លោកកឹម សុខា បួងសួងសុំយុត្តិធម៌ពិត ខណៈលោកកំពុងប្រឈមការចាប់ខ្លួន
ដូចការគ្រោងទុកនៅព្រឹកនេះ ថ្នាក់ដឹកនាំគណបក្សសង្រ្គោះជាតិ បានរៀបចំកម្មវិធីសូត្រមន្ដ និងប្រគេនចង្ហានដល់ព្រះសង្ឃរាប់រាយអង្គនៅទីស្នាក់កណ្តាលគណបក្ស ដើម្បីសូមកុំឲ្យមានការរំលោភបំពានលើអភ័យឯកសិទ្ធិសភា។ ឆ្លៀតក្នុងឱកាសនោះ លោកកឹម សុខា ប្រធានស្តីទីគណបក្សសង្រ្គោះជាតិ បានបួងសួងសុំឲ្យសង្គមកម្ពុជាមានយុត្តិធម៌ពិត យុត្តិធម៌សម្រាប់ទាំងអស់គ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
លោកកឹម សុខា ៖ "ខ្ញុំសូមបួងសួងឲ្យបារមីព្រះពុទ្ធ ព្រះធម៌ ព្រះសង្ឃដែលយើងប្រារព្ធពិធីថ្ងៃនេះ សូមឧទ្ទិសដល់គុណបុណ្យទាំងអស់ សូមជួយធ្វើយ៉ាងណាឲ្យទឹកដីកម្ពុជាមានសន្តិភាពពិត សន្តិភាពសម្រាប់ទាំងអស់គ្នា មានយុត្តិធម៌ពិត យុត្តិធម៌សម្រាប់ទាំងអស់គ្នា សេរីភាពពិត គឺសេរីភាពសម្រាប់ទាំងអស់គ្នា ខ្មែរសុខទាំងអស់គ្នា ខ្មែរឈ្នះទាំងអស់គ្នា " ។
លោកកឹម សុខា បានបួងសួងដូច្នេះនៅចំពោះមុខព្រះសង្ឃ អ្នកតំណាងរាស្រ្ត សកម្មជន និងអ្នកគាំទ្ររាប់រាយអង្គ និងនាក់នៅទីស្នាក់ការកណ្តាលគណបក្ស។ ជាមួយការបួងសួងសុំយុត្តិធម៌ពិតទាំងខ្លួនកំពុងប្រឈមនឹងការចាប់ខ្លួននេះ លោកកឹម សុខា ក៏បានថ្លែងអំណរគុណដល់អ្នកគាំទ្ររបស់ខ្លួន ដែលបានតស៊ូ ដើម្បីទាមទារនូវសិទ្ធសេរីភាព យុត្តិធម៌ ជាពិសេសទាមទារការពារនូវអភ័យឯកសិទ្ធិសភារបស់អ្នកតំណាងរាស្រ្តគណបក្សសង្រ្គោះជាតិ។
សូមជម្រាបជូនថា នេះគឺការថែ្លងសុន្ទរកថាសាធារណៈជាលើកដំបូងហើយរបស់លោកកឹម សុខា បន្ទាប់ប្រធានស្តីទីគណបក្សប្រឆាំងរូបនេះ បានមកស្នាក់នៅទីស្នាក់ការកណ្តាលគណបក្សអស់រយៈពេល១៤ថ្ងៃគិតត្រឹមពេលនេះ ក្រោយពីលោកមានក្តីក្តាំនៅតុលាការ និងត្រូវបានអាជ្ញាធររដ្ឋាភិបាលស្វែងរកចាប់ខ្លួន។ អំឡុងពេលស្នាក់នៅទីនោះ អ្នកគាំទ្រគណបក្សសង្រ្គោះជាតិរាប់សិបនាក់ បានប្រមូលផ្តុំគ្នាជារៀងរាល់ថ្ងៃ ដើម្បីឃ្លាំមើល និងគាំទ្រអ្នកដឹកនាំរបស់ពួកគេ។ សកម្មភាពទាំងនេះ ត្រូវបានលោកកឹម សុខាចាត់ទុកថា គឺជាការតស៊ូ ដែលមានការលះបង់ខ្ពស់បំផុត។ យ៉ាងណាក៏ដោយ លោកកឹម សុខា គូសបញ្ជាក់ប្រាប់អ្នកគាំទ្ររបស់ខ្លួន ថាគណបក្សសង្រ្គោះជាតិនៅតែប្រកាន់ខ្ជាប់នូវការតស៊ូដោយអហិង្សា។
ក្រៅពីពិធីសាសនាបន់ស្រន់ ដើម្បីសូមកុំឲ្យមានការរំលោភបំពានលើអភ័យឯកសិទ្ធិសភានៅថ្ងៃនេះ គណបក្សសង្រ្គោះជាតិក៏មានកម្មវិធីជាបន្តបន្ទាប់ទៀតដែរ នោះគឺនៅព្រឹកថ្ងៃទី ១៣ មិថុនា គណបក្សនឹងរៀបការ កម្មវិធីទទួលញត្តិ និងការសម្តែងមតិរបស់ពលរដ្ឋ។ ចំណែកនៅព្រឹកថ្ងៃទី ១៤ មិថុនាវិញ នឹងរៀបចំជួបជុំមហាជនដោយសន្តិវិធីទៅទីស្នាក់ការកណ្តាលគណបក្ស។ កាលពីថ្ងៃចន្ទ គណៈកម្មាធិការអចិន្ត្រៃយ៍គណបក្សសង្រ្គោះជាតិ បានសម្រេចឲ្យបន្តប្រើប្រាស់យន្តការ ដែលគណបក្សមាន ដើម្បីធ្វើការតស៊ូមតិដោយអហិង្សារហូតដល់មានដំណោះស្រាយ ដែលអាចនាំឲ្យស្ថានការនយោបាយវិលទៅរកភាពប្រក្រតីឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ