អ្នកនាំពាក្យបក្សប្រឆាំង៖ ផ្ដល់ផែនទីដល់រាជបណ្ឌិត្យសភា ជាប្រយោជន៍ក្នុងការស្រាវជ្រាវ
ដូចការគ្រោងទុក នៅព្រឹកថ្ងៃចន្ទនេះ គណបក្សសង្គ្រោះជាតិ បានប្រគល់ផែនទីចំនួន២៦ផ្ទាំង ទៅឲ្យក្រុមអ្នកស្រាវជ្រាវនៃរាជបណ្ឌិត្យសភាកម្ពុជា ដឹកនាំដោយលោក សុខ ទូច។ ផែនទីទាំង២៦ផ្ទាំងដែលផ្ដល់ទៅឲ្យរាជបណ្ឌិត្យសភាកម្ពុជានៅថ្ងៃនេះ គឺជាផែនទីដែលបក្សប្រឆាំងទិញពីប្រទេសបារាំង ដែលរួមមាន ផែនទីអេឡិចត្រូនិក និងផែនទីក្រដាស។ មន្ដ្រីជាន់ខ្ពស់គណបក្សសង្គ្រោះជាតិ យល់ថា ការផ្ដល់ផែនទីដល់រាជបណ្ឌិត្យសភានាពេលនេះ គឺជាប្រយោជន៍ចំពោះការស្រាវជ្រាវ មុននឹងឈានទៅធ្វើការផ្ទៀងផ្ទាត់ជាមួយផែនទីដែលរដ្ឋាភិបាលកម្ពុជាកំពុងប្រើ និងផែនទីដែលខ្ចីពីអង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ផែនទីក្រដាសនិងអេឡិចត្រូនិក ចំនួន២៦ ត្រូវបានផ្ដល់ឲ្យក្រុមអ្នកស្រាវជ្រាវនៃរាជបណ្ឌិត្យសភា នៅក្នុងពិធីផ្លូវការមួយ នៅព្រឹកថ្ងៃចន្ទទី១០សីហានេះ នៅទីស្នាក់ការកណ្ដាលគណបក្សសង្គ្រោះជាតិ។ អ្នកនាំពាក្យគណបក្សសង្គ្រោះជាតិ លោក អ៊ូ ច័ន្ទឬទ្ធិ ប្រាប់វិទ្យុបារាំងអន្ដរជាតិថា ការផ្ដល់ផែនទីដល់រាជបណ្ឌិត្យសភានាពេលនេះ គឺជាប្រយោជន៍ចំពោះការស្រាវជ្រាវអំពីបញ្ហាព្រំដែន និងភាពចម្រូងចម្រាស់នៃផែនទីកម្ពុជា មុននឹងឈានទៅធ្វើការផ្ទៀងផ្ទាត់ជាផ្លូវការជាមួយរដ្ឋាភិបាលកម្ពុជា និងភាគីពាក់ព័ន្ធដទៃទៀត។
គួរជម្រាបជូនថា ផែនទីដែលគណបក្សសង្គ្រោះជាតិផ្ដល់ឲ្យរាជបណ្ឌិត្យសភានាពេលនេះ គឺជាផែនទីបង្ហាញពីព្រំដែនកម្ពុជាវៀតណាម ខ្នាត១លើ១០០ពាន់ ដែលលោក សម រង្ស៊ី ប្រធានគណបក្សសង្គ្រោះជាតិ បានបញ្ជាទិញពីប្រទេសបារាំង ក្នុងតម្លៃ១៦៨ដុល្លារ
អាមេរិក។
ក្រៅពីផ្ដល់ផែនទីទៅឲ្យរាជបណ្ឌិត្យសភា លោក អ៊ូ ច័ន្ទឬទ្ធិ ក៏បានអះអាងដែរថា គណបក្សសង្គ្រោះជាតិនឹងរៀបចំក្រុមការងារជំនាញ ដើម្បីត្រៀមខ្លួនចូលរួមធ្វើការជាមួយរដ្ឋាភិបាល និងភាគីពាក់ព័ន្ធនានា។ ក្នុងនោះ រឿងសំខាន់គឺផ្ទៀងផ្ទាត់ផែនទីដែលគណបក្សសង្គ្រោះជាតិមាន ជាមួយផែនទីដែលរដ្ឋាភិបាលកម្ពុជាកំពុងប្រើ ក៏ដូចជាផែនទីដែលអង្គការសហប្រជាជាតិទើបតែឲ្យខ្ចី។
ចំពោះការផ្ទៀងផ្ទាត់ផែនទីនេះ សូមរំលឹកជូនផងដែរថា រដ្ឋាភិបាលកម្ពុជាបានសម្រេចបង្កើតគណៈកម្មការមួយ ដែលមានរដ្ឋមន្ដ្រីក្រសួងការបរទេស លោក ហោ ណាំហុង ជាប្រធាន អមដោយអនុប្រធានពីររូប គឺលោក វ៉ា គឹមហុង ប្រធានគណៈកម្មការចម្រុះកិច្ចការព្រំដែនកម្ពុជា និងលោក អ៊ឹម ឈុនលឹម រដ្ឋមន្ដ្រីក្រសួងដែនដី។ គណៈកម្មការនេះ នឹងចាត់ចែងសម្របសម្រួលការទទួល ការប្រគល់ និងការពិនិត្យផ្ទៀងផ្ទាត់ផែនទីដែលខ្ចីពីអង្គការសហប្រជាជាតិ ដោយមានការចូលរួមពីបក្សប្រឆាំង រាជបណ្ឌិត្យសភា និងអ្នកជំនាញផែនទីទាំងជាតិនិងអន្ដរជាតិផងដែរ។ បើតាមរដ្ឋាភិបាល គណៈកម្មការថ្មីនេះ នឹងរៀបចំការពិនិត្យផ្ទៀងផ្ទាត់ផែនទី ប្រកបដោយតម្លាភាព និងភាពត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ