បក្សសង្គ្រោះជាតិ នឹងផ្តុំគ្នាឃ្លាំមើលសវនាការលោក កឹម សុខា ពីទីស្នាក់ការកណ្តាល
បើគ្មានអ្វីប្រែប្រួលទេ នៅថ្ងៃសុក្រស្អែកនេះ ថ្នាក់ដឹកនាំ និងសកម្មជន បក្សសង្រ្គោះជាតិ រាប់សិបនាក់ នឹងប្រមូលផ្តុំគ្នានៅទីស្នាក់ការកណ្តាលបក្ស ដើម្បីឃ្លាំមើលចំណាត់ការរបស់តុលាការក្រុងភ្នំពេញ ដែលគ្រោង បើកសវនាការជម្រះក្តី លោក កឹម សុខា ប្រធានស្តីទី បក្សសង្រ្គោះជាតិ ពីបទ «បដិសេធចូលបំភ្លឺ» ក្នុងសំណុំរឿង អ្នកនាង ខុម ចាន់តារ៉ាទី ហៅស្រីមុំ។ មន្រ្តីជាន់ខ្ពស់បក្សសង្រ្គោះជាតិ បានអំពាវនាវឲ្យ តុលាការផ្អាកសវនាការលើតំណាងរាស្រ្ត ដែលមានអភ័យឯកសិទ្ធិ ដូចជា លោក អ៊ុំ សំអាន និងលោក កឹម សុខា ដោយព្រមានតស៊ូនយោបាយ អហិង្សា រហូតដល់មានដំណោះស្រាយ។
ចុះផ្សាយនៅថ្ងៃ៖
ស្តាប់ - ០២:០២
គណបក្សសង្រ្គោះជាតិ នៅថ្ងៃព្រហស្បតិ៍នេះ បានប្រកាសជំហរ មិនអាចទទួលយកបានទេ សវនាការជម្រះក្តី លោក កឹម សុខា ប្រធានស្តីទី បក្សសង្រ្គោះជាតិពីបទ «បដិសេធចូលបំភ្លឺ» ដែលតុលាការក្រុងភ្នំពេញ កំណត់យកថ្ងៃទី៩ កញ្ញា មកជំនុំជម្រះ។ លោក អេង ឆៃអ៊ាង មន្រ្តីជាន់ខ្ពស់គណបក្សសង្រ្គោះជាតិ បានបញ្ជាក់ថា តុលាការអាចបើកសវនាការលើអ្នកតំណាងលោក កឹម សុខា បាន លុះត្រាតែមាន ការលើកអភ័យឯកសិទ្ធិពីរដ្ឋសភាជាមុនសិន។
លោកបានបន្ថែមថា ជាការតស៊ូនយោបាយអហិង្សា ថ្នាក់ដឹកនាំ និងសកម្មជន គណបក្សសង្រ្គោះជាតិ មកពីគ្រប់ទិសទី នឹងប្រមូលផ្តុំគ្នា នៅទីស្នាក់ការកណ្តាលបក្ស ក្នុងសង្កាត់ចាក់អង្រែលើ រាជធានីភ្នំពេញ ដើម្បីឃ្លាំមើលសវនាការរបស់លោក កឹម សុខា និងស្ថានភាពនយោបាយចុងក្រោយ។
សាលាក្រុងភ្នំពេញ កាលពីថ្ងៃពុធ បានអនុញ្ញាតឲ្យបក្សសង្រ្គោះជាតិ មានការជួបជុំនៅថ្ងៃសុក្រ នាបរិវេណស្នាក់ការ តែមានលក្ខខណ្ឌ។ អ្នកនាំពាក្យសាលារាជធានីភ្នំពេញ លោក មាន ចាន់យ៉ាដា បានបញ្ជាក់ថា សាលាក្រុងបាន ហាមការប្រើប្រាស់ចិញ្ចើមថ្នល់ ទ្រូងថ្នល់ និងផ្លូវថ្នល់ ជាកន្លែងឈរជួបជុំគ្នា ហាមមិនឲ្យប្រើឧឃោសនស័ព្ទក្នុងពេលប្រជុំ ហាមមិនឲ្យប្រើពាក្យសម្តីអសុរស ប៉ះពាល់ប្រមុខរដ្ឋាភិបាល និងត្រូវបញ្ចប់ការប្រមូលផ្តុំត្រឹមម៉ោង ១២ថ្ងៃត្រង់ ឬបក្សសង្រ្គោះជាតិ ត្រូវប្រឈមនឹង ចំណាត់ការរដ្ឋបាល និងវិធានការណ៍ច្បាប់តាមករណីជាក់ស្តែង។
លោក អេង ឆៃអ៊ាង មន្រ្តីជាន់ខ្ពស់គណបក្សសង្រ្គោះជាតិ បានឆ្លើយតបថា ពេលវេលានៃការបំបែកគ្នា វាអាស្រ័យទៅលើបរិយាកាសនយោបាយពេលនោះធូរស្រាល ឬយ៉ាងណា? លោកបញ្ជាក់ថា ការជូនដំណឹងទៅសាលារាជធានីភ្នំពេញ ពីការជួបជុំនេះ គឺគ្រាន់តែធ្វើ ដើម្បីចៀសវាងការបិទផ្លូវ នាបរិវេណទីស្នាក់ការកណ្តាល ដូចហេតុការណ៍កាលពីថ្ងៃទី៥ កញ្ញាប៉ុណ្ណោះ។
គួរជម្រាបថា តាំងពីថ្ងៃម្សិលមិញម៉្លេះ កងកម្លាំងរដ្ឋាភិបាល បានចាប់ផ្តើមបញ្ជូនរបាំងចល័តបិទផ្លូវរុំព័ទ្ធលួសបន្លា ទៅទុកនៅតាមច្រកចូលរាជធានី តាមបណ្តោយផ្លូវជាតិលេខ ៦អា ក្នុងឃុំព្រែកអញ្ចាញ ខេត្តកណ្តាល ដើម្បីត្រួតពិនិត្យសណ្តាប់ធ្នាប់សាធារណៈ តែមន្រ្តីបក្សសង្រ្គោះជាតិយល់ថា មិនត្រឹមតែគំរាមកំហែងដល់សកម្មជនបក្សប្រឆាំងប៉ុណ្ណោះទេ តែក៏ជាការបំភិតបំភ័យពលរដ្ឋទូទៅផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ