កម្ពុជាសង់មជ្ឈមណ្ឌលតម្លៃជាង២លានដុល្លារសម្រាប់រក្សាទុកឯកសារកាត់ទោសមេដឹកនាំខ្មែរក្រហម
នៅព្រឹកមិញនេះ លោកប៊ិន ឈិន រដ្ឋមន្ត្រីស្តីទីទទួលបន្ទុកទីស្តីការតគណៈរដ្ឋមន្ត្រីកម្ពុជាជាមួយតំណាងទូតនានានិងចៅក្រម ព្រះរាជអាជ្ញានៃសាលាក្តីខ្មែរក្រហមផង បានបើកសម្ពោធមជ្ឈមណ្ឌលតម្កល់ឯកសារច្បាប់ពាក់ព័ន្ធនឹងអង្គជំនុំជម្រះវិសាមញ្ញក្នុងតុលាការកម្ពុជា។ មជ្ឃមណ្ឌលនេះត្រូវបានសាងសង់ឡើងដោយចំណាយទឹកប្រាក់ជាង២លានដុល្លារក្នុងគោលបំណងសំខាន់រក្សាទុកនូវឯកសារផ្លូវច្បាប់ក៏ដូចជាសាលដីការកាត់ទោសលើបណ្តាមេដឹកនាំខ្មែរក្រហម។
ចុះផ្សាយនៅថ្ងៃ៖
ស្តាប់ - ០២:១៦
បើទោះបីជាទើបបានបើកសម្ពោធនៅពេលនេះក្តី ក៏ប៉ុន្តែមជ្ឈមណ្ឌលតម្កល់ឯកសារច្បាប់ពាក់ព័ន្ធនឹងអង្គជំនុំជម្រះវិសាមញ្ញក្នុងតុលាការកម្ពុជាបានផ្ទុកនូវឯកសារពាក់ព័ន្ធនឹងសំណុំរឿង០០១របស់លោកកាំង ហ្គេចអ៊ាវហៅឌុច អតីតប្រធានគុកទួលស្លែងទាំងឯកសារបោះពុម្ភជាក្រដាស(Hard Copy) និងជាទម្រង់អេឡិចត្រូនិច(Soft Copy) ចំនួន៧ម៉ឺន៧រយ២៥ទំព័រ(៧០.៧២៥)ហើយ។ ឯកសារទាំងនេះ មានបីភាសា គឺភាសាខ្មែរ បារាំង និងអង់គ្លេស។ នេះបើតាមការបង្ហាញឲ្យដឹងរបស់លោកស្រីជា សាវ៉ុន ដែលជាប្រធានមជ្ឈមណ្ឌលតម្កល់ឯកសារច្បាប់នេះ។ បន្ថែមលើនេះ មជ្ឈមណ្ឌលក៏មានឯកសារជាប្រភេទសៀវភៅ ទស្សនាវដ្តី អត្ថបទសារព័ត៌មាន និងជាវីដេអូដែលនិយាយពាក់ព័ន្ធនឹងសាលាក្តីនិងសម័យកម្ពុជាប្រជាធិបតេយ្យ។
ក្រៅពីសំណុំរឿង០០១ មជ្ឈមណ្ឌលតម្កល់ឯកសារច្បាប់នេះក៏នឹងដាក់តម្កល់ទុកនូវឯកសារពាកព័ន្ធនឹងសំណុំរឿង០០២,០០៣ និង០០៤ទៀតដែលសាលាក្តីខ្មែរក្រហមកំពុង និងគ្រោងបើកការជំនុំជម្រះផងដែរ។ ទាំងនេះ គឺជាសក្ខីភាពក្នុងការផ្តល់កំណើតបង្កើតចេញជាមជ្ឈមណ្ឌលនេះឡើង។ បើតាមលោកប៊ិន ឈិន ដែលជារដ្ឋមន្ត្រីស្តីទីទទួលបន្ទុកទីស្តីការគណៈរដ្ឋមន្ត្រីកម្ពុជា ការបង្កើតមជ្ឈមណ្ឌលនេះឡើងក៏ដើម្បីត្រៀមការរលាយដោយខ្លួនឯងរបស់សាលាក្តីខ្មែរក្រហម បន្ទាប់ពីកាត់ទោសមេដឹកនាំខ្មែរក្រហមចប់។ លោកប៊ិន ឈិន អះអាងដូច្នេះដោយផ្អែកទៅលើច្បាប់ស្តីពីការបង្កើតឲ្យមានអង្គជំនុំជម្រះវិសាមញ្ញក្នុងតុលាការកម្ពុជាដែលបានចែងថា អង្គជំនុំជម្រះនេះត្រូវរលាយខ្លួនជាស្វ័យប្រវត្តិក្រោយពេលដែលការវិនិច្ឆ័យទោសក្នុងរឿងក្តីនេះបានចប់ជាស្ថាពរ។
យ៉ាងណាក៏ដោយចុះ មជ្ឈមណ្ឌលតម្កល់ឯកសារថ្មីនេះ នឹងក្លាយជាបណ្ណាល័យដ៏មានតម្លៃមួយសម្រាប់សាធារណជនក៏ដូចជាអ្នកសិក្សាស្រាវជ្រាវជាតិ និងអន្តរជាតិមកសិក្សាស្វែងយល់អំពីការការងារពាក់ព័ន្ធនឹងការកាត់សេចក្តីអតីតមេដឹកនាំជាន់ខ្ពស់ខ្មែរក្រហម។ មជ្ឈមណ្ឌលតម្កល់ឯកសារច្បាប់ពាក់ព័ន្ធនឹងអង្គជំនុំជម្រះវិសាមញ្ញក្នុងតុលាការកម្ពុជា ត្រូវបានសាងសង់ឡើងលើផ្ទៃដីទំហំ៣.៩១៥ម៉ែត្រការ៉េ និងមានកម្ពស់បួនជាន់បូករួមទាំងជាន់ផ្ទាល់ដី។ មជ្ឈមណ្ឌលតម្កល់ឯកសារច្បាប់នេះ ស្ថិតនៅជិតសាកលវិទ្យាល័យភូមិន្ទវិចិត្រសិល្បៈ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ