ការសាយភាយគ្រឿងញៀនទៅដល់ជនបទ ជាការទាញសញ្ញាអាសន្ននៃអនាគតយុវជនខ្មែរ
ចុះផ្សាយនៅថ្ងៃ៖
គ្រឿងញៀនកំពុងក្លាយជាក្តីព្រួយបារម្ភកាន់តែខ្លាំងឡើង នៅក្នុងសង្គមកម្ពុជានាពេលបច្ចុប្បន្ននេះ។ របាយការណ៍ថ្មីៗនេះបានបង្ហាញថា គ្រឿងញៀនមិនត្រឹមតែមានការប្រើប្រាស់កើនឡើងនៅទីក្រុងនោះទេ ក៏ប៉ុន្តែវាកំពុងតែរីកសុះសាយទៅដល់គ្រប់ច្រកល្ហកនៃទីជនបទស្រុកស្រែចំការថែមទៀត។ ក្រុមអ្នកវិភាគបានទាញសញ្ញាអាសន្នថា គ្រឿងញៀនបាននឹងកំពុងបង្ករគ្រោះថ្នាក់យ៉ាងធ្ងន់ធ្ងរ ទៅដល់អនាគតនៃយុវជនខ្មែរ។
កន្លងទៅគេធ្លាប់តែឮនិងដឹងជាទូទៅថា គ្រឿងញៀនមានតែនៅទីប្រជុំជនធំៗ ឬនៅតែទីក្រុងប៉ុណ្ណោះ ក៏ប៉ុន្តែរបាយការណ៍ថ្មីៗនេះបានបង្ហាញថា គ្រឿងញៀនកំពុងច្រៀតខ្លួនចូលទៅដល់គ្រប់ច្រកល្ហកនៃទីជនបទស្រុកស្រែចំការនៅទូទាំងប្រទេស។
បើដូច្នេះ តើអនាគតនៃយុវជនខ្មែរនឹងទៅជាយ៉ាងណា?
យោងតាមរបាយការណ៍៩ខែឆ្នាំ២០១៥ ដែលបង្ហាញដោយ លោក ម៉ក់ ជីតូ អគ្គស្នងការរងនគរបាលជាតិទទួលបន្ទុកប្រឆាំងគ្រឿងញៀននៃក្រសួងមហាផ្ទៃកាលពីដើមសប្តាហ៍នេះបានបង្ហាញថា ការបង្រ្កាបគ្រឿងញៀននៅទូទាំងប្រទេស បានកើនឡើង៣ដង បើប្រៀបធៀបនឹងរយៈពេលដូចគ្នាកាលពីឆ្នាំ២០១៤។ ក្នុងនោះ សមត្ថកិច្ចកម្ពុជាបានបង្រ្កាបករណីគ្រឿងញៀនបានចំនួន១៦៦៨ករណី ខណៈការបង្រ្កាបនៅឆ្នាំ២០១៤បានតែ៥៦៤ករណីប៉ុណ្ណោះ។ របាយការណ៍ក៏បានបង្ហាញថា ៩ខែមកនេះ អាជ្ញាធរបានឃាត់ខ្លួនជនសង្ស័យនិងជនល្មើសបាន ៣៤០២នាក់ និងដកហូតគ្រឿងញៀនជាច្រើនប្រភេទបានជាង៨៧គីឡូក្រាម។ នេះគឺជាតួលេខដ៏ភ្ញាក់ផ្អើលមួយ ដែលករណីគ្រឿងញៀននៅក្នុងប្រទេសកម្ពុជាបានកើនឡើងដល់ទៅ៣ដង តែក្នុងរយៈពេល៩ខែ។ ប៉ុន្តែបើតាមការពន្យល់ពីមន្រ្តីជាន់ខ្ពស់កម្ពុជាថា ការកើនឡើងនេះ មិនមែនមានន័យថា គ្រឿងញៀននៅកម្ពុជាមានច្រើនជាងឆ្នាំមុននោះទេ តែនោះគឺជាសកម្មភាពដ៏ផុសផុលនៃការបង្រ្កាបគ្រឿងញៀននៅឆ្នាំនេះ។
ការអះអាងបែបនេះក៏ម្យាងដែរ ក៏ប៉ុន្តែចូលកុំភ្លេចថា បើករណីគ្រឿងញៀនមិនកើនឡើងទេ ក៏មិនមានការបង្រ្កាបច្រើនបែបនេះដែរ។ ហើយម្យ៉ាងវិញទៀត ពីមុនគ្រឿងញៀន គឺមានតែនៅទីក្រុង និងទីប្រជុំជនធំៗប៉ុណ្ណោះ ប៉ុន្តែបច្ចុប្បន្ននេះ គ្រឿងញៀនកំពុងតែរីកសាយភាយទៅដល់ទីជនបទស្រុកស្រែចំការ និងគ្រប់ច្រកល្ហកថែមទៀត។
ការប្រើប្រាស់គ្រឿងញៀន ពីមុនមានត្រឹមតែក្រុមមនុស្សដែលជាយុវជនស្ថិតនៅអាយុចន្លោះពី១៨ទៅ២៥ឆ្នាំតែប៉ុណ្ណោះ ក៏ប៉ុន្តែបច្ចុប្បន្ន សូម្បីតែបុរសមានប្រពន្ធ មានកូន១ ឬកូន២ទៅហើយនោះ ក៏កំពុងធ្លាក់ខ្លួនក្លាយជាអ្នកញៀនថ្នាំផងដែរ។ គ្រឿងញៀនដែលគេនិយមប្រើប្រាស់នៅតាមទីជនបទភាគច្រើន ជាប្រភេទគ្រឿងញៀនសំយោគ ដែលមានតម្លៃថោក ហើយងាយស្រួលរកទិញ លាក់ទុក និងការប្រើប្រាស់។ បើតាមការសន្និដ្ឋានរបស់សមត្ថកិច្ចថា បច្ចុប្បន្ននេះ ប្រទេសកម្ពុជាមានអ្នកញៀនថ្នាំតែជាង៨៨៣២នាក់ប៉ុណ្ណោះ ក៏ប៉ុន្តែការសន្និដ្ឋានថ្មីៗនេះបានរកឃើញថា កម្ពុជាអាចមានអ្នកញៀនថ្នាំដល់ទៅជិត២ម៉ឺននាក់នៅទូទាំងប្រទេស។
មានកត្តាមួយចំនួន ដែលធ្វើឲ្យការប្រើប្រាស់គ្រឿងញៀន បានរីកសាយភាយទៅដល់ទីជនបទ។ កត្តាទាំងនោះរួមមាន៖
-ទី១ គឺដោយសារតែបញ្ហាចំណាកស្រុក។ មានន័យថា យុវជនខ្មែរដែលធ្វើចំណាកស្រុកពីភូមិដ្ឋានជនបទមកកាន់ទីក្រុងឬចំណាកស្រុកពីជនបទទៅរកការងារធ្វើនៅប្រទេសជិតខាង ដូចជា ប្រទេសថៃជាដើម។ ពួកគេងាយនឹងទទួលការសេពគ្រឿងញៀនជាងគេ។
-ទី២ មកពីការផ្សព្វផ្សាយអប់រំពីគ្រោះថ្នាក់គ្រឿងញៀននៅមានកំរិត ដែលធ្វើឲ្យយុវជន មួយចំនួនយល់ផ្ទុយថា គ្រឿងញៀនគឺជាថ្នាំប៉ូវកម្លាំង អាចបង្កើនប្រសិទ្ធភាពការងារ កាត់បន្ថយភាពនឿយហត់ ធ្វើឲ្យមានភាពសប្បាយរីករាយ និងបង្កើនសមត្ថភាពផ្លូវភេទជាដើម។
ក៏ប៉ុន្តែពួកគេមិនដឹងទេថា ការប្រើប្រាស់គ្រឿងញៀន នាំឲ្យបាត់បង់សតិសម្បជញ្ញៈ ហើយធ្លាក់ខ្លួនជាជនឧក្រឹដ្ឋថែមទៀត ប្រសិនបើបុគ្គលនោះ ឈានទៅប្រើប្រាស់អំពើហិង្សានៅក្នុងគ្រួសារឬសង្គមជាតិ។
-និងទី៣ គឺបណ្តាលមកពីការលក់គ្រឿងញៀនសំយោគនោះ មានតម្លៃថោកពេក ដែលអាចផ្តល់លទ្ធភាពងាយស្រួលដល់យុវជន និងបុរសញៀនថ្នាំទាំងឡាយ នៅតាមទីជនបទ ទិញ-លក់ លាក់ទុក និងប្រើប្រាស់ជាដើម។
យ៉ាងណាក៏ដោយ ប្រឈមនឹងស្ថានភាពនេះ នៅចំពោះមុខ អាជ្ញាធរកម្ពុជាកំពុងចាត់វិធានការមួយចំនួន។ វិធានការទាំងនោះរួមមាន៖
-ការទប់ស្កាត់តំរូវការ
-ការកាត់ផ្តាត់ទីផ្សារ
-ការព្យាបាលដល់អ្នកញៀន
-ការអនុវត្តតាមច្បាប់
-និងការបង្កើនកិច្ចសហប្រតិបត្តិការជាមួយប្រទេសក្បែរខាង ដើម្បីទប់ស្កាត់នៃការហូរចូល គ្រឿងញៀនមកកាន់កម្ពុជាជាដើម។ ពីព្រោះតាមរបាយការណ៍កន្លងមកបានបញ្ជាក់ថា កម្ពុជាមិនមែនជាប្រទេសផលិតនោះទេ តែជាប្រទេសនៃការឆ្លងកាត់គ្រឿងញៀន។
ក៏ប៉ុន្តែមានការចោទសួរថា វិធានការមានហើយ ការបង្រ្កាបក៏មានច្រើនដែរ ចុះហេតុអ្វីបានជាករណីគ្រឿងញៀននៅតែមិនថមថយ? ផ្ទុយទៅវិញ វាកាន់តែកើនឡើងពីមួយឆ្នាំទៅមួយឆ្នាំ ហើយកាន់តែរីកធំទៅៗ។ បើដូច្នេះ តើអនាគត យុវជនខ្មែរនឹងទៅជាយ៉ាងណា? ហើយតើរដ្ឋាភិបាល នឹងដោះស្រាយយ៉ាងណា ចំពោះបញ្ហាសង្គមដ៏ធ្ងន់ធ្ងរដែលនឹងអាចកើតឡើងនៅពេលខាងមុខនេះ?
អ្វីដែលជាវិធានការល្អបំផុតនោះ គឺអាជ្ញាធរត្រូវចាត់វិធានការប្រកបដោយប្រសិទ្ធិភាពខ្ពស់ ដើម្បីបង្ហាញស្នាដៃឲ្យប្រជាពលរដ្ឋខ្មែរនៅទូទាំងប្រទេសឃើញថា ៩ខែឆ្នាំក្រោយ គ្រឿងញៀននឹងត្រូវបានកាត់បន្ថយបានខ្លះពីប្រទេសកម្ពុជា ឬស្ទើរតែអស់ពីប្រទេសកម្ពុជា ជាពិសេសពីគ្រប់ច្រកល្ហកនៃជនបទស្រុកស្រែចំការតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ