បញ្ហាអន្តោប្រវេសន៍ជាគ្រោះថ្នាក់ដែលត្រូវរួមគ្នាដោះស្រាយជាបន្ទាន់!
ចុះផ្សាយនៅថ្ងៃ៖
ស្តាប់ - ០៤:៤៧
អន្តោប្រវេសន៍វៀតណាមគឺជាបញ្ហាដ៏ចំណាស់មួយដែលតែងបានដុតកម្តៅឆាកនយោបាយប្រទេសកម្ពុជាប្រៀបបាននឹងស្រមោលអន្ទោលតាមប្រាណ។ ក្រោយការដួលរលំនៃរបបខ្មែរក្រហម ជនអន្តោប្រវេសន៍វៀតណាមខុសច្បាប់នៅលើទឹកដីកម្ពុជាក៏បានក្លាយជាប្រធានបទក្តៅសារជាថ្មី ។ បញ្ហានេះត្រូវបានបក្សប្រឆាំងចាត់ទុកជាអាវុធដ៏មានប្រសិទ្ធភាពក្នុងការវាយប្រហារទៅលើបក្សកាន់អំណាច។ ការដណ្តើមប្រជាប្រិយភាពនយោបាយជារឿងមួយ ប៉ុន្តែ គ្រោះថ្នាក់ចំពោះប្រទេសជាតិជារឿងដ៏ធំធេងមួយដែលត្រូវគិតគូរ។ ដូច្នេះ អ្នកនយោបាយខ្មែរត្រូវរួមគ្នាដើម្បីដោះស្រាយបញ្ហានេះជាបន្ទាន់។
ចំណោទបញ្ហាអន្តោប្រវេសន៍ខុសច្បាប់ជាពិសេសអន្តោប្រវេសន៍វៀតណាមដែលជាបញ្ហាដ៏ចំណាស់មួយរបស់កម្ពុជាតាំងពីរាប់ជំនាន់មកហើយនោះ នៅតែជាប្រធានបទក្តៅគគុកនិងដ៏ចម្រូងចម្រាសមួយសម្រាប់ប្រទេសដែលទើបតែងើបចេញពីភាពខ្ទេចខ្ទាំមួយនេះ។
គ្មានស្ថិតិគួរឲ្យជឿជាក់ណាមួយស្តីពីចំនួនជនអន្តោប្រវេសន៍ខុសច្បាប់ត្រូវបានគេបង្ហាញនៅឡើយទេ។ រដ្ឋាភិបាលធ្លាប់បានបញ្ជាក់ថា អន្តោប្រវេសន៍វៀតណាមនៅលើទឹកដីកម្ពុជាមានចំនួនប្រហែលមួយសែននាក់ ខណៈដែលគណបក្សប្រឆាំងនិងមជ្ឈដ្ឋានខ្លះប៉ាន់ប្រមាណថាមានរហូតដល់ទៅរាប់លាននាក់ឯណោះ។ ជនអន្តោប្រវេសន៍វៀតណាមខ្លះចេះនិយាយភាសាខ្មែរច្បាស់លាស់និងមានអត្តសញ្ញាណប័ណ្ណជនជាតិខ្មែរ ខណៈដែលខ្លះទៀតចេះនិយាយភាសាខ្មែរបន្តិចបន្ទួចឬមិនចេះសោះក៏មាន។
ជាការពិតណាស់ ការរស់នៅចម្រុះជាតិសាសន៍និងបានទទួលសញ្ជាតិពីប្រទេសដែលពួកគេកំពុងរស់នៅមិនមែនជារឿងចម្លែកទេសម្រាប់ពិភពលោកបើកចំហជើងមេឃដូចជាបច្ចុប្បន្ន។ ប៉ុន្តែ បញ្ហាដោយឡែករបស់កម្ពុជាគឺនៅត្រង់ថា ការគ្រប់គ្រងជនអន្តោប្រវេសន៍មានភាពធូររលុងដោយមិនបានគោរពតាមនីតិវិធីច្បាប់ឲ្យបានត្រឹមត្រូវឡើយ។ ម្យ៉ាងទៀត បញ្ហាអន្តោប្រវេសន៍វៀតណាមគឺជារឿងដ៏រសើបមួយសម្រាប់ប្រទេសកម្ពុជាដោយសារតែប្រទេសទាំងពីរធ្លាប់មានជម្លោះបញ្ហាទឹកដីដ៏ជូរចត់ជាមួយគ្នា។ ជាក់ស្តែង បញ្ហាកម្ពុជាក្រោមនិងកោះត្រល់ដែលនៅតែជារឿងក្តៅគគុករហូតដល់បច្ចុប្បន្នគឺជាឧទាហរណ៍ស្រាប់។
រឿងប្រវត្តិសាស្ត្រពីអតីតកាលជាបញ្ហាមួយ ប៉ុន្តែ អ្វីដែលបានកើតឡើងក្រោយពីរបបខ្មែរក្រហមជារឿងថ្មីដែលបន្ថែមទម្ងន់ពីលើរឿងចាស់។ កងទ័ពវៀតណាមដែលបន្តស្ថិតនៅលើទឹកដីកម្ពុជាអស់រយៈពេល ១០ ឆ្នាំ ក្រោយពីវាយផ្តួលរំលំរបបខ្មែរក្រហម និងការគ្រប់គ្រងបែបធូររលុងរបស់អាជ្ញាធរកម្ពុជាក្នុងរយៈពេលជាងពីរទសវត្សរ៍ចុងក្រោយបានផ្តល់ឱកាសឲ្យជនអន្តោប្រវេសន៍វៀតណាមជាច្រើនមានវត្តមាននៅលើទឹកដីកម្ពុជា។ ហេតុដូច្នេះហើយបានជាបញ្ហាព្រំដែននិងបញ្ហាអន្តោប្រវេសន៍វៀតណាម នៅតែជាប្រធានបទដ៏ក្តៅគគុកដែលដុតកម្តៅឆាកនយោបាយកម្ពុជាមិនចេះចប់ក្នុងបរិបទដែលគណបក្សកាន់អំណាចរងការចោទប្រកាន់ថាស្ថិតក្រោមឥទ្ធិពលរបស់វៀតណាម។
ចុងក្រោយនេះ រដ្ឋាភិបាលគណបក្សប្រជាជនកម្ពុជាបានចាត់វិធានការចាប់បញ្ជូនជនអន្តោប្រវេសន៍ខុសច្បាប់ត្រឡប់ទៅប្រទេសដើមវិញជាបន្តបន្ទាប់ក្នុងនោះ ៩០ ភាគរយជាជនជាតិវៀតណាម។ នេះជាសញ្ញាល្អមួយក្នុងការដោះស្រាយបញ្ហាជនអន្តោប្រវេសន៍នៅកម្ពុជា។ ប៉ុន្តែ ដើម្បីដោះស្រាយបញ្ហានេះប្រកបដោយប្រសិទ្ធភាព មានកត្តាចាំបាច់ចំនួនមួយចំនួនមិនអាចខ្វះបានៈ ទី១គឺ ឆន្ទៈពិតប្រាកដក្នុងការដោះស្រាយដោយឈរលើផលប្រយោជន៍ជាតិជាធំ។ ទី២គឺ កិច្ចសហការគ្នារវាងអ្នកនយោបាយគ្រប់និន្នាការជាពិសេសគឺរវាងគណបក្សកាន់អំណាចនិងបក្សប្រឆាំងពោលគឺអ្នកនយោបាយខ្មែរគួរចេះលេងល្បែងដែលផ្តល់ផលចំណេញដល់ជាតិដោយមិនគួរយកបញ្ហាដ៏សំខាន់នេះមកលាភពណ៌គ្នាដើម្បីកេងចំណេញត្រឹមតែប្រជាប្រិយភាពនយោបាយនោះឡើយ។ និងទី៣គឺ ការអនុវត្តច្បាប់អន្តោប្រវេសន៍ដែលមានស្រាប់ឲ្យបានតឹងរ៉ឹង។
តាមពិត ប្រទេសកម្ពុជាមានច្បាប់ស្តីពីអន្តោប្រវេសន៍តាំងពីឆ្នាំ ១៩៩៤ មកម្ល៉េះ។ ដូច្នេះ វានៅខ្វះតែឆន្ទៈក្នុងការអនុវត្តតែប៉ុណ្ណោះ។ ប្រសិនបើអ្នកនយោបាយខ្មែរមានឆន្ទៈហើយចេះសហការណ៍គ្នាដើម្បីការពារផលប្រយោជន៍ជាតិ ពួកគេច្បាស់ជាអាចរួមគ្នាយកច្បាប់ដែលមានស្រាប់នេះមកអនុវត្តដើម្បីដោះស្រាយបញ្ហាអន្តោប្រវេសន៍ឲ្យមានប្រសិទ្ធភាពជាមិនខាន។ ការដោះស្រាយបញ្ហាអន្តោប្រវេសន៍តាមច្បាប់គឺអាចធានាបាននូវផលប្រយោជន៍ជាតិកម្ពុជាផងនិងធានាការគោរពសិទ្ធិជនអន្តោប្រវេសន៍ឲ្យចៀសផុតពីការរើសអើងពូជសាសន៍ផង។
ប្រសិនបើបញ្ហាអន្តោប្រវេសន៍អាចដោះស្រាយបានមែន កម្ពុជាទទួលផលចំណេញច្រើនយ៉ាងណាស់ពោលគឺផលប្រយោជន៍ជាតិត្រូវបានធានា រីឯការលាបពណ៌គ្នាក៏លែងមានទៀតដែរ។ ផ្ទុយទៅវិញ ការបណ្តែតបណ្តោយឲ្យបញ្ហាអន្តោប្រវេសន៍បន្តស្ថិតនៅចាក់ស្រេះកាន់តែស្មុគស្មាញនិងកាន់តែយូរអង្វែងតទៅទៀត វាគឺជាគ្រោះថ្នាក់ធំធេងសម្រាប់ប្រទេសជាតិយ៉ាងពិតប្រាកដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ