លោកកឹម សុខា៖ រដូវភ្ជុំបិណ្ឌនេះលោកចង់ជួបជុំគ្រួសារ និងគ្រួសារនយោបាយខ្មែរ
ប្រធានស្តីទីគណបក្សសង្រ្គោះជាតិលោកកឹម សុខា កាលពីថ្ងៃទី២៧ កញ្ញា បានអំពាវនាវជាថ្មីទៀត ឲ្យមានដំណោះស្រាយនយោបាយមួយ ដោយលោកបានលើកឡើងថា ក្នុងរដូវភ្ជុំខាងមុខនេះ លោកចង់ជួបជុំក្រុមគ្រួសារនយោបាយខ្មែរឡើងវិញ រួមទាំងការដោះលែងអ្នកទោសមួយចំនួនផង។ គណបក្សកាន់អំណាចវិញ នៅតែរក្សាជំហរដដែល ហើយបញ្ជាក់ថាការលើកឡើងនេះជារឿងហួសហេតុ។
ចុះផ្សាយនៅថ្ងៃ៖
ស្តាប់ - ០២:០៥
នៅក្នុងវីដេអូ ដែលផ្សាយនៅលើហ្វេសប៊ុកផ្ទាល់ខ្លួនរបស់លោក កាលពីថ្ងៃទី២៧ កញ្ញា បានឲ្យដឹងថាក្នុងរដូវភ្ជុំបិណ្ឌខាងមុខនេះលោកកឹម សុខា មិនមែនគ្រាន់តែចង់ជួបជុំក្រុមគ្រួសាររបស់លោកប៉ុណ្ណោះទេ ប៉ុន្តែលោកចង់ជួបជុំក្រុមគ្រួសារនយោបាយខ្មែរ ដើម្បីរួមគ្នាដោះស្រាយបញ្ហាជាតិជាមួយគ្នា។
ក្នុងពិធីបង្សុកូលឧទ្ទិសកុសលដល់បុព្វការីជនរបស់សកម្មជនគណបក្សសង្គ្រោះជាតិ និងសកម្មជនសង្គមស៊ីវិល ដែលកំពុងជាប់ពន្ធនាគារ ប្រធានស្តីទីគណបក្សប្រឆាំងបានលើកឡើងទៀតថា លោកចង់ឲ្យមានការដោះលែង សកម្មជនគណបក្សសង្រ្គោះជាតិ ថ្នាក់ដឹកនាំគណបក្ស សកម្មជនសង្គមស៊ិវិល សកម្មជនដីធ្លី និងមន្ត្រីគ.ជ.ប ជាដើម នៅក្នុងរដូវភ្ជុំបិណ្ឌនេះ។
លោកកឹម សុខាជឿថាក្នុងឋានៈជាថ្នាក់ដឹកនាំ ដែលមានព្រហ្មវិហារធម៌ នោះមិនចាំបាច់និយាយវែកញែកអ្នកណាខុសច្បាប់ ឬត្រូវច្បាប់ទេ ព្រោះវែកញែកអស់ហើយ។ លោកបន្ថែមថាក្នុងរដូវភ្ជុំបិណ្ឌគេនិយាយពីគុណធម៌របស់មនុស្ស ដូច្នេះលោកសុំឲ្យវិញ្ញាណអ្នកដឹកនាំជំនាន់មុនមកសណ្ឋិតអ្នកដឹកនាំបច្ចុប្បន្ន ដើម្បីឲ្យអ្នកដឹកនាំបច្ចុប្បន្នមានមេត្តាធម៌ ហើយដោះលែងសកម្មជនគណបក្សសង្រ្គោះជាតិ ថ្នាក់ដឹកនាំគណបក្ស សកម្មជនសង្គមស៊ិវិល សកម្មជនដីធ្លី និងមន្ត្រីគ.ជ.បជាដើម នៅក្នុងរដូវភ្ជុំបិណ្ឌនេះ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាវិញ បានចាត់ទុកការលើកឡើងរបស់លោក កឹម សុខា ថាជារឿងហួសហេតុពេក ព្រោះមនោសញ្ចេតនា និងច្បាប់គឺជារឿងដោយឡែកពីគ្នា។ លោកបន្ថែមថាការលើកឡើងឲ្យមានការដោះលែងអ្នកទោសទាំងនោះ ជាការរំលោភច្បាប់។ បើតាមលោកសុខ ឥសាន កន្លងមកគណបក្សប្រឆាំងតែងតែវាយប្រហាររដ្ឋាភិបាលជុំវិញវប្បធម៌និទណ្ឌភាព តែពេលនេះគណបក្សប្រឆាំងកំពុងតែយកវប្បធម៌និទណ្ឌភាពមកជំនួសឲ្យនីតិរដ្ឋទៅវិញ។
អ្នកនាំពាក្យរូបនេះបញ្ជាក់ថា ទោះបីជាគណបក្សសង្រ្គោះជាតិចូលប្រជុំគណៈកម្មាធិការអចិន្ត្រៃយ៍រដ្ឋសភានៅព្រឹកថ្ងៃទី២៨ កញ្ញានេះ ក៏ការដោះលែងអ្នកទោសទាំងនោះមិនអាចទៅរួចនោះទេ។
គួររំលឹកជូនថាស្ថានការណ៍នយោបាយកម្ពុជាត្រូវបានអន្តរជាតិមួយចំនួនបង្ហាញការព្រួយបារម្ភរបស់ខ្លួន បន្ទាប់ពីមានដីកាជាបន្តបន្ទាប់បានធ្លាក់លើថ្នាក់ដឹកនាំគណបក្សប្រឆាំង និងមន្ត្រីអង្គការសង្គមស៊ីវិលមួយចំនួន រួមទាំងមន្ត្រីគ.ជ.បម្នាក់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ