លោកហ៊ុន សែន ថាសង្គ្រោះជាតិនឹងឈប់ប្រឆាំងផ្កាប់មុខ ហើយចូលសភា
លោកនាយករដ្ឋមន្ត្រីហ៊ុន សែន បានដឹកនាំកិច្ចប្រជុំគណៈរដ្ឋមន្ត្រីនៅថ្ងៃសុក្រទី១១ ធ្នូនេះ។ ក្នុងកិច្ចប្រជុំ ប្រធានគណបក្សកាន់អំណាចរូបនេះ បានលើកឡើងថា ជំនួបរវាងលោក ស ខេង និងលោកកឹម សុខា គឺជាការពង្រឹងវប្បធម៌សន្ទនាបន្ថែម ហើយស្ថានភាពនយោបាយនឹងប្រែប្រួលពីប្រឆាំងផ្កាប់មុខមកប្រជាធិបតេយ្យជាក់ស្តែង។ គណបក្សសង្គ្រោះជាតិលើកឡើងថាខ្លួននឹងអាចចូលប្រជុំសភាវិញ។
ចុះផ្សាយនៅថ្ងៃ៖
ស្តាប់ - ០២:២២
ទិដ្ឋភាពនយោបាយកម្ពុជានឹងប្រែប្រួលចាប់ពីពេលនេះទៅហើយ ព្រោះថាទិដ្ឋភាពប្រឆាំងផ្កាប់មុខនឹងត្រូវបានផ្លាស់ប្តូរ។ នេះជាការគូសបញ្ជាក់របស់លោកនាយករដ្ឋមន្ត្រីហ៊ុន សែន នៅថ្ងៃទី១១ ធ្នូនេះ។ ថ្លែងក្នុងកិច្ចប្រជុំគណៈរដ្ឋមន្ត្រី ប្រមុខរដ្ឋាភិបាលរូបនេះ បានសង្កត់ធ្ងន់ដោយប្រយោលថា “គណបក្សសង្គ្រោះជាតិ” នឹងមកអនុវត្តវិធានប្រជាធិបតេយ្យជាក់ស្តែងនៅក្នុងរដ្ឋសភាប្រជាធិបតេយ្យសេរីពហុបក្សរវាងតំណាងរាស្ត្រភាគតិច និងភាគច្រើន។ ការបញ្ជាក់របស់ប្រធានគណបក្សកាន់អំណាចរូបនេះ គឺធ្វើឡើងក្រោយពីគណបក្សទាំងពីរកាលពីល្ងាចម្សិលមិញ បានចេញសេចក្តីថ្លែងការណ៍រួមមួយចំនួន៤ចំណុចដើម្បីបន្ធូបន្ថយកំដៅនយោបាយដែលបានពុះកញ្ជ្រោលកាលពីពេលកន្លងទៅនេះ។
សម្រាប់ភាពទន់ភ្លន់នយោបាយនាពេលនេះ ប្រធានគណបក្សសង្គ្រោះជាតិលោក សម រង្ស៊ី និងលោក កឹម សុខា នៅមិនទាន់សម្រេចថាចូលសភាឬយ៉ាងណាទេ។ ប៉ុន្តែលោកយ៉ែម ប៉ុញ្ញឫទ្ធិ អ្នកនាំពាក្យគណបក្សបានអះអាងថា គណបក្សត្រូវតែចូលសភាដើម្បីពិនិត្យច្បាប់។ សម្លេងលោក យ៉ែម បុញ្ញឫទ្ធិ អ្នកនាំពាក្យគណបក្ស៖
សូមបញ្ជាក់ថា គណបក្សសង្គ្រោះជាតិ និងគណបក្សប្រជាជនកម្ពុជា បានចេញសេចក្តីថ្លែងការណ៍ចំនួន៤ ចំណុចគឺ គឺបង្កើតគណៈកម្មការចំពោះកិច្ចដើម្បីជជែកពិភាក្សាស្តីពីច្បាប់របស់សហជី ដែលបានចូលទៅដល់ដៃរបស់រដ្ឋសភា ការបង្កើតក្រុមការងារដើម្បីពង្រឹងវប្បធម៌សន្ទនារវាងបក្សទាំងពីរ ការបង្កើនជំនួបរវាងមេដឹកនាំបក្សទាំងពីរ រួមទាំងការសន្យាដោះស្រាយបញ្ហានយោបាយដែលនៅសេសសល់ផងដែរ។ យ៉ាងណាក៏ដោយជំនួបកាលពីល្ងាចមិញនេះ មិនបាននិយាយពីករណីលោក សម រង្ស៊ី និងលោក កឹម សុខា នោះទេ។
សម្រាប់ទិដ្ឋភាពនយោបាយនាពេលនេះ លោកនាយករដ្ឋមន្ត្រីបានអះអាងថាកម្ពុជាមិនមានវិបត្តិនយោបាយឡើយ ហើយជំនួបរវាងលោក ស ខេង និង លោក កឹម សុខា គឺជាការពង្រឹងវប្បធម៌សន្ទនានិងនីតិរដ្ឋដែលប្រកបដោយភាពទទួលខុសត្រូវខ្ពស់របស់បុគ្គលនយោបាយ និងគណបក្សនយោបាយ។ បើតាមប្រមុខរដ្ឋាភិបាលរូបនេះ ការសម្រេចរបស់បក្សគូប្រជែងទាំងពីរដែលកំពុងប៉ះទង្គិចគ្នានេះ គឺដើម្បីគុណភាព សណ្តាប់ធ្នាប់នយោបាយ និងប្រជាធិបតេយ្យ ដែលមិនត្រឹមតែសេរីពហុបក្សប៉ុណ្ណោះទេ។ ហើយវាជាសេចក្តីថ្លៃថ្នូរ និងសេចក្តីសុខក្សេមក្សាន្តរបស់ប្រជាពលរដ្ឋ ប្រជាធិបតេយ្យ។ យ៉ាងណាក៏ដោយបើតាមលោកហ៊ុន សែន កម្ពុជាមិនអាចបោះបង់នីតិរដ្ឋនោះបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ