២ថ្ងៃមុនសវនាការ៖ មេខុទ្ទកាល័យរំលឹកថា លោក កឹម សុខា តែងតែចង់ដោះស្រាយបញ្ហាដោយសន្តិវិធី
នៅបាំងតែ២ថ្ងៃទៀតទេ ពោល គឺថ្ងៃទី១៥ ខែមករា តុលាការសាលាដំបូងរាជធានីភ្នំពេញនឹងបើកសវនាការកាត់ទោសលោកកឹម សុខា នៅក្នុងសំណុំរឿងក្បត់ជាតិ។ ប៉ុន្តែនៅមុនសវនាការមកដល់ លោកមុត ចន្ថា នាយកខុទ្ទកាល័យលោកកឹម សុខា បានរំលឹកឡើងវិញនូវគោលការណ៍អហិង្សារបស់លោកកឹម សុខា ជាពិសេស គឺការចង់ដោះបញ្ហាដោយសន្តិវិធី។
ចុះផ្សាយនៅថ្ងៃ៖
ស្តាប់ - ០១:៥៣
លោកមុត ចន្ថា នាយកខុទ្ទកាល័យរបស់លោកកឹម សុខានៅព្រឹកថ្ងៃចន្ទនេះ បានរំលឹកឡើងវិញនូវពាក្យទូន្មានរបស់លោកកឹម សុខា គឺសូមកុំយកក្បាលជល់ថ្ម កុំបង្កបញ្ហា និង ដោះស្រាយបញ្ហាដោយសន្តិវិធី។ តាមរយៈគណនីហ្វេសប៊ុក លោកមុត ចន្ថា បានគូសបញ្ជាក់ថា ពាក្យទូន្មានទាំងនេះ គឺលោកកឹម សុខាបានដាស់តឿនដល់មន្រ្តីបក្សប្រឆាំងទាំងអស់ត្រូវធ្វើយ៉ាងណាចៀសវាងឱ្យបាននូវការប្រើប្រាស់កម្លាំងបាយ និងមធ្យោបាយហិង្សាជាដាច់ខាតក្នុងការតស៊ូតាមផ្លូវនយោបាយ។
ការតស៊ូនយោបាយរបស់មន្រ្តីបក្សប្រឆាំង គឺតាមរយៈគណបក្សនយោបាយស្របច្បាប់ ដើម្បីចូលរួមប្រកួតប្រជែងនៅក្នុងដំណើរការបោះឆ្នោតដោយសេរី ត្រឹមត្រូវ យុត្តិធម៌ និងប្រជាធិបតេយ្យ ហើយត្រូវប្រកួតលើគោលនយោបាយ និងកម្មវិធីនយោបាយដោយមិនត្រូវប្រើប្រាស់ពាក្យពេចន៍ជេរប្រមាថ លាបពណ៌ ចោទប្រកាន់ មួលបង្កាច់ និងរើសអើងជាតិសាសន៍ដែលបង្កជាបញ្ហា ជម្លោះ និងការឈឺចាប់។ នេះបើតាមលោកមុតចន្ថា ដដែល ហើយលោកសង្កត់ធ្ងន់បន្ថែមថា ការដោះស្រាយបញ្ហា គឺត្រូវធ្វើឡើងដោយសន្តិវិធី និងថាគ្មានបញ្ហាណាដែលអាចត្រូវដោះស្រាយបានដោយហិង្សាឡើយ។
ការរំលឹកឡើងវិញរបស់លោកមុត ចន្ថានេះ ធ្វើឡើង២ថ្ងៃមុនសវនាការកាត់ទោសលោកកឹម សុខាធ្វើឡើងនៅថ្ងៃទី១៥ មករា ក្នុងសប្តាហ៍នេះ។ លោកកឹម សុខា ត្រូវបានតុលាការក្រុងភ្នំពេញចោទប្រកាន់ពីបទ សន្ទិដ្ឋិភាពជាមួយបរទេស។ សហមេធាវីម្នាក់របស់លោកកឹម សុខា ធ្លាប់បានលើកឡើងថា ករណីលោកកឹម សុខានេះ គឺជារឿងនយោបាយ។ ដូច្នេះហើយ មេធាវីលើកជាយោបល់ថា គួរតែត្រូវដោះស្រាយគ្នាការផ្លូវនយោបាយ ទើបជាការល្អប្រសើរសម្រាប់សង្គមជាតិ។
យ៉ាងណាក៏ដោយ រដ្ឋាភិបាលកម្ពុជាក៏ដូចជាគណបក្សកាន់អំណាចបានចាត់ទុកថា រឿងលោកកឹម សុខានេះ គឺជារឿងផ្លូវច្បាប់សុទ្ធសាធមិនពាក់ព័ន្ធនឹងនយោបាយឡើយ។ អ្នកនាំពាក្យគណបក្សកាន់អំណាច លោកសុខ ឥសាន បានគូសបញ្ជាក់ថា រឿងប្រព្រឹត្តខុសច្បាប់របស់លោកកឹម សុខា គឺទុកឱ្យតុលាការដំណើរការរឿងក្តីតាមនីតិវិធីចុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ