លោក កឹម សុខា ស្នើទៅលោកស្រី រ៉ូណា ស្ម៊ីត ជំរុញឲ្យរដ្ឋាភិបាលកែទម្រង់ប្រព័ន្ធតុលាការនៅកម្ពុជា
លោក កឹម សុខា អនុប្រធានទី១រដ្ឋសភានិងជាអនុប្រធានគណបក្សសង្គ្រោះជាតិ បានស្នើទៅលោកស្រី រ៉ូណា ស្ម៊ីត ប្រេសិតពិសេសអង្គការសហប្រជាជាតិទទួលបន្ទុកខាងសិទ្ធិមនុស្សប្រចាំប្រទេសកម្ពុជា ជំរុញទៅរដ្ឋាភិបាលកម្ពុជាកែទម្រង់ប្រព័ន្ធតុលាការនៅកម្ពុជា។ បើតាមលោក កឹម សុខា ការកែទម្រង់ប្រព័ន្ធតុលាការ គឺជាការបើកផ្លូវឈានទៅដល់ការគោរពសិទ្ធិមនុស្សនៅកម្ពុជា។ បញ្ហាសិទ្ធិមនុស្ស ដែលលោកអនុប្រធានរដ្ឋសភារូបនេះ បានចាត់ទុកថា កម្ពុជានៅតែមានការរំលោភបំពានធ្ងន់ធ្ងរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
ការជំរុញរបស់លោក កឹម សុខា ធ្វើឡើងនៅថ្ងៃចុងក្រោយនៃដំណើរទស្សនកិច្ចជាលើកដំបូងនៅកម្ពុជាដែលមានរយៈពេលប្រាំបីថ្ងៃរបស់លោកស្រី រ៉ូណា ស្ម៊ីត ប្រេសិតពិសេសអង្គការសហប្រជាជាតិទទួលបន្ទុកខាងសិទ្ធិមនុស្សប្រចាំប្រទេសកម្ពុជា បន្ទាប់ពីភាគីទាំងពីរបានជួបគ្នានៅវិមានរដ្ឋសភានៅព្រឹកថ្ងៃពុធ ទី២៣កញ្ញា។ នៅក្រោយជំនួបចប់ លោក កឹម សុខា បានថ្លែងទៅកាន់អ្នកសារព័ត៌មានដោយលោកស្វាគមន៍ចំពោះបេសកម្មការងារនៅកម្ពុជារបស់លោកស្រី រ៉ូណា ស្ម៊ីត។
ជាមួយនឹងការស្វាគមន៍នេះ លោក កឹម សុខា បានផ្ដល់យោបល់ទៅលោកស្រីស្ម៊ីត អំពីដំណោះស្រាយបញ្ហាសិទ្ធិមនុស្សនៅកម្ពុជា។ លោកថា ដើម្បីដោះស្រាយបញ្ហាសិទ្ធិមនុស្សនៅកម្ពុជា គឺត្រូវកែទម្រង់ប្រព័ន្ធតុលាការឲ្យមានភាពឯករាជ្យជាមុនសិនដែលការបើកផ្លូវឲ្យមានយុត្តិធម៌ក្នុងសង្គម។ សិទ្ធិមនុស្សនៅកម្ពុជាដែលលោក កឹម សុខា មើលឃើញថា នៅមានបញ្ហាក្នុងចំណោមប្រទេសចំនួន១០ដូចជា៖ ភូមា កូរ៉េខាងជើង ស៊ូម៉ាលី អ៊ីរ៉ង់ជាដើម ទើបអង្គការសហប្រជាជាតិបញ្ជូនមន្រ្តីរបស់ខ្លួនធ្វើការនៅកម្ពុជា។ លោកស្រី ស្ម៊ីត បានគាំទ្រសំណើររបស់លោកកឹម សុខា ថា ការកែប្រែប្រព័ន្ធយុត្តិធម៌ គឺជាការចាំបាច់។ នេះជាបន្ថែមរបស់ លោក កឹម សុខា។
តែយ៉ាងណាក៏ដោយ លោក ជិន ម៉ាលីន អ្នកនាំពាក្យក្រសួងយុត្តិធម៌ បានចាត់ទុក ការស្នើសុំនិងការលើកឡើងទាំងប៉ុន្មានរបស់លោក កឹម សុខា ថាជាសិទ្ធបុគ្គល និងជាទម្លាប់កើតមានស្រាប់ទៅហើយ។ បើតាមអ្នកនាំពាក្យរូបនេះ នៅក្នុងជំនួបរវាងលោកស្រីស្ម៊ីតនិងលោកអង្គវង្សវឌ្ឍនា កាលពីថ្ងៃម្សិលមិញ លោកស្រីបានកោតសសើរ អំពីការកែទម្រង់ប្រព័ន្ធយុត្តិធម៌នៅកម្ពុជា។ បញ្ហាសិទ្ធមនុស្សនៅកម្ពុជាត្រូវបានលោក ជិន ម៉ាលីន អះអាងថា រដ្ឋាភិបាលកំពុងធ្វើការងារជាច្រើនដើម្បីលើកស្ទួយសិទ្ធិមនុស្ស និងប្រព័ន្ធយុត្តិធម៌។
ក្រៅពីជជែកពីបញ្ហាសិទ្ធិមនុស្ស លោកស្រី ស្ម៊ីត ក៏បានចោទសួរ លោក កឹម សុខា ជុំវិញដំណើរការអនុវត្តវប្បធម៌សន្ទនា និងការធ្វើច្បាប់ ស្ដីពីសមាគម និងអង្គការមិនមែនរដ្ឋាភិបាលផងដែរ។ ចំណែកឯបញ្ហានៃការចាប់ឃុំខ្លួនសកម្មជនគណបក្សសង្គ្រោះជាតិនោះ មិនត្រូវបាន លើកឡើងនៅក្នុងជំនួបនេះទេ។
សូមបញ្ជាក់ថា លោកស្រី រ៉ូណា ស្ម៊ីត បានចាប់ផ្ដើមដំណើរទស្សនកិច្ចជាលើកដំបូងនៅកម្ពុជារយៈពេល៩ថ្ងៃ ចាប់ពីថ្ងៃទី១៦-២៤កញ្ញា។ ក្នុងអំឡុងពេលទស្សនកិច្ចនៅកម្ពុជា លោកស្រី ស្ម៊ីត បានជួបជាមួយលោកនាយករដ្ឋមន្រ្តី ហ៊ុន សែន មន្រ្តីជាន់ខ្ពស់រដ្ឋាភិបាល និងរួមទាំងមន្រ្តីអង្គការក្រៅរដ្ឋាភិបាលជាបន្តបន្ទាប់។ ហើយនៅថ្ងៃទី២៤កញ្ញា លោកស្រី នឹងធ្វើសន្និសីទសារព័ត៌មានមួយ ដើម្បីបង្ហាញពីលទ្ធផលនៃដំណើរទស្សនកិច្ចរបស់លោកស្រីនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ