និពន្ធនាយក និងអ្នកកាសែតបរទេស២នាក់ផ្សេងទៀត ត្រូវបានបញ្ឈប់ពីការងារដោយថៅកែថ្មី
លោក កៃ គឹមសុង និពន្ធនាយកកាសែតភ្នំពេញប៉ុស្តិ៍ ត្រូវបានម្ចាស់កាសែតថ្មីជនជាតិម៉ាឡេស៊ី បញ្ឈប់ពីការងារចាប់ពីថ្ងៃនេះទៅ។ លោក កៃ គឹមសុង ដែលបម្រើការងារ នៅក្នុងកាសែតនេះ រយៈពេល១០ឆ្នាំ បានថ្លែងថាម្ចាស់គ្រប់គ្រងថ្មី បញ្ឈប់រូបលោក ដោយលើកមូលហេតុថា លោកបានធ្វើកំហុសធំមួយ ដោយបានអនុញ្ញាតឲ្យកាសែតមួយនេះ ចេញផ្សាយនៅលើទំព័រមុខ នូវអត្ថបទ ស្តីពីការផ្លាស់ប្តូរ ម្ចាស់ក្រុមហ៊ុន Post Media។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
បន្ទាប់ពីការប្រកាសបញ្ឈប់ពីការងារលោកកៃ គឹមសុង ថ្លែងប្រាប់វិទ្យុ RFI យ៉ាងខ្លីថាលោកមិនធ្វើអត្ថាធិប្បាយអ្វីទេ ហើយការសម្រេចនេះក៏មិនមានការសម្របសម្រួលណាមួយដែរជាមួយអ្នកគ្រប់គ្រងថ្មីរបស់ក្រុមហ៊ុន Post Media។ ភ្លាមៗសហការីអ្នកសារព័ត៌មានភ្នំពេញប៉ុស្តិ៍ ក៏បានធ្វើការជួបជុំគ្នាដែរ ដើម្បីសម្តែងការមិនសប្បាយចិត្តចំពោះការបណ្តេញនិពន្ធនិយករបស់ពួកគេចេញពីការងារ។
ទាក់ទងទៅនឹងការបញ្ឈប់ លោកកៃ គឹមសុង ដូច្នេះម្ចាស់កាសែតភ្នំពេញប៉ុស្តិ៍ថ្មីជនជាតិម៉ាឡេស៊ី លោក SIVAKUMAR Ganapathy បានសរសេរនៅក្នុងសេចក្តីថ្លែងការណ៍របស់ខ្លួននៅថ្ងៃទី៦ឧសភាថា ការចុះផ្សាយអត្ថបទស្តីពីការដូរការកាន់កាប់កាសែតនេះ គឺជារឿងដ៏អាម៉ាស់និងជាការប្រមាថដល់កាសែតដែលអះអាងថាខ្លួនឯករាជ្យមួយនេះ។ បន្ថែមពីនេះ ម្ចាស់កាសែតថ្មីបញ្ជាក់ដែរថា ទង្វើរនេះ គឺវាលើសព្រំដែនរបស់កាសែត ដែលជាការរំលោភធ្ងន់ធ្ងរ ចំពោះបទបញ្ជាផ្ទៃក្នុងនិងគោលការណ៍ទិញ លក់ និងកាន់កាប់ កាសែតភ្នំពេញប៉ុស្តិ៍នេះ។ លិខិតលោក SIVAKUMAR ក៏បានបញ្ជាក់ផងដែរ ពីការបញ្ឈប់អ្នកកាសែតបរទេស២នាក់ផ្សេងទៀតគឺលោក Brendan O’Byrne និងលោកAnanth Baliga។
ជាមួយគ្នានេះ លោក Brendan O’Byrne និងលោក Ananth Baliga ជាអ្នកសារព័ត៌មានជាន់ខ្ពស់នៃកាសែតភ្នំពេញប៉ុស្តិ៍ ដែលបានចុះផ្សាយព័ត៌មានស្តីពីការដូរថៅកែកាសែត បានសរសេរនៅលើទំព័រ Twitter ដែរថា ពួកគេទាំង២ បានលាឈប់ពីស្ថាប័នកាសែតមួយនេះ បន្ទាប់ពីពួកគេត្រូវបានប្រាប់ឲ្យលុបចោលព័ត៌មានពីប្រព័ន្ធអនឡាញ រឿងការលក់ដូរ Post Media ទៅថៅកែថ្មី។
សូមរំលឹកថា កាលពីពេលកន្លងទៅនេះ កាសែតភ្នំពេញ ប៉ុស្តិ៍ បានផ្ទុះឡើងនូវវិវាទការងារជាបន្តបន្ទាប់ ក្នុងនោះកាសែតក៏បានប្រឈមមុខនឹងបញ្ហាជំពាក់ពន្ធរដ្ឋផងដែរ ដែលនេះបានកើតឡើង បន្ទាប់ពីកាសែតជាភាសាអង់គ្លេសមួយទៀត The Cambodia Daily បានប្រកាសបិទដំណើរការរបស់ខ្លួនកាលពីខែកញ្ញាឆ្នាំទៅ ដោយមូលហេតុជំពាក់ពន្ធរដ្ឋចំនួនជាង៦លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ