាប់ពីអ្នកយកព័ត៌មានពីរនាក់នៃកាសែតនេះ គឺលោក Brendan O'Byrne និងលោក Ananth Baliga បានសរសេរអត្ថបទមួយអំពីការលក់កាសែតនេះ ទៅឱ្យអ្នកវិនិយោគម៉ាឡេស៊ី លោក Sivakumar S. Ganapathy។ ក្នុងអត្ថបទនោះ ក៏បានបង្ហាញព័ត៌មានអំពីទំនាក់ទំនងដែលអាចមានរវាងម្ចាស់ថ្មីនៃកាសែតនេះ ទៅនឹងមន្ត្រីជាន់ខ្ពស់រដ្ឋាភិបាលកម្ពុជា និងលោកនាយករដ្ឋមន្ត្រី ហ៊ុន សែន ផងដែរ។
ចំណែក អង្គការអ្នកកាសែតគ្មានព្រំដែន បានចាត់ទុកវិវាទនៅកាសែតភ្នំពេញប៉ុស្តិ៍នាពេលនេះថា«ជាការវាយប្រហារចុងក្រោយទៅលើសេរីភាពសារព័ត៌មាននៅកម្ពុជា បន្ទាប់ពីកាសែតភាសាអង់គ្លេសដែលត្រូវបានគេចាត់ទុកថាមានជំហរឯករាជ្យនេះ ត្រូវបានលក់ទៅឱ្យអ្នកជំនួញជនជាតិម៉ាឡេស៊ីម្នាក់ ដែលមានទំនាក់ទំនងនឹងនាយករដ្ឋមន្រ្តី»។
កាសែតភ្នំពេញប៉ុស្តិ៍នេះ ត្រូវបានសារព័ត៌មានបរទេសមួយចុះផ្សាយនាពេលថ្មីៗនេះថា កំពុងស្ថិតនៅក្រោមការស៊ើបអង្កេតផ្នែកពន្ធពីសំណាក់រដ្ឋាភិបាលកម្ពុជា និងប្រឈមមុខនឹងការពិន័យពន្ធមានតម្លៃ ៣.៩លានដុល្លារ ជុំវិញការខកខានមិនបានរាយការណ៍អំពីការផ្ទេរប្រាក់ ២.៥លានដុល្លារពីអូស្ត្រាលីកាលពីឆ្នាំមុន ចាក់បញ្ចូលក្នុងគណនីសារព័ត៌មានមួយនេះ។
សេរីភាពសារព័ត៌មាននៅកម្ពុជា ត្រូវបានអង្គការអ្នកកាសែតគ្មានព្រំដែនវាយតម្លៃថា បានធ្លាក់ចុះមកនៅលំដាប់លេខរៀងទី១៤២ ក្នុងចំណោមប្រទេស១៨០ លើពិភពលោក ពោលគឺថយចុះចំនួន១០ថ្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ