សាលាក្រុងភ្នំពេញ អនុញ្ញាតឱ្យសហគមន៍ខ្មែរកម្ពុជាក្រោមធ្វើពិធីរំឮកខួប៦៨ឆ្នាំ ប៉ុន្តែ មិនអនុញ្ញាតឱ្យហែក្បួនដាក់ញត្តិទៅកាន់រដ្ឋសភា
សហគមន៍ខ្មែរកម្ពុជាក្រោម នៅថ្ងៃទី ២៤ ខែមិថុនាខាងមុខនេះ នឹងប្រារព្វពិធីរំឭកខួប៦៨ឆ្នាំ នៃការបាត់បង់ទឹកដីកម្ពុជាក្រោម, នៅវត្តចាស់ ត្រើយខាងកើត ទល់មុខព្រះរាជវាំង ដោយមានការរាប់បាត្រព្រះសង្ឃចំនួន ១៩៤៩អង្គ។ ហើយបើតាមគម្រោង នៅថ្ងៃទី២៦មិថុនា សហគមន៍ខ្មែរកម្ពុជាក្រោម នឹង ដង្ហែក្បួនដាក់ញត្តិទៅកាន់រដ្ឋសភា ដើម្បីស្នើសុំបញ្ចូលថ្ងៃទី៤មិថុនា ជាទិវាកាន់ទុក្ខជាតិខ្មែរ។ ប៉ុន្តែសំណើដាក់ញត្តិនេះ ត្រូវបានសាលាក្រុងបដិសេធ!
ចុះផ្សាយនៅថ្ងៃ៖
ស្តាប់ - ០១:៣៩
លោក ថាច់ សេដ្ឋា នាយកប្រតិបត្តិសហគមន៍ខ្មែរកម្ពុជាក្រោមបានឱ្យដឹងថា លោកនឹងពិចារណាចំពោះការបដិសេធ របស់សាលាក្រុងភ្នំពេញនេះ។ ប៉ុន្តែលោកបញ្ជាក់ថា ញតិ្តគឺត្រូវបញ្ជូនទៅកាន់រដ្ឋសភា បើទោះបីជាគ្មានការហែក្បួនក៏ដោយ។
លោកបានលើកឡើងថា រដ្ឋសភាគួរតែពិចារណាចំពោះសំណើរ ដែលចង់សុំបញ្ចូលថ្ងៃទី៤មិថុនា ជាទិវាកាន់ទុក្ខជាតិខ្មែរ, ពីព្រោះវាជាថ្ងៃដែល ប្រជាពលរដ្ឋ និង ក្មេងជំនាន់ក្រោយ គួរតែចងចាំអំពីប្រវត្តិសាស្ត្រដ៏ជូរចត់ដែលបារំាងបានកាត់ទឹកដីកម្ពុជាក្រោមទៅឱ្យវៀតណាម។ ហើយក៏ដូចជារំលឹក និង ដឹងគុណចំពោះវីរបុរសខ្មែរយើង ដែលបានតស៊ូពលីជីវិត នៅក្នុងបុព្វហេតុការពារជាតិ និងទឹកដី ។
យោងតាមប្រវត្តិសាស្ត្រ ទឹកដីកម្ពុជាក្រោម ឬហៅថា កូសាំងស៊ីនរបស់នគរខ្មែរ ត្រូវបាននគរអាណ្ណាមចូលមកកាន់កាប់ និងកាត់យកទៅធ្វើជាទឹកដីបស់ខ្លួនចាប់តាំងពីក្នុងអំឡុងសតវត្សរ៍ទី១៧ មុននឹងត្រូវបារាំងច្បាំងដណ្តើមយកមកកាន់កាប់នៅឆ្នាំ ១៨៦២។
ការណ៍ដែលបារាំងសម្រេចកាត់ទឹកដីកម្ពុជាក្រោមទៅឲ្យវៀតណាមត្រូវបាន ធ្វើឡើង នៅក្នុងបរិបទនៃសង្រ្គាមឥណ្ឌូចិន ដែលបារាំងត្រូវប្រឈមមុខនឹងចលនាឧទ្ទាមកុម្មុយនិស្តវៀតណាម គឺពួកវៀតមិញ។ នៅថ្ងៃទី៤ ខែមិថុនា ឆ្នាំ១៩៤៩ សភាបារាំងក៏បានអនុម័តច្បាប់មួយបញ្ចប់លក្ខន្តិកៈជាទឹកដីនៅនាយសមុទ្ររបស់កូសាំងស៊ីន ដោយភ្ជាប់អតីតដែនដីរបស់នគរខ្មែរនេះ ទៅជាមួយនឹងប្រទេសវៀតណាម៕
គួរជម្រាបជូនថា ជារៀងរាល់ឆ្នាំឱ្យតែដល់ថ្ងៃទី៤ ខែមិថុនា សហគមន៍ខ្មែរកម្ពុជាក្រោមតែងតែប្រារព្វពិធីរំឭកខួបនៃការបាត់បង់ទឹកដីកម្ពុជាក្រោម។ ដោយឡែក ឆ្នាំ២០១៧នេះ ប្រទេសកម្ពុជាមានការរៀបចំបោះឆ្នោត ឃុំសង្កាត់ ចំ ថ្ងៃទី៤មិថុនា ដូច្នេះហើយសហមន៍ខ្មែរកម្ពុជាក្រោមសម្រេចលើកពេលនឹងយកថ្ងៃទី ២៤មិថុនា ជំនួសវិញ ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ