ក្រសួងសុខាភិបាលសន្យាជួយដល់អ្នកភូមិរកាដែលផ្ទុកមេរោគអេដស៍ដោយយកចិត្តទុកដាក់
អាជ្ញាធរមានសមត្ថកិច្ចនៃក្រសួងសុខាភិបាល បានបញ្ជាក់ថា ការងារថែទាំនិងព្យាបាលប្រជាជននៅភូមិរកា ជាកន្លែងដែលអ្នកភូមិជាង ២០០នាក់បានឆ្លងមេរោគអេដស៍ ត្រូវបានយកចិត្តទុកដាក់មិនបោះបង់ចោលឡើង។ ប្រធានមជ្ឈមណ្ឌលជាតិប្រយុទ្ធនឹងជម្ងឺអេដស៍ សើស្បែកនិងកាមរោគ លោក វេជ្ជបណ្ឌិត មាន ឈីវុន បានបញ្ជាក់ថា ក្រុមគ្រូពេទ្យជំនាញ របស់ក្រសួងរួមនឹងអង្គការជំនួយផ្នែកសេវាព្យាបាលនិងថែទាំជំងឺអេដស៍នៅភ្នំពេញ បានដាក់វេនគ្នាទៅភូមិរការជារៀងរាល់សប្តាហ៍ ដើម្បីផ្តល់ការព្យាបាលដល់អ្នកភូមិយ៉ាងយកចិត្តទុកដាក់។
ចុះផ្សាយនៅថ្ងៃ៖
ស្តាប់ - ០១:៥៦
ប្រជាពលរដ្ឋនៅភូមិរកាខេត្តបាត់ដំបងដែលរកឃើញថា បានឆ្លងមេរោគអេដស៍ជាង២០០នាក់ នៅពេលនេះត្រូវបានមន្ត្រីសុខាភិបាលអះអាងថា កំពុងតែទទួលបានការយកចិត្តទុកដាក់យ៉ាងកក់ក្តៅពីអាជ្ញាធរមានសមត្ថកិច្ច។
លោក វេជ្ជបណ្ឌិត មាន ឈីវុន ប្រធានមជ្ឈមណ្ឌលជាតិប្រយុទ្ធនឹងជម្ងឺអេដស៍ សើស្បែកនិងកាមរោគ បានប្រាប់វិទ្យុបារាំងអន្តរជាតិ RFI នៅថ្ងៃសៅរ៍នេះថា ក្រសួងសុខាភិបាលបានដាក់មណ្ឌលសុខភាពភូមិរកាទៅជាសេវាសុខភាពរណបផ្ទាល់ពីមន្ទីរពេទ្យបង្អែកខេត្តបាត់ដំបងមួយទៀតបន្ថែមពីលើសេវាព្យាបាលមេរោគអេដស៍ចំនួន៥កន្លែងនៅខេត្តបាត់ដំបង។
ការរៀបចំសេវាសុខភាពរណបនៅមណ្ឌលសុខភាពទួលរកានេះ បានធ្វើឡើងបន្ទាប់ពីការរកឃើញថាមានការឆ្លងជម្ងឺអេដស៍ ដ៏រាលដាល ហើយគ្រូពេទ្យភូមិមួយរូបបានជាប់ឃុំដោយ
សារជាដើមហេតុនៃការឆ្លងនេះ កាលពីខែធ្នូកន្លងទៅនេះ។
លោកវេជ្ជបណ្ឌិត មាន ឈីវុន បន្តថាក្រុមគ្រូពេទ្យនៃមូលនិធិថែទាំជម្ងឺអេដស៍សហរដ្ឋអាមេរិក មន្ទីរពេទ្យមិត្តភាពខ្មែរ-សូវៀត មន្ទីរពេទ្យព្រះសីហនុ មណ្ឌលនៃក្តីសង្ឃឹម ត្រូវផ្លាស់ប្តូរវេនគ្នាជារៀងរាល់សប្តាហ៍រយៈពេល៦ខែ ទៅកាន់មណ្ឌលសុខភាពរកា ដើម្បីជួយថែទាំងនិងព្យាបាលសុខភាពអ្នកជម្ងឺ និងបង្ហាត់បង្រៀនបុគ្គលិកពេទ្យបាត់ដំបងផងដែរ។
លើសពីនេះក្រសួងសុខាភិបាលបានសង់អាគារកម្ពស់២ជាន់នៅភូមិរកាផងដែរ ដើម្បីជាកន្លែងទទួលការព្យាបាល និងជាកន្លែងស្នាក់នៅរបស់ក្រុមគ្រូពេទ្យដែលចុះទៅធ្វើការផ្ទាល់ជាមួយប្រជាជននៅទីនោះ។
សូមបញ្ជាក់ថាប្រជាពលរដ្ឋនៅឃុំរកាភូមិរកានៃខេត្តបាត់ដំបង បានឆ្លងមេរោគអេដស៍កាលពីចុងឆ្នាំ២០១៤ កន្លងទៅនេះធ្វើឲ្យមានការភ្ញាក់ផ្អើលជាទូទៅ។ហេតុការណ៍នេះធ្វើឲ្យគ្រូពេទ្យភូមិម្នាក់រងការចោទប្រកាន់ថា បានព្យាបាលអ្នកភូមិដោយការចាក់ម្ជុលនិងប្រើទុយោសេរ៉ូមរួមគ្នា។
ទោះជាយ៉ាងនេះក្តីសំណាកឈាមអ្នកភូមិ ដែលបានបញ្ជូនទៅធ្វើតេស្តនៅក្រៅប្រទេសនៅមិនទាន់បង្ហាញពីលទ្ធផលចុងក្រោយយ៉ាងណានៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ