លោកហ៊ុន សែន៖ កម្ពុជាគ្មាននាយករដ្ឋមន្ត្រីពីរនោះទេ
ប្រមុខរដ្ឋាភិបាលកម្ពុជាលោកនាយករដ្ឋមន្ត្រីហ៊ុន សែន នៅព្រឹកថ្ងៃព្រហស្បតិ៍នេះ បានបញ្ជាក់ថា កម្ពុជាមិនមាននាយករដ្ឋមន្ត្រីពីរនោះទេ។ ការថ្លែងបញ្ជាក់របស់លោកនាយករដ្ឋមន្ត្រីហ៊ុន សែននៅពេលនេះ គឺធ្វើឡើងបន្ទាប់ពីថ្នាក់ដឹកនាំកំពូលគណបក្សប្រជាជនកម្ពុជា និង សង្គ្រោះជាតិ បានព្រមព្រៀងគ្នារៀបចំឲ្យមានប្រធានក្រុមភាគតិចនៅក្នុងរដ្ឋសភាដែលមានឋានៈស្មើនាយករដ្ឋមន្ត្រី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
គឺនៅក្នុងពិធីចែកសញ្ញាបត្រដល់និស្សិតវិទ្យាស្ថានខ្មែរជំនាន់ថ្មីនៅវិទ្យាស្ថានជាតិអប់រំ លោកនាយករដ្ឋមន្ត្រីហ៊ុន សែនបានប្រកាសថា នៅកម្ពុជាមិនមាននាយករដ្ឋមន្ត្រីដល់ទៅពីររូបនោះទេហើយប្រធានក្រុមភាគតិចនៅក្នុងរដ្ឋសភាដែលគ្រោងនឹងបង្កើតឡើងនោះគ្មានសិទ្ធអំណាចដូចនាយករដ្ឋមន្ត្រីនោះឡើយ។ ជាមួយគ្នានោះ លោកនាយករដ្ឋមន្ត្រី បានលើកឡើងថា ការបង្កើតឲ្យមានប្រធានក្រុមតំណាងរាស្ត្រ និង ប្រធានក្រុមភាគតិចនៅក្នុងរដ្ឋសភានេះ មិនមែនសម្រាប់តែគណបក្សជាប់ឆ្នោតទាំងពីរនៅក្នុងរដ្ឋសភានៅពេលនេះនោះទេ។ លោកនាយករដ្ឋមន្ត្រីហ៊ុន សែន ៖
លោកហ៊ុន សែន៖ «ពីមុនយើងមានក្រុមតំណាងរាស្រ្ត ក្នុងមួយក្រុមមាន១០នាក់...ទៅលើបញ្ហាប្រទេសជាតិ ហើយដែលមានថានៈស្មើនាយករដ្ឋមន្រ្តី»។
សូមបញ្ជាក់ថា កាលពីថ្ងៃទី២៨ វិច្ឆិកា កន្លងទៅ លោកនាយករដ្ឋមន្ត្រីហ៊ុន សែន និង លោកសម រង្ស៊ី ប្រធានគណបក្សសង្គ្រោះជាតិ បានឯកភាពគ្នាក្នុងការកែសម្រួលបទបញ្ជាផ្ទៃក្នុងនៃរដ្ឋសភាដោយធ្វើវិសោធនកម្មប្រការ៤៨ថ្មី(ពីរ) ដើម្បីរៀបចំឲ្យមានថ្នាក់ដឹកនាំតំណាងរាស្ត្រនៃគណបក្សនយោបាយដែលមានអាសនៈនៅក្នុងរដ្ឋសភា និង ប្រធានក្រុមភាគតិចនៅរដ្ឋសភា។ ប្រធានក្រុមភាគតិចនៅក្នុងរដ្ឋសភានេះ នឹងមានឋានៈស្មើនាយករដ្ឋមន្ត្រី ដើម្បីជាដៃគូសន្ទនាជាមួយនឹងប្រមុខរដ្ឋាភិបាលពាក់ព័ន្ធនឹងបញ្ហាផ្សេងៗរបស់ប្រទេសជាតិ។
ត្រង់ចំណុចនេះ លោកហ៊ុន សែន បានបញ្ជាក់ថា ឋានៈស្មើនាយករដ្ឋមន្ត្រីនេះ គឺគ្រាន់តែអសនៈក្រមសម្រាប់ការរៀបចំផ្នែកពិធីការប៉ុណ្ណោះ ប៉ុន្តែមិនអាចមកបញ្ជាទ័ព បញ្ជារដ្ឋបាល ឫមិនអាចមកចាត់ចែងការងារជំនួសនាយករដ្ឋមន្ត្រីបាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ