ស្ថានទូតអាមេរិកនិងអង់គ្លេសណែនាំពលរដ្ឋខ្លួន ឲ្យជៀសពីផ្លូវដែលក្បួនដង្ហែសពលោក កែម ឡី ឆ្លងកាត់
ស្ថានទូតសហរដ្ឋអាមេរិក និងអង់គ្លេស ប្រចាំនៅក្រុងភ្នំពេញ នៅថ្ងៃទី២២កក្កដានេះ បានចេញសេចក្តីជូនដំណឹងខ្លីដល់ពលរដ្ឋរបស់ខ្លួនឲ្យជៀសឆ្ងាយពីផ្លូវដែលក្បួនដង្ហែសពលោកកែម ឡី ត្រូវឆ្លងកាត់នៅថ្ងៃអាទិត្យ ទី២៤ កក្កដាខាងមុខនេះ។ ការកក់ស្ទះចរាចរណ៍រយៈពេលយូ គឺជារឿងមួយហើយ តែបញ្ហាសន្តិសុខ សុវត្ថិភាពរបស់ពួកគេក៏ជារឿងចាំបាច់ផងដែរ។
ចុះផ្សាយនៅថ្ងៃ៖
ស្តាប់ - ០២:១១
មនុស្សម្នារាប់ម៉ឺននាក់ ត្រូវបានគេរំពឹងថា នឹងចូលរួមនៅក្នុងក្បួនដង្ហែសពលោកកែម ឡី អ្នកវិភាគព្រឹត្តិការណ៍សង្គម និងនយោបាយដ៏ល្បីល្បាញនៅកម្ពុជា នាថ្ងៃអាទិត្យ ទី២៤ កក្កដា ចុងសប្តាហ៍នេះ ដោយឆ្លងកាត់មហាវិថីសំខាន់ៗនៅក្នុងទីក្រុងភ្នំពេញ ពិសេសមហាវិថីសហព័ន្ធរុស្ស៊ី។ ម្ល៉ោះហើយ នៅថ្ងៃទី២២កក្កដានេះ ស្ថានទូតបរទេសពីរ គឺសហអាមេរិក និងស្ថានទូតអង់គ្លេស បានជូនដំណឹងទៅដល់ប្រជាពលរដ្ឋរបស់ខ្លួន កុំឲ្យកាត់តាមមហាវិថីទាំងនោះ ដើម្បីជៀសវាងការកកស្ទះចរាចរណ៍រយៈពេលយូរ។
ការកក់ស្ទះចរាចរណ៍ក្នុងរយៈពេលយូរ គឺជារឿងមួយហើយ ក៏ប៉ុន្តែបញ្ហាសន្តិសុខ សុវត្ថិភាពរបស់ពលរដ្ឋអាមេរិក និងអង់គ្លេស ក៏ជារឿងចាំបាច់។ នេះបើតាមសេចក្តីជូនដំណឹងខ្លីរបស់ស្ថានទូតអាមេរិកប្រចាំនៅទីក្រុងភ្នំពេញ តាមរយៈបណ្តាញសង្គម Facebook និង Twitterនៅថ្ងៃនេះ។
ចំណែកស្ថានទូតអង់គ្លេសប្រចាំនៅទីក្រុងភ្នំពេញវិញ ក៏បានបង្ហាញការព្រួយបារម្ភដូចគ្នានេះដែរ។ នៅក្នុងសេចក្តីជូនដំណឹងមួយដល់ពលរដ្ឋរបស់ខ្លួន ស្ថានទូតអង់គ្លេសបានណែនាំពលរដ្ឋរបស់ខ្លួនកុំឲ្យឆ្លងកាត់ព្រលានយន្តហោះអន្តរជាតិភ្នំពេញ នៅថ្ងៃអាទិត្យខាងមុខនេះ ព្រោះថា ក្បួនដង្ហែសពលោក កែម ឡី នឹងត្រូវឆ្លងកាត់។ ក្រៅពីនេះ ស្ថានទូតអង់គ្លេស ក៏បានលើកឡើងពីការព្រួយបារម្ភនៃជម្លោះនយោបាយ ដែលកំពុងឡើងកម្តៅនៅកម្ពុជានឹងបានណែនាំពលរដ្ឋរបស់ខ្លួនឲ្យជៀសឆ្ងាយពីការជួបជុំ ដែលមានមនុស្សម្នាច្រើនបែបនេះ។
គួរកត់សម្គាល់ថា ការអំពាវនាវរបស់ស្ថានទូតបរទេសទាំងពីរនេះ ផ្ទុយស្រឡះពីក្រុមមេដឹកនាំអង្គការសង្គមស៊ីវិលនៅកម្ពុជាមួយចំនួននៅថ្ងៃនេះ ដែលបានអំពាវនាវឲ្យប្រជាពលរដ្ឋខ្មែរចូលរួមដង្ហែសពលោក កែម ឡី ឲ្យបានច្រើនកុះករ។ នៅថ្ងៃនេះ ក្រុមមេដឹកនាំអង្គការសង្គមស៊ីវីលនៃផ្ទះសាមគ្គី រួមមាន លោក វន ពៅ ប្រធានសមាគមប្រជាធិបតេយ្យ ឯករាជ្យ នៃសេដ្ឋកិច្ចក្រៅប្រព័ន្ធ បានអំពាវនាវឲ្យសមាជិករបស់ខ្លួនចូលរួមជូនដំណើរចុងក្រោយសពលោកបណ្ឌិត កែម ឡី ដែលពួកគេចាត់ទុកថា “ជាវីរៈជននៃសេរីភាពខាងការបញ្ចេញមតិ“ នៅថ្ងៃទី២៤កក្កដាខាងមុខនេះ។ ក្រៅពីនេះ នៅមានប្រធាន និងសកម្មជននៃអង្គការសង្គមស៊ីវិលមួយចំនួនទៀត ក៏បានអំពាវនាវដូចគ្នានេះដែរ។
សូមបញ្ជាក់ថា ក្បួនដង្ហែសពលោក កែម ឡី នឹងធ្វើឡើងដោយរថយន្ត និងម៉ូតូ ដោយប្រើពេលជាង៧ម៉ោង លើប្រវែងផ្លូវជាង៨៧គីឡូម៉ែត្រ (៨៧.៣ គ.ម) ពីភ្នំពេញទៅកាន់ខេត្តតាកែវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ