លោក កឹម សុខា នឹងចុះឈ្មោះបោះឆ្នោតនៅសប្តាហ៍ក្រោយ
ថ្លែងប្រាប់អ្នកគាំទ្ររបស់ខ្លួនលោក កឹមសុខា ប្រធានស្តីទីគណបក្សសង្គ្រោះជាតិបានប្រាប់ទៅកាន់អ្នកគាំទ្រថា លោកនឹងទៅចុះឈ្មោះបោះឆ្នោតនៅសប្តាហ៍ក្រោយ ប៉ុន្តែមិនបានបញ្ជាក់ពីទីតាំង និងកាលបរិច្ឆេទច្បាស់លាស់នៅឡើយ។ អ្នកវិភាគបានមើលឃើញថា វាជាការបំពេញសិទ្ធិជាអ្នកបោះឆ្នោត។
ចុះផ្សាយនៅថ្ងៃ៖
ស្តាប់ - ០១:៥៤
ការទៅចុះឈ្មោះបោះឆ្នោតរបស់លោក កឹម សុខា នេះគឺមិនមែនដោយសារតែស្ថានការណ៍នយបាយធូរស្រាលនោះទេ ប៉ុន្តែនៅចំពេលដែលគណបក្សធំៗ ដែលកំពុងមានជម្លោះទាំងពីរអនុវត្តបទឈប់វាយប្រហារគ្នាក្នុងអំឡុងបុណ្យភ្ជុំបិណ្ឌ។ នេះគឺជាការបញ្ជាក់ពីគណបក្សសង្គ្រោះជាតិនៅថ្ងៃទី៣០ កញ្ញានេះ។
លោក កឹម សុខា កាលពីម្សិលមិញ បានឆ្លើយតបទៅកាន់អ្នកគាំទ្ររបស់ខ្លួនតាមបណ្តាញហ្វេសប៊ុកថា លោកនឹងទៅចុះឈ្មោះបោះឆ្នោតនៅសប្តាហ៍ក្រោយ។ ប្រសិនបើលោកកឹម សុខា ពិតជាទៅចុះឈ្មោះបោះឆ្នោតមែន។ វាគឺជាលើកទី១ ហើយដែលលោកកឹម សុខា បានចេញពីទីស្នាក់ការគណបក្សបន្ទាប់ពីការឃុំខ្លួនឯងក្នុងរយៈពេលជាង ៤ខែមកនេះ។ លោក ហង្ស ពុទ្ធា អ្នកនាំពាក្យ គ.ជ.ប បានពន្យល់ថា លោកកឹម សុខា អាចចុះឈ្មោះបានព្រោះថា តុលាការនៅមិនទាន់ចេញសាលក្រមស្ថាពរលើទោសទណ្ឌនៅឡើយទេ។ ដូចនេះ លោកកឹម សុខា នៅតែអាចចុះឈ្មោះបាន ទាំងនៅកន្លែងធ្វើការ និងនៅទីលំនៅ។ រហូតមកដល់ពេលនេះ លោកកឹម សុខា មិនអាចទាក់ទងបំភ្លឺបន្ថែមបាននៅឡើយទេ ប៉ុន្តែគណបក្សនឹងជូនដំណឹងមុនមួយថ្ងៃនៃការទៅចុះឈ្មោះបោះឆ្នោត។ ហើយគណបក្សសង្គ្រោះជាតិក៏មិនបានព្រួយបារម្ភពីការចាប់ខ្លួនផងដែរ។
សូមបញ្ជាក់ថា លោកកឹម សុខា បានឃុំខ្លួនឯងក្នុងទីស្នាក់ការធំរបស់គណបក្សសង្គ្រោះជាតិ អស់រយៈពេលជាង ៤ខែមកហើយ បន្ទាប់ពីលោករងការគំរាមថា នឹងចាប់ខ្លួនបន្ទាប់ពីលោកបានបដិសេធមិនចូលខ្លួនឆ្លើយបំភ្លឺនៅតុលាកា។ ក្នុងសំណុំរឿងនេះ លោក កឹម សុខា ត្រូវបានតុលាការកាត់ទោសឱ្យជាប់ពន្ធនាគាររយៈពេល ៥ខែ និងត្រូវបង់ប្រាក់ពិន័យចំនួន ៨០ម៉ឺនរៀល។
អ្នកវិភាគនៅកម្ពុជា បានបង្ហាញយោបល់ថា ការចេញទៅចុះឈ្មោះបោះឆ្នោតរបស់លោក កឹម សុខា នេះ គឺជាការបំពេញកាតព្វកិច្ចក្នុងនាមជាអ្នកបោះឆ្នោត ហើយក្រៅពីនេះ លោកកឹម សុខា ទំនងនឹងចង់សាកល្បងមើលថាតើស្ថានការណ៍នយោបាយពិតជាបានធូស្រាលដែរឬទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ