លោក ហ៊ុន សែន ការពារទស្សនៈលោក គង់ គាំ និងច្រានចោលការលើកឡើងរបស់លោក សុខ ឥសាន
លោកនាយករដ្ឋមន្ត្រី ហ៊ុន សែន កាលពីព្រលប់ថ្ងៃទី ៤ វិច្ឆិកា ម្សិលមិញនេះ បានចេញមកច្រានចោលភ្លាមៗនូវការលើកឡើងរបស់លោក សុខ ឥសាន អ្នកនាំពាក្យគណបក្សរបស់លោក ចំពោះការលើកឡើងថា លោក គង់ គាំ អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ គឺជារនុកក្នុង ឬជា CIA របស់គណបក្សប្រជាជនកម្ពុជា។ សម្រាប់លោក ហ៊ុន សែន ការលើកឡើងបែបនេះ មិនត្រឹមត្រូវទេ។
ចុះផ្សាយនៅថ្ងៃ៖
ស្តាប់ - ០២:២០
គឺតាមរយៈបទសម្ភាសន៍ផ្តាច់មុខជាមួយគេហទំព័រហ្វ្រេសញូ កាលពីព្រលប់ថ្ងៃទី ៤ វិច្ឆិកា ប្រមុខរដ្ឋាភិបាលកម្ពុជាលោក ហ៊ុន សែន បានអះអាងថា ការលើកឡើងរបស់លោក សុខ ឥសាន ដែលថា លោក គង់ គាំ ជា CIA របស់គណបក្សប្រជាជនកម្ពុជា គឺមិនត្រឹមត្រូវទេ។ សម្រាប់លោក ហ៊ុន សែន ការថ្លែងរបស់លោក គង់ គាំ ពាក់ព័ន្ធនឹងសហភាពអឺរ៉ុបព្រមានដកប្រព័ន្ធអនុគ្រោះពន្ធ EBA ពីកម្ពុជាថា គ្រាន់តែជាឆន្ទៈរបស់លោក គង់ គាំ និងមិនពាក់ព័ន្ធជាមួយគណបក្សប្រជាជនកម្ពុជាឡើយ។ តាមរយៈគេហទំព័រហ្វ្រេសញូ លោក ហ៊ុន សែន បានលើកសរសើរលោក គង់ គាំ ថា ជាមនុស្សចេះដឹងម្នាក់ ហើយការលើកឡើងរបស់លោក គឺចេញពីឆន្ទៈពិតប្រាកដរបស់លោក។ «លោក គង់ គាំ បានចាកចេញពីគណបក្សប្រជាជនកម្ពុជាជាផ្លូវការដោយមានលិខិតត្រឹមត្រូវ»។ នេះបើតាមការបញ្ជាក់បន្ថែមរបស់លោកនាយករដ្ឋមន្ត្រី ហ៊ុន សែន។
គួរជំរាបជូនថា លោក គង់ គាំ អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ ដែលបានផ្តល់បទសម្ភាសន៍ដល់វិទ្យុក្នុងស្រុកមួយ ដោយបានហៅអ្នកព្រួយបារម្ភពីរឿង សហភាពអឺរ៉ុបព្រមានដកប្រព័ន្ធអនុគ្រោះពន្ធ ឬ EBA ពីប្រទេសកម្ពុជានោះ ថាជាក្រុមមនុស្សបំពុលសង្គម និងបំភ័យកម្មករ។
សូមបញ្ជាក់ថា លោក គង់ គាំ គឺជាអតីតសមាជិកគណបក្សប្រជាជនកម្ពុជា ប៉ុន្តែបានសម្រេចចិត្តចាកចេញនៅឆ្នាំ១៩៩២ បន្ទាប់ពីមានកិច្ចព្រមព្រៀងសន្តិភាពទីក្រុងប៉ារីស ថ្ងៃ ២៣ តុលា ឆ្នាំ ១៩៩១ ។ ក្រោយមក លោកបានចូលរួមជាមួយគណបក្សប្រឆាំងរបស់លោក សម រង្ស៊ី រហូតត្រូវបានគេចាត់ទុកថា ជាព្រឹទ្ធាចារ្យនៅក្នុងជួរគណបក្សប្រឆាំង និងជាមនុស្សដែលស្និទ្ធនឹងលោក សម រង្ស៊ី។ ប៉ុន្តែក្រោយពីការរំលាយគណបក្សប្រឆាំងនៅខែវិច្ឆិកាឆ្នាំ២០១៧មក លោក គង់ គំា ត្រូវបានគេមើលឃើញថា បានផ្លាស់ប្តូរជំហរនយោបាយ១៨០ដឺក្រេ តាមរយៈការគាំទ្រ គណបក្សឆន្ទៈខ្មែរដែលបង្កើតឡើងដោយកូនប្រុសពៅរបស់លោក និងបានចូលរួមនៅក្នុងការបោះឆ្នោតជាតិ កាលពីខែកក្កដា ឆ្នាំ ២០១៨ បើទោះបីជាមានការរិះគន់ក្តី។
យ៉ាងណាក៏ដោយ តាមរយៈវិទ្យុបារាំងអន្តរជាតិ RFI លោក គង់ គាំ បានអះអាងថា លោកមិនមែនជារនុកក្នុងរបស់គណបក្សប្រជាជនកម្ពុជា ហើយក៏មិនមែនជាសមាជិកអតីតគណបក្សប្រឆាំងទៀតដែរ។ អ្វីជាគោលជំហរនយោបាយរបស់លោកនៅពេលនេះ គឺគាំទ្រគណបក្សនយោបាយមួយ ដើម្បីចូលរួមប្រកួតប្រជែងនៅក្នុងការបោះឆ្នោត ហើយឈានទៅរកការផ្លាស់ប្តូរជាវិជ្ជមានមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ