រដ្ឋាភិបាលកម្ពុជា គ្មានគម្រោងស្នើបារាំងធ្វើបត្យាប័នលោកសម រង្ស៊ី
គិតមកដល់ពេលនេះ គឺមានរយៈពេលជិតមួយខែហើយ ដែលលោកសម រង្ស៊ី មិនទាន់ត្រូវបានអាជ្ញាធរកម្ពុជាចាប់ខ្លួនយកមកអនុវត្តទោសនៅក្នុងពន្ធនាគារតាមអំណាចដីការបស់តុលាការក្រុងភ្នំពេញ។ ទោះជាបែបនេះក្តី ក្រសួងមហាផ្ទៃកម្ពុជា បានគូសបញ្ជាក់ថា ខ្លួនមិនមានគម្រោងស្នើសុំរដ្ឋាភិបាលបារាំង ដើម្បីធ្វើបត្យាប័នបញ្ជូនលោកសម រង្ស៊ី មកអនុវត្តទោសនៅក្នុងប្រទេសកម្ពុជានោះទេ។
ចុះផ្សាយនៅថ្ងៃ៖
ស្តាប់ - ០១:៥៩
បញ្ហាសញ្ជាតិ គឺជាឧបសគ្គដែលធ្វើឲ្យអាជ្ញាធរកម្ពុជា មិនមានចេតនាក្នុងការស្នើសុំរដ្ឋាភិបាលបារាំង ដើម្បីធ្វើបត្យាប័នលោកសម រង្ស៊ី ប្រធានគណបក្សសង្រ្គោះជាតិយកមកអនុវត្តទោសនៅក្នុងប្រទេសកម្ពុជា។ លោកខៀវ សុភ័គ អ្នកនាំពាក្យក្រសួងមហាផ្ទៃកម្ពុជា បានបញ្ជាក់ប្រាប់វិទ្យុបារាំងអន្តរជាតិថា ការស្នើរដ្ឋាភិបាលបារាំង ធ្វើបត្យាប័នលោកសម រង្ស៊ី វាគឺជារឿងអត់ប្រយោជន៍ និងមិនជោគជ័យនោះទេ ព្រោះថា រដ្ឋាភិបាលបារាំងនឹងមិនយល់ព្រមតាមការស្នើរបស់កម្ពុជាឡើយ ក្រោមហេតុផលថា លោកសម រង្ស៊ី ជាជនជាតិបារាំង។
រដ្ឋាភិបាលកម្ពុជា និង បារាំង បានចុះហត្ថលេខាលើអនុសញ្ញាស្តីពីបត្យាប័នរវាងគ្នានិងគ្នានៅក្នុងអំឡុងពេលដែលលោកនាយករដ្ឋមន្ត្រីហ៊ុន សែន ប្រមុខរដ្ឋាភិបាលកម្ពុជា ទៅបំពេញទស្សនៈកិច្ចផ្លូវការនៅក្នុងប្រទេសបារាំងកាលពីចន្លោះថ្ងៃទី២៥ដល់ថ្ងៃទី២៧ ខែតុលា ឆ្នាំ២០១៥។ បើទោះបីជាបានចុះកិច្ចព្រមព្រៀងបត្យាប័នជាមួយគ្នាក៏ពិតមែន ប៉ុន្តែសម្រាប់លោកខៀវ សុភ័គ វានៅតែមិនអាចធ្វើអ្វីបានដដែល។ ផ្ទុយមកវិញ ប្រសិនបើលោកសម រង្ស៊ី កាន់សញ្ជាតិតែមួយនោះ អាជ្ញាធរកម្ពុជានឹងស្នើបត្យាប័នទៅកាន់ប្រទេសណាទាំងអស់ដែលប្រមុខគណបក្សប្រឆាំងរូបនេះស្ថិតនៅ។ យ៉ាងណាក៏ដោយ បើតាមលោកខៀវ សុភ័គ នៅពេលនេះអាជ្ញាធរកម្ពុជាគ្មានជម្រើសអ្វីក្រៅតែពីរង់ចាំចាប់ខ្លួនលោកសម រង្ស៊ី ក្រោយពីលោកវិលត្រឡប់មកប្រទេសកំណើតវិញតែប៉ុណ្ណោះ។
លោកសម រង្ស៊ី ប្រមុខគណបក្សប្រឆាំងកម្ពុជា ត្រូវបានតុលាការក្រុងភ្នំពេញចេញដីកាបង្គាប់ឲ្យចាប់ខ្លួនយកមកអនុវត្តទោសកាលពីថ្ងៃទី១៣ ខែវិច្ឆិកានៅក្នុងសំណុំរឿងបរិហាកេរ្ត៍លោកហោ ណាំហុង រដ្ឋមន្ត្រីក្រសួងការបរទេសកម្ពុជា។ រំលងបានបីថ្ងៃ លោកសម រង្ស៊ី ក៏ត្រូវបានគណៈកម្មាធិកាអចិន្ត្រៃយ៍រដ្ឋសភាសម្រេចដកសិទ្ធិ បុព្វសិទ្ធិ និង សមាជិកភាពសភាថែមទៀត។ បន្ទាប់មក លោកក៏ត្រូវបានតុលាការក្រុងភ្នំពេញចេញដីកាឲ្យចូលបំភ្លឺនៅក្នុងសំណុំរឿងពីរដាច់ដោយឡែកពីគ្នាបន្ថែមទៀត គឺករណីសមគំនិតជាមួយលោកហុង សុខហួរ រឿងបន្លំឯកសារព្រំដែនរវាងកម្ពុជា-វៀតណាម និង ករណីបរិហាកេរ្តិ៍លោកហេង សំរិន ប្រធានរដ្ឋសភាខ្មែរ។ ចំពោះរឿងរ៉ាវទាំងអស់នេះ លោកសម រង្ស៊ី ដែលកំពុងស្ថិតឯបរទេសនោះ បានចាត់ទុកថា គឺជារឿងកំប្លែងនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ