លោកហ៊ុន សែន អរគុណសមាជិកព្រឹទ្ធសភាអាមេរិកដែលគាំទ្រក្នុងរឿងផែនទីនិងព្រំដែន
លោកនាយករដ្ឋមន្ដ្រី ហ៊ុន សែន បានសរសេរលិខិតថ្លែងអំណរគុណ លោក ដុន បេនតុន សមាជិកព្រឹទ្ធសភាអាមេរិក ដែលបានគាំទ្រលោក នៅក្នុងរឿងផែនទី និងព្រំដែន។ នៅក្នុងលិខិតចុះថ្ងៃទី១៨កញ្ញា ផ្ញើជូនសមាជិកព្រឹទ្ធសភាអាមេរិក ប្រមុខរដ្ឋាភិបាលកម្ពុជាបានហៅការគាំទ្ររបស់សមាជិកព្រឹទ្ធសភាអាមេរិកថា ជាការផ្ដល់យុត្តិធម៌ដល់កិច្ចខិតខំប្រឹងប្រែងរបស់រូបលោក និងរដ្ឋាភិបាលកម្ពុជា។
ចុះផ្សាយនៅថ្ងៃ៖
ស្តាប់ - ០២:២២
«ខ្ញុំសូមសម្ដែងនូវអំណរគុណដ៏ស្មោះស្ម័គ្រចំពោះសមានចិត្ត និងការគាំទ្រដ៏ខ្លាំងក្លារបស់ឯកឧត្តម ដែលបានផ្ដល់ជូនខ្ញុំ សម្រាប់អ្វីដែលខ្ញុំបានធ្វើដើម្បីការពារអធិបតេយ្យភាព និងបូរណភាពទឹកដីកម្ពុជា»។ នេះគឺជាអ្វីដែលលោកនាយករដ្ឋមន្ដ្រី ហ៊ុន សែន សរសេរនៅក្នុងលិខិតរបស់ខ្លួន ទៅកាន់លោក ដុន បេនតុន សមាជិកព្រឹទ្ធសភាអាមេរិក។ ប្រមុខរដ្ឋាភិបាលកម្ពុជាសរសេរលិខិតនេះ បន្ទាប់ពីបានទទួលលិខិតពីលោក ដុន បេនតុន ចុះថ្ងៃទី១១ខែកញ្ញា។
ក្រៅពីនេះ លោកហ៊ុន សែន នាយករដ្ឋមន្ដ្រី បន្តថា ការការយល់ឃើញរបស់សមាជិកព្រឹទ្ធសភាអាមេរិកថា ការវាយប្រហារទៅលើរូបលោក និងរដ្ឋាភិបាលរបស់លោក លើបញ្ហាទាំងនេះ គឺគ្មានមូលដ្ឋាន និងមានហេតុផលនយោបាយ គឺជាការផ្ដល់យុត្តិធម៌ដល់កិច្ចខិតខំប្រឹងប្រែងរបស់រូបលោក និងរដ្ឋាភិបាលកម្ពុជា។
មិនត្រឹមតែថ្លែងអំណរគុណចំពោះលោក ដុន បេនតុន ទេ លោកនាយករដ្ឋមន្ដ្រីក៏បានឆ្លៀតឱកាសនេះ រៀបរាប់ពីការងាររបស់រដ្ឋាភិបាលកម្ពុជា ក្នុងការការពារនិងថែរក្សាអធិបតេយ្យភាព និងបូរណភាពទឹកដីកម្ពុជានាពេលកន្លងមក។ ជាការងារដែលក្នុងនោះមានដូចជា ការកំណត់និងបោះបង្គោលព្រំដែន ការប្រើប្រាស់ផែនទី ការអនុម័តសន្ធិសញ្ញាបំពេញបន្ថែមឆ្នាំ២០០៥ ព្រមទាំងការផ្ទៀងផ្ទាត់ផែនទីពីអង្គការសហប្រជាជាតិ ក៏ដូចជាប្រទេសបារាំងកាលពីពេលថ្មីៗនេះ។
គួរជម្រាបជូនថា នៅថ្ងៃទី១១ខែកញ្ញា សមាជិកព្រឹទ្ធសភាអាមេរិក លោក ដុន បេនតុន បានផ្ញើលិខិតមួយជូនប្រមុខរដ្ឋាភិបាលកម្ពុជា ក្នុងន័យកោតសរសើរ និងផ្ដល់តម្លៃខ្ពស់ចំពោះការដោះស្រាយបញ្ហាព្រំដែនជាមួយវៀតណាម ពីសំណាក់រដ្ឋាភិបាលកម្ពុជា។ នៅក្នុងលិខិតនោះ សមាជិកព្រឹទ្ធសភាមកពីគណបក្សសាធារណរដ្ឋរូបនេះ បានគូសបញ្ជាក់ថា ការការពារនិងការរក្សាបូរណភាពទឹកដីរបស់ប្រទេសជាតិ ស្ថិតក្នុងចំណោមកាតព្វកិច្ចសំខាន់បំផុត ដែលអ្នកដឹកនាំប្រទេសជាតិត្រូវតែធ្វើ ព្រោះបើតាមលោក ដុន បេនតុន បើគ្មានការកំណត់ព្រំដែនប្រទេសជាតិឲ្យបានច្បាស់លាស់ទេ គឺគ្មានប្រទេសណាអាចការពារផលប្រយោជន៍មូលដ្ឋានរបស់ពលរដ្ឋ ឬផ្ដល់ការដឹកនាំក្នុងវិស័យសំខាន់ៗបានទេ។
សមាជិកព្រឹទ្ធសភារូបនេះ នៅចុងបញ្ចប់នៃលិខិត ក៏បានសម្ដែងសេចក្ដីសង្ឃឹមថា អារ្យធម៌ខ្មែរបុរាណ នឹងអាចវិលត្រឡប់ទៅផ្ដោតការយកចិត្តទុកដាក់លើការផ្សះផ្សារ ការធ្វើប្រជាធិបតេយ្យូបនីយកម្ម និងពាណិជ្ជកម្មអន្ដរជាតិ ដែលនឹងបង្កើនគុណភាពជីវភាពសម្រាប់ប្រជាពលរដ្ឋកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ