ក្រសួងសុខាភិបាលផ្ដើមចុះធ្វើយុទ្ធនាការផ្ដល់ថ្នាំបង្ការជម្ងឺរលាកខួរក្បាលជេអ៊ី
ក្រសួងសុខាភិបាលកម្ពុជា ផ្ដើមចុះធ្វើយុទ្ធនាការផ្ដល់ថ្នាំបង្ការជម្ងឺរលាកខួរក្បាលជេអ៊ី(Japanese Encephalitis) ដល់កុមារទាំងអស់នៅទូទាំងប្រទេស ដែលមានអាយុចាប់ពី៩ខែដល់១៥ឆ្នាំ។ យុទ្ធនាការនេះនឹងប្រព្រឹត្តទៅរយៈពេលមួយខែ ដោយគិតចាប់ពីថ្ងៃទី០១មីនា នេះតទៅ។ ប្រជាពលរដ្ឋអាចទៅរកសេវានៃការផ្ដល់ថ្នាំបង្កានេះបាននៅតាមភូមិ សាលារៀនរដ្ឋ និងឯកជន តាមមូលដ្ឋានដែលពួកគាត់រស់នៅ។
ចុះផ្សាយនៅថ្ងៃ៖
ស្តាប់ - ០១:៣១
គោលបំណងនៃការផ្ដល់ថ្នាំបង្ការជម្ងឺរលាកខួរក្បាលជេអ៊ី ដោយសារតែប្រភេទជម្ងឺមួយនេះ អាចបណ្ដាលឲ្យកុមារស្លាប់ឬពិការបានចន្លោះពី ២០ទៅ៣០ភាគរយ ។ ក្នុងនោះ៥០ភាគរយទៀតពិការក្នុងរូបភាពធ្ងន់ធ្ងរ។ ហើយកុមារនៅកម្ពុជាពុំទាន់កើតមានជម្ងឺរលាកខួរក្បាលជេអ៊ីនៅឡើយទេ។
ថ្លែងប្រាប់វិទ្យុបារាំងអន្តរជាតិRFI លោកស្រីវេជ្ជបណ្ឌិត ទុង រដ្ឋាវី ប្រធានមជ្ឈមណ្ឌលជាតិគាំពារមាតានិងទារកនៃក្រសួងសុខាភិបាលឲ្យដឹងថា ជម្ងឺរលាកខួរក្បាលជេអ៊ីនេះគឺប្រទេសជប៉ុនជាអ្នករកឃើញវ៉ាក់សាំងឈ្មោះជេអ៊ី។ ហើយការចាក់វ៉ាក់សាំងជេអ៊ី ជាវិធីសាស្ត្រដ៏មានប្រសិទ្ធិភាពតែមួយគត់នៅក្នុងការប្រយុទ្ធនឹងជម្ងឺរលាកខួរក្បាលជេអ៊ីនេះ។
បន្ទាប់ពីយុទ្ធនាការរយៈពេលមួយខែនេះត្រូវបានបញ្ចប់វ៉ាក់សាំងជេអ៊ីនឹងត្រូវបញ្ចូលជាវ៉ាក់សាំងធម្មតាសម្រាប់ចាក់ការពារកុមាររៀងរាល់ថ្ងៃនៅតាមមណ្ឌលសុខភាព។ លោកស្រី ទុង រដ្ឋាវី បានគូសបញ្ជាក់ថា ជម្ងឺរលាកខួរក្បាលជេអ៊ីនេះផ្សេងពីជម្ងឺរលាកស្រោមខួរក្បាល។ ព្រោះថា វ៉ាក់សាំងចាក់ការពារជម្ងឺរលាកស្រោមខួរក្បាលកម្ពុជាមានរួចហើយដោយរួមបញ្ចូលគ្នាជាមួយវ៉ាក់សាំងការពារសួត។ ចំពោះវ៉ាក់សាំងជេអ៊ីគឺថ្នាំការពារទី១១ហើយដែលមជ្ឈមណ្ឌលជាតិគាំពារមាតានិងទារកនៃក្រសួងសុខាភិបាលទទួលបានពីប្រទេសម្ចាស់ជំនួយ។
លោកស្រី ចាត់ទុកថា យុទ្ធនាការផ្ដល់ថ្នាំបង្ការជម្ងឺរលាកខួរក្បាលជេអ៊ីនេះ ជាការបោះជំហ៊ានទៅមុខមួយកម្រិតទៀតដែលមានកំណត់ក្នុងទិសដៅការពារសុខមាលភាពរបស់កុមារ កុំឲ្យមានជម្ងឺនាពេលអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ