រដ្ឋាភិបាលចេញអនុក្រឹត្យផាកពិន័យចំពោះការគ្រប់គ្រងសំរាមមិនបានត្រឹមត្រូវ
កាលពីថ្ងៃទី២៧សីហា ឆ្នាំ២០១៥ រដ្ឋាភិបាលបានចេញអនុក្រឹត្យស្តីពីការគ្រប់គ្រងសំរាម សំណល់រឹងក្នុងទីប្រជុំជន ដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន ។ អនុក្រឹត្យនេះមានគោលបំណងចង់ឲ្យម្ចាស់សម្រាមអនុវត្តការបែងចែកសំរាម និងវេចខ្ចប់ឲ្យបានត្រឹមត្រូវតាមសំណល់រឹងដែលអាចប្រើប្រាស់ឡើងវិញ ឬ កែច្នៃបានខុសពីសំរាមសំណល់រឹងដែលត្រូវបោះចោល តាមការណែនាំពី រដ្ឋបាល ក្រុង ស្រុក ខណ្ឌ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
រដ្ឋាភិបាលបានចេញអនុក្រឹត្យមួយស្តីពីការគ្រប់គ្រងកាកសំណល់រឹងទីប្រជុំជន។ អនុក្រឹត្យនេះធ្វើឡើង ដើម្បីទប់ស្កាត់ការកើនឡើងនៃសំរាមរឹងក្នុងទីប្រជុំជន និងដើម្បីធានាបាននូវសោភ័ណភាព កិច្ចគាំពារសុខភាពសារធារណៈ ព្រមទាំងចាត់វិធានការចំពោះម្ចាស់ផ្ទះ និងអាជីករ ឬសហគ្រាសផ្សេងៗដែលគ្រប់គ្រងសំរាមមិនបានត្រឹមត្រូវតាមការណែនាំរបស់រដ្ឋបាល ក្រុង ស្រុក ខណ្ឌ។
ក្នុងអនុក្រឹត្យដែលបានចុះកាលពីថ្ងៃទី២៧ សីហា ឆ្នាំ២០១៥ នោះក៏បានជម្រុញឲ្យសហគ្រាស ក្រុមហ៊ុន រោងចក្រ និងអ្នកពាក់ព័ន្ធទាំងអស់មានការអនុវត្តនិងទទួលខុសត្រូវលើការវេចខ្ចប់សំរាមរបស់ខ្លួនឲ្យបានត្រឹមត្រូវ ដោយមិនត្រូវដាក់លាយឡំគ្នា រវាងសំណល់រឹងដែលអាចយកមកកែច្នៃឡើយ។ មិនតែប៉ុណ្ណោះហាមដាច់ខាតមិនត្រូវដុត ឬបោះចោលសំរាមទាំងនោះពាសវាលពាសកាលដោយគ្មានការវេចខ្ចប់ត្រឹមត្រូវឡើយ។
គួរជម្រាបជូនផងដែរថាសម្រាប់បុគ្គល និង សហគ្រាស រោងចក្រ ក្រុមហ៊ុនផ្សេងៗ ដែលបោះចោលសំរាម សំណល់រឹងទីប្រជុំជននៅលើទីសាធារណៈ និងតាមដងផ្លូវ ឬ ទីកន្លែងដែលរដ្ឋបាលរាជធានី ក្រុង ស្រុក ខណ្ឌហាមឃាត់ នឹងត្រូវទទួលការផាកពិន័យចន្លោះពី ២ម៉ឺនរៀល ទៅ ៤សែនរៀល។
លោក សេង សាវី ប្រធានក្រុមហ៊ុនស៊ីនទ្រីបានឲ្យដឹងថា លោក រងចាំអនុក្រឹត្យនេះយូរហើយ ព្រោះថាវាអាចជួយសម្រួលដល់ការងារប្រមូលសំរាមរបស់ក្រុមហ៊ុនច្រើន។ ដោយហេតុថា វាជាច្បាប់ដែលអាចធ្វើការផាកពិន័យដល់បុគ្គលដែលចោលសំរាមគ្មានសណ្តាប់ធ្នាប់ ពោលគឺអនុក្រឹត្យនេះអាចឲ្យការពួកគេអនុវត្តការគ្រប់គ្រងសំរាមប្រកបដោយប្រសិទ្ធភាព។
ជាការកត់សម្គាល់កន្លងទៅសាលាក្រុងរាជធានីភ្នំពេញក៏បានចេញច្បាប់ផាកពិន័យពី ១០ម៉ឺនរៀលឡើងទៅ ចំពោះបុគ្គលណាដែលបោះចោលកាកសំណល់ សំរាមខុសច្បាប់តាមទីសាធារណៈផងដែរ។ ក៏ប៉ុន្តែ ការអនុវត្តនោះ ហាក់ដូចជាមិនមានប្រសិទ្ធភាព។
សូមបញ្ជាក់ជូនថា បច្ចុប្បន្នសំរាមនៅក្រុងភ្នំពេញបានកើនឡើងប្រមាណជាង ២ពាន់តោនក្នុងមួយថ្ងៃ។ ហើយកំណើននៃសំរាមនេះក៏ជាការប្រឈមមួយដល់អាជ្ញាធរ ទាក់ទងទៅនឹងអនាម័យ សោភ័ណ្ឌភាព និងជាមូលហេតុដែលនាំឲ្យមានការស្ទះលូផងដែរ៕
អត្តបទដោយ៖ ចាន់ ជីវ៉ា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ