លោក ហ៊ុន សែន បញ្ជាចាប់ខ្លួនសមាជិកព្រឹទ្ធសភាគណបក្សសមរង្ស៊ី ពីបទក្បត់ជាតិ
លោកនាយករដ្ឋមន្រ្តី ហ៊ុន សែន នៅព្រឹកថ្ងៃព្រហស្បតិ៍នេះ បានស្នើកងកម្លាំងសមត្ថកិច្ចកម្ពុជាឲ្យតាមចាប់ខ្លួន សមាជិកព្រឹទ្ធសភាមួយរូប មកពីគណបក្សសមរង្ស៊ី ដែលរងការចោទប្រកាន់ថា បានក្លែងបន្លំសន្ធិសញ្ញាព្រំដែនកម្ពុជា-វៀតណាម តាមរយៈបណ្តាញសង្គម Facebook។ លោក ហ៊ុន សែន បានហៅ ការក្លែងបន្លំសន្ធិសញ្ញា នៅក្នុងមាត្រា៤នោះថា គឺជាទង្វើក្បត់ជាតិ និងមិនអាចលើកលែងបានទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៩
ការបញ្ជាឲ្យចាប់ខ្លួននេះ បានធ្វើឡើង ក្រោយពីសមាជិកព្រឹទ្ធសភាម្នាក់របស់គណបក្សសមរង្ស៊ី ដែលគេស្គាល់ថា គឺលោក ហុង សុខហួរ បានបង្ហោះខ្លឹមសារនៃសន្ធិសញ្ញាសន្តិភាព មិត្តភាព និងសហប្រតិបត្តិការ រវាងសាធារណរដ្ឋប្រជាមានិតកម្ពុជា និង សាធារណរដ្ឋសង្គមនិយមវៀតណាម ចុះថ្ងៃទី១៨កុម្ភៈឆ្នាំ១៩៧៩ ដែលលោកនាយករដ្ឋមន្រ្តីហ៊ុន សែនចោទថាជាខ្លឹមសារ «ក្លែងក្លាយ»។ លោក ហ៊ុន សែន បានហៅទង្វើនេះថា ជា «អំពើក្បត់ជាតិ» ដែល "មិនអាចអត់អោនឲ្យបាន"។ ការលើកឡើងរបស់លោកនាយករដ្ឋមន្រ្តី ហ៊ុន សែន បានធ្វើឡើងនៅក្នុងពិធីចែកសញ្ញាប័ត្រ ដល់និស្សិតសាកលវិទ្យាល័យភ្នំពេញអន្តរជាតិ (PPIU) នៅឯវិទ្យាស្ថានជាតិអប់រំ កាលពីព្រឹកថ្ងៃទី១៣ ខែសីហា ឆ្នាំ២០១៥នេះ។
ក្រៅពីបញ្ជាឲ្យកងកម្លាំងសមត្ថកិច្ចតាមចាប់ខ្លួន នៅថ្ងៃនេះ លោក ហ៊ុន សែន ក៏បានអំពាវនាវ កុំឲ្យស្ថានទូតបរទេសនានា រួមទាំងគណបក្សសង្រ្គោះជាតិផង លូកដៃជួយអន្តរាគមន៍ករណីនេះទេ។
សូមបញ្ជាក់ថា ការចុះផ្សាយខ្លឹមសារនៃសន្ធិសញ្ញា ដែលនាំឲ្យលោកនាយករដ្ឋមន្រ្តីមានការខឹងសម្បារនេះ គឺយោងទៅលើវីដេអូខ្លីបមួយរបស់លោក ហុង សុខហួរ សមាជិកព្រឹទ្ធសភាគណបក្សសមរង្ស៊ី កាលពីថ្ងៃទី១២សីហា ដែលលើកឡើងថា នៅត្រង់ប្រការ៤ នៃសន្ធិសញ្ញាចុះថ្ងៃទី១៨ កុម្ភៈ ឆ្នាំ១៩៧៩ បានចែងថា៖ "ភាគីទាំង២ នឹងធ្វើកិច្ចចរចាចុះហត្ថលេខា សម្រាប់រំលាយព្រំដែនជាតិនៃប្រទេសទាំង២"។ ប៉ុន្តែខ្លឹមសារដើមនៃសន្ធិសញ្ញាសន្តិភាព មិត្តភាព និងសហប្រតិបត្តិការ ដែលចុះហត្ថលេខារវាងលោក ហេង សំរិន ដែលកាលណោះជាប្រមុខរដ្ឋនៃរបប សាធារណរដ្ឋប្រជាមាតិកម្ពុជា និង នាយករដ្ឋមន្រ្តីនៃសាធារណរដ្ឋសង្គមនិយមវៀតណាម នៅត្រង់មាត្រា៤បានចែងថា «ភាគីទាំង២ នឹងចរចាគ្នាចុះហត្ថលេខា ដោយឈរលើមូលដ្ឋានខ្សែព្រំដែននាពេលបច្ចុប្បន្ន ហើយប្តេជ្ញាចិត្តកសាងខ្សែព្រំដែននោះទៅជាខ្សែព្រំដែនសន្តិភាព មិត្តភាពដ៏យូរអង្វែងនៃប្រទេសទាំង២»។
នៅថ្ងៃនេះដែរ ក្រៅពីការអំពាវនាវដោយផ្ទាល់មាត់របស់លោកនាយករដ្ឋមន្រ្តី ហ៊ុន សែន រាជរដ្ឋាភិបាលកម្ពុជា ក៏បានចេញសេចក្តីថ្លែងការណ៍ថ្កោលទោសមួយ ដោយបានហៅទង្វើរបស់លោក ហុង សុខហួរថា ជាទង្វើឧក្រិដ្ឋ ហើយបានធ្វើឲ្យប៉ះពាល់យ៉ាងធ្ងន់ធ្ងរដល់សន្តិសុខជាតិ ស្ថិរភាពនយោបាយ អធិបតេយ្យភាព និងបូរណភាពទឹកដីនៃប្រទេសកម្ពុជា។
ចំណែកឯគណបក្សសមរង្ស៊ីវិញ នៅព្រឹកថ្ងៃព្រហស្បតិ៍នេះ បានកោះប្រជុំសមាជិកគណកម្មាធិការអចិន្រ្តៃយ៍របស់ខ្លួនជាបន្ទាន់ និងបានជួបប្រជុំជាមួយនឹងមេធាវីផងដែរ ដើម្បីសិក្សាទៅលើសំណុំរឿងចោទប្រកាន់នេះ។ នេះបើតាមលោក គង់ គាំ ប្រធានគណបក្សសម រង្ស៊ី។ ចំណែកឯលោក អ៊ូ ច័ន្ទឬទ្ធិ សមាជិកសភាគណបក្សសង្រ្គោះជាតិ បានបង្ហាញការសោកស្តាយចំពោះការតាមចាប់ខ្លួនសមាជិកព្រឹទ្ធសភាគណបក្សរបស់លោកសមរង្ស៊ី ដែលនៅមានអភ័យឯកសិទ្ធិនេះ។ ប៉ុន្តែមន្រ្តីរដ្ឋាភិបាលបានបញ្ជាក់ថា អភ័យឯកសិទ្ធិនៃសមាជិកព្រឹទ្ធសភានេះ មិនអាចរារាំងដល់ការចាប់ខ្លួនសមាជិកព្រឹទ្ធសភា ដែលរដ្ឋាភិបាលចាត់ទុកថា ជាករណីបទល្មើសជាក់ស្តែងនេះទេ។
សូមបញ្ជាក់ថា ភ្លាមៗនេះ ក្រោយពីលោកនាយករដ្ឋមន្រ្តី ហ៊ុន សែន បញ្ជាឲ្យមានការចាប់ខ្លួនសមាជិកព្រឹទ្ធសភាគណបក្សសមរង្ស៊ីនេះ នៅព្រឹកមិញនេះ កងកម្លាំងសមត្ថកិច្ចជាច្រើន ត្រូវបានដាក់ពង្រាយនៅតាមស្ថានទូតនានា ពិសេសនៅមុខស្ថានទូតបារាំង ស្ថានទូតសហរដ្ឋអាមេរិក និងនៅតាមកន្លែងជាច្រើនទៀត ដើម្បីស្ទាក់ចាប់ខ្លួនលោក ហុង សុខហួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ