លោកថាច់ សេដ្ឋា៖ ឯកសារទឹកដីកម្ពុជាក្រោមទាំង៥ពាន់ទំព័រ នឹងមកដល់កម្ពុជានៅចុងខែក្រោយ
ឯកសារពាក់ព័ន្ធនឹងការកាត់ទឹកដីកម្ពុជាក្រោមទៅឲ្យប្រទេសវៀតណាមទាំង៥ពាន់ទំព័រដែលសហគមន៍ខ្មែរកម្ពុជា និងសម្ព័ន្ធយុវជនខ្មែរដើម្បីលទ្ធិប្រជាធិបតេយ្យបានរកឃើញនៅក្នុងប្រទេសបារាំងនោះ នឹងត្រូវបញ្ជូនមកដល់ប្រទេសកម្ពុជានៅចុងខែមិថុនា ខាងមុខនេះ។ នេះបើតាមលោកថាច់ សេដ្ឋា ប្រធានសហគមន៍ខ្មែរកម្ពុជា ដែលបានបញ្ជាក់ប្រាប់វិទ្យុបារាំងអន្តរជាតិនៅព្រឹកថ្ងៃសុក្រ ទី០៨ ឧសភានេះ។
ចុះផ្សាយនៅថ្ងៃ៖
ស្តាប់ - ០២:៣០
នៅពេលនេះឯកសារពាក់ព័ន្ធនឹងការកាត់ទឹកកម្ពុជាក្រោមទៅឲ្យប្រទេសវៀតណាមចំនួន៥ពាន់ទំព័រកំពុងត្រូវបានថតចម្លងពីចេញពីសំណៅឯកសារដើម។ លោកថាច់ សេដ្ឋា ប្រធានសហគមន៍ខ្មែរកម្ពុជា បានឲ្យដឹងថា ឯកសារទាំង៥ពាន់ទំព័រនោះ ត្រូវបានថតចម្លងបានជាងពាក់កណ្តាលហើយ។
ឯកសារទាំង៥ពាន់ទំព័រនេះ ត្រូវបានសហគមន៍ខ្មែរកម្ពុជាក្រោម និងសម្ព័ន្ធយុវជនខ្មែរ ដើម្បីលទ្ធិប្រជាធិបតេយ្យ បានរកឃើញនៅក្នុងបណ្ណាសារដ្ឋានជាតិបារាំង នៅខេត្តអេ អង់ប្រូវ៉ង់ (Aix-en-Provence) ប្រទេសបារាំង តាមការណែនាំរបស់ស្ថានទូតបារាំង ប្រចាំនៅកម្ពុជា។ ឯកសារទាំងនោះ រួមមានដូចជា ព្រះរាជសារព្រះករុណាព្រះបាទនរោត្តមផ្ញើរជូនរដ្ឋាភិបាលបារាំង កិច្ចព្រមព្រៀងបារាំងវៀតណាមនៅឆកសមុទ្រហាឡុង នៅដាឡាត់ និងនៅហ្វុងតេនណឺប្លូជាដើម។ ក្រៅពីនេះ សហគមន៍ខ្មែរកម្ពុជាក្រោម និងសម្ព័ន្ធយុវជនខ្មែរ ដើម្បីលទ្ធិប្រជាធិបតេយ្យ ក៏បានរកឃើញកំណត់ហេតុប្រជុំសភាបារាំងក្នុងការកាត់ទឹកដីខ្មែរឲ្យ វៀតណាមថ្ងៃទី០៤ មិថុនាឆ្នាំ១៩៤៩ សន្ធិសញ្ញាបារាំងវៀតណាម និងកំណត់ហេតុចរចាផ្សេងៗ ព្រមទាំងលិខិតឆ្លងឆ្លើយសម្ងាត់ជាច្រើនដែលទាក់ទងនឹងការកាត់ផ្ទេរទឹកដីខ្មែរឲ្យប្រទេសវៀតណាម។
ចំពោះការថតចម្លងឯកសារទាំងនោះ លោកថាច់ សេដ្ឋា បានបញ្ជាក់ថា ត្រូវចំណាយទឹកប្រាក់ប្រមាណចំនួន ១ម៉ឺន៦ពាន់អឺរ៉ូ ឫប្រមាណជាង១ម៉ឺន៨ពាន់ដុល្លារអាមេរិក។ ក៏ប៉ុន្តែសហគមន៍ខ្មែរកម្ពុជាក្រោមនៅខ្វះថវិកាមួយចំនួនទៀតនៅឡើយសម្រាប់ការថតចម្លងឯកសារទាំងនោះ។ ទោះជាបែបនេះក្តី លោកថាច់ សេដ្ឋា បានគូសបញ្ជាក់ថា បើមានថវិកាគ្រប់គ្រាន់ ឯកសារទាំង៥ពាន់ទំព័រនឹងបញ្ចប់ការថតចម្លងនៅពាក់កណ្តាលខែមិថុនា និង បញ្ជូនមកកាន់ប្រទេសកម្ពុជានៅចុងខែដដែល។ បើតាមលោកថាច់ សេដ្ឋា បន្ទាប់ពីបញ្ចប់ការថតចម្លង សហគមន៍ខ្មែរកម្ពុជាក្រោមនឹងផ្ញើរឯកសារទាំងនោះនៅធនាគារឯកសារនៅក្នុងប្រទេសបារាំង ដើម្បីជួយរក្សាទុក ប៉ុន្តែត្រូវបង់ថ្លៃសេវាចំនួន១១០អឺរ៉ូ ឫប្រមាណ១២០ដុល្លារអាមេរិកក្នុងមួយឆ្នាំ។
យ៉ាងណាក៏ដោយ ក្រោយពីឯកសារទាំងនោះមកប្រទេសកម្ពុជា សហគមន៍ខ្មែរកម្ពុជាក្រោមនឹងធ្វើការបកប្រែជាផ្លូវការនូវឯកសារ ទាំងនោះពីភាសាបារាំងមកជាភាសាខ្មែរ និងអង់គ្លេស។ បន្ទាប់មកសហគមន៍ខ្មែរកម្ពុជាក្រោម នឹងដាក់ជូនទៅកាន់ក្រសួងអប់រំ ដើម្បីស្នើសុំបញ្ចូលក្នុងកម្មវិធីសិក្សា តម្កល់នៅរាជ្យបណ្ឌិតសភាកម្ពុជា និងអង្គការយូណេស្តូ ដើម្បីរក្សាទុកជាប្រវត្តិសាស្ត្រជាតិ។ ហើយអ្វីដែលចាំបាច់ជាងនេះទៀតនោះ គឺសហគមន៍ខ្មែរកម្ពុជាក្រោម នឹងយកឯកសារទាំងនោះ ដាក់ទៅកាន់ស្ថានទូតវៀតណាមប្រចាំនៅកម្ពុជា ដើម្បីបញ្ជាក់ពីប្រវត្តិសាស្ត្រពិតនៃទឹកដីកម្ពុជាក្រោម និងទាមទារឲ្យរដ្ឋាភិបាលវៀតណាមសុំទោសជាសាធារណៈចំពោះការលើកឡើងរបស់ អ្នកនាំពាក្យស្ថានទូតរបស់ខ្លួនដែលថា ទឹកដីកម្ពុជាក្រោមជារបស់វៀតណាមតាំងពីយូរយារណាស់មកហើយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ