ក្រសួងអប់រំ នឹងបើកបង្រៀនប្រវត្តិសាស្ត្រខ្មែរក្រហម ចាប់ពីមធ្យមសិក្សាដល់មហាវិទ្យាល័យឆ្នាំមូលដ្ឋាន!
ថ្មីៗនេះ ក្រសួងអប់រំ និងមជ្ឈមណ្ឌលឯកសារកម្ពុជា បានចុះកិច្ចព្រមព្រៀងជាមួយគ្នា ដើម្បីបង្រៀនពី ប្រវត្តិសាស្ត្រខ្មែរក្រហម សម្រាប់គ្រូមធ្យមសិក្សា គរុនិស្សិត និងសាស្ត្រាចារ្យនៅមហាវិទ្យាល័យ ថ្នាក់ឆ្នាំមូលដ្ឋាន។ គម្រោងនេះ មានរយៈពេល ៥ឆ្នាំ ចាប់ពីឆ្នាំ ២០១៨ ដល់ទៅ ២០២២។ ការបង្រៀនប្រវត្តិសាស្ត្រខ្មែរក្រហមនេះ គឺក្នុងគោលដៅបង្កើនការគិតស៊ីជម្រៅពីការកសាងសន្តិភាព និង ការផ្សះផ្សាគ្នាក្នុងសង្គមខ្មែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
សម្រាប់ ៥ឆ្នាំទៅមុខទៀត ក្រសួងអប់រំ និងមជ្ឈមណ្ឌលឯកសារកម្ពុជា នឹងសហការគ្នា ផ្តល់ការអប់រំពីប្រវត្តិសាស្ត្រកម្ពុជាប្រជាធិបតេយ្យ ឬប្រវត្តិសាស្ត្រខ្មែរក្រហម ចន្លោះឆ្នាំ ១៩៧៥ ដល់១៩៧៩។ នេះគឺជាការបណ្តុះបណ្តាលសម្រាប់គ្រូបង្រៀនគ្រប់សាលាមធ្យមសិក្សា មណ្ឌមណ្ឌលគរុកោសល្យ ទាំង៦ភូមិភាគ នៅវិទ្យាស្ថានជាតិអប់រំ និងមហាវិទ្យាល័យ ទាំងរដ្ឋនិងឯកជន ថ្នាក់ឆ្នាំមូលដ្ឋាន ទាំងអស់។ សូមជ្រាបថា កន្លងមក គឺមានការបំប៉នគ្រូបង្រៀន ចំនួនជាង ២ពាន់ ៨រយ នាក់រួចមកហើយ។
ចំពោះការអនុវត្តគម្រោងបន្តទៀតនេះ គឺនឹងមានការបណ្តុះបណ្តាលគ្រូបង្រៀនថ្នាក់មធ្យមសិក្សាបន្ថែម ចាប់ពីថ្នាក់ទី ៧ឡើងទៅ, រៀបចំការជួបជុំជជែកពិភាក្សាគ្រូឧទេសថ្នាក់ជាតិនិងថ្នាក់ខេត្ត, ពង្រឹងសមត្ថភាពគ្រូចំពោះការស្រាវជ្រាវ ចងក្រង និងបង្រៀនប្រវត្តិសាស្ត្រខ្មែរក្រហម ឲ្យកាន់តែល្អប្រសើរឡើង។
ក្រៅពីនេះ គឺមាននឹងមានការបោះពុម្ពសៀវភៅប្រវត្តិសាស្ត្រខ្មែរក្រហម ការចែកសៀវភៅជាក្រដាស និងជាទម្រង់ Digital ដែលកន្លងមក គឺមជ្ឈមណ្ឌលឯកសារកម្ពុជា បានចែកផ្សាយអស់ជាងកន្លះលានច្បាប់រួចមកហើយ។ ក៏នឹងមានដែរ ការដាក់បដាតាមសាលារៀនពន្យល់ពីការផ្សះផ្សា និងបង្ការទប់ស្កាត់អំពើប្រល័យពូជសាសន៍, ធ្វើវេទិកាជជែកគ្នាតាមថ្នាក់រៀន និងប្រមូលចងក្រងសាច់រឿងស្តីពីខ្មែរក្រហម នៅតាមភូមិ។ ជាមួយគ្នា វេទិកាសាធារណៈ ស្តីពីការចងចាំប្រវត្តិសាស្ត្រកម្ពុជាប្រជាធិបតេយ្យ ក៏នឹងត្រូវរៀបចំ នៅតាមសហគមន៍ដាច់ស្រយាល ពិសេសក្នុងដែនដី ជាតំបន់ចុងក្រោយរបស់ខ្មែរក្រហម។
ក្រសួងអប់រំ និងមជ្ឈមណ្ឌលឯកសារកម្ពុជា ពន្យល់ថា សកម្មភាពទាំងអស់នេះ គឺស្តែងឲ្យឃើញពីទំនាក់ទំនងរវាងសាលារៀននិងសហគមន៍ ហើយភ្ជាប់ទំនាក់ទំនងពីអ្នកកើតមុន និងកើតក្រោយរបបខ្មែរក្រហម ដែលនេះ គឺជាវិធីសាស្ត្រព្យាបាលរបួសផ្លូវចិត្តមួយផងដែរ សម្រាប់ជនរងគ្រោះក្នុងរបបខ្មែរក្រហម។
ក្រសួងអប់រំ និងមជ្ឈមណ្ឌលឯកសារកម្ពុជា សង្ឃឹមថា គម្រោងនេះនឹងធ្វើឲ្យសិស្សនិស្សិតក្នុងទូទាំងប្រទេស ទទួលបានចំណេះដឹង និងការយល់ដឹងពីប្រវត្តិសាស្ត្រ កាន់តែសុក្រឹត។ ទន្ទឹមនេះ គឺអប់រំបណ្តុះឥរិយាបថយុវជនជាន់ក្រោយ ឲ្យពួកគេមានការអត់ឱន យោគយល់ អធ្យាស្រ័យគ្នា និងចេះផ្សះផ្សាគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ