របាយការណ៍ Human Right Watch៖ មានការធ្វើទុក្ខបុកម្នេញខ្លាំងនៅកម្ពុជា ពីសំណាក់បក្សកាន់អំណាច ក្នុងឆ្នាំ២០១៦
អង្គការឃ្លាំមើលសិទ្ធិមនុស្សកាលពីម្សិលមិញ បានចេញរបាយការណ៍ប្រចាំឆ្នាំ២០១៦ របស់ខ្លួនស្តីពីស្ថានភាពសិទ្ធិមនុស្សនៅកម្ពុជា។ Human Right Watch បានរិះគន់គណបក្សកាន់អំណាចថាបានបង្កើនការធ្វើទុក្ខបុកម្នេញទៅលើ សកម្មជនបក្សប្រឆាំង ក្នុងគោលបំណងរារាំង គណបក្សនេះមិនឱ្យឈ្នះឆ្នោត ក្នុងការបោះឆ្នោតឃុំសង្កាត់ និងការបោះឆ្នោតជាតិ ដែលគ្រោងធ្វើនៅឆ្នាំ ២០១៧ និងឆ្នាំ ២០១៨។ ហើយក្នុងនោះក៏រួមមានទាំងការដោះស្រាយក្នុងករណីឃាតកម្មលើលោក កែម ឡី ផងដែរ។ ប៉ុន្តែជុំវិញរបាយការណ៍នេះ អ្នកនាំពាក្យរដ្ឋាភិបាលបានទាត់ចោល។
ចុះផ្សាយនៅថ្ងៃ៖
Human Right Watch បានចេញរបាយការណ៍ប្រចាំឆ្នាំរបស់ខ្លួន ស្តីពីស្ថានភាពសិទ្ធិមនុស្សក្នុងប្រទេសជាង ៩០នៅលើពិភពលោក។ ក្នុងនោះក៏រួមមានស្ថានភាពសិទ្ធិមនុស្សនៅកម្ពុជាផងដែរ។ អង្គការអន្តរជាតិមួយនេះ បានលើកឡើងថាឆ្នាំ ២០១៦ គឺជាឆ្នាំ ដែលប្រទេសកម្ពុជានៅតែមាន ការរំលោភបំពានសិទ្ធិមនុស្សជាថ្មីម្តងទៀត។ ពិសេសការធ្វើទុកបុកម្នេញពី សំណាក់គណបក្សកាន់អំណាច។ ហើយរយៈពេលបីទសវត្សរ៍ក្នុងរបបគ្រប់គ្រងរបស់លោក នាយករដ្ឋមន្ត្រីហ៊ុន សែន សិទ្ធិមនុស្សនៅកម្ពុជាជាប់ក្នុងកំណត់ត្រាមិនល្អ។
របាយការណ៍បានសង្កត់ធ្ងន់ទៅលើ ករណីឃាតកម្មលើលោក កែម ឡី ដែលប្រព្រឹត្តនៅ កណ្តាលថ្ងៃ កាលពីខែកក្កដា ដោយជនឈ្មោះ ជួប សម្លាប់ ថាជាការខ្វះកិច្ចខិតខំប្រឹងប្រែងក្នុងការដោះស្រាយករណីនេះ។ បើទោះបីជាខ្មាន់កាំភ្លើងម្នាក់នោះបានអះអាងថា ការបាញ់សម្លាប់ លោក កែម ឡី ដោយសារតែរឿងជំពាក់លុយមិនសងក៏ដោយ ក៏មនុស្សជាច្រើនជឿថាការសម្លាប់នេះ គឺជាការរៀបចំទុកជាមុន។ ហើយរហូតមកទល់ពេលនេះ ការស៊ើបអង្កេតករណីឃាតកម្មលើអ្នកវិភាគសង្គមរូបនេះ ស្ថិតក្នុងភាពអាថ៌កំបាំងនៅឡើយ។
ករណីដែលត្រូវបានរិះគន់ផងដែរនោះ គឺការប្រឆាំងមេដឹកនាំគណបក្សសង្គ្រោះជាតិលោក សម រង្ស៊ី និងលោក កឹម សុខា តំណាងរាស្រ្ត និងសមាជិកគណបក្សប្រឆាំងមន្រ្តីសិទ្ធិមនុស្ស សកម្មជនដីធ្លី និងមន្រ្តីគណៈកម្មាធិការជាតិរៀបចំការបោះឆ្នោត។ ដោយហេតុ បោះឆ្នោតឃុំសង្កាត់ និងការបោះឆ្នោតជាតិ គ្រោងធ្វើនៅឆ្នាំ ២០១៧ និងឆ្នាំ ២០១៨ ដូច្នេះហើយគណៈ បក្សកាន់អំណាចខ្លាចចាញ់ឆ្នោត។
អំពើពុករលួយនៅតែជាបញ្ហាធំ ដែលរបាយការណ៍បានលើកឡើងផងដែរ។ ដោយបានចោទប្រកាន់ថា អង្គភាពប្រឆាំងអំពើពុករលួយ ដើរតួជាឧបករណ៍នយោបាយហើយមិនស្វែងរកចាប់ខ្លួនមន្ត្រីជាន់ខ្ពស់ដែលពុករលួយទេ។
ឆ្លើយតបទៅនឹងរបាយការណ៍នេះ លោក ផៃ ស៊ីផាន អ្នកនាំពាក្យរដ្ឋាភិបាល បានច្រានច្រោល។ លោក ថា ជារបាយការណ៍ ដែលបំផ្លើស និងប្រឌិត ខុសពីការពិតនៅកម្ពុជាទាំងស្រុង។ មន្រ្តីឱ្យតែប្រព្រឹត្តិខុសត្រូវតែទទួលខុសទោស ហើយនៅកម្ពុជាមិនចេះតែចាប់អ្នកនយោបាយដាក់គុកនោះទេ មានអ្នកដែលតាំងខ្លួនជាងអ្នកនយោបាយហើយប្រព្រឹត្តិខុសនឹងច្បាប់ ដូច្នេះជនទាំងអស់នោះត្រូវតែទទួលទោសតាមច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ