លោក កឹម សុខា៖ កុំអាងមានអំណាចធ្វើឲ្យគេឈឺចាប់
នៅថ្ងៃទី០៤ ខែមិថុនា លោក កឹម សុខា ដែលកំពុងតែស្នាក់នៅទីស្នាក់ការគណបក្សសង្គ្រោះជាតិបណ្តោះអាសន្ននោះ បានថ្លែងថា “កុំអាងតែមានអំណាច ធ្វើឲ្យអ្នកដទៃឈឺចាប់!។ ការលើកឡើងរបស់លោកធ្វើឡើងនៅចំពោះមុខថ្នាក់ដឹកនាំគណបក្សសង្គ្រោះជាតិខេត្តព្រៃវែងប្រមាណ២០០នាក់ក្នុងស្នាក់ការកណ្តាល។ ចំណែកគណបក្សកាន់អំណាចបញ្ជាក់ថា “គ្មានអ្នកណាធ្វើឲ្យលោក កឹម សុខា ឈឺចាប់ទេ។”
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
លោក កឹម សុខា ប្រធានស្តីទីគណបក្សសង្គ្រោះជាតិ ដែលបានជួបអ្នកគាំទ្រលោកហូរហែចាប់តាំងពីមានការតាមចាប់ខ្លួនលោក កាលពីថ្ងៃទី២៦ ខែឧសភាមក នៅព្រឹកនេះ លោក កឹម សុខា បានថ្លែងថា បើខ្លូនធ្វើឲ្យអ្នកដទៃឈឺចាប់ប៉ុណ្ណា តើពេលដែលគេធ្វើទុក្ខទៅលើគ្រួសាររបស់ខ្លួនវិញ តើឈឺចាប់ប៉ុណ្ណាដែរ? នេះបើតាមវីដេអូនៅក្នុងទំព័រហ្វេសប៊ុកលោក យ៉ែម បុញ្ញឫទ្ធិ នៅថ្ងៃទី០៤ ខែមិថុនានេះ។
លោកកឹម សុខាបានបន្ថែមថា កុំអាងតែខ្លួនមានអំណាចធ្វើឲ្យគេឈឺចាប់ឥតឈប់ឈរនោះ! ប្រធានស្តីទីរូបនេះ ក៏បានបង្ហាញសុទិដ្ឋិនិយមថា ខ្មែរនឹងភ្ញាក់ខ្លួន ងាក់មករកការជជែកដោះស្រាយគ្នា ដោយសន្តិវិធី ដើម្បីស្វែងរកសេចក្តីសុខរបស់ខ្មែរទាំងអស់គ្នា។
បច្ចុប្បន្នលោកកឹម សុខាប្រធានស្តីទីគណបក្សសង្គ្រោះជាតិបានស្នាក់នៅស្នាក់ការចាក់អង្រែលើ ខណ្ឌមានជ័យ រាជធានីភ្នំពេញ ក្រោយពីកងកម្លាំង ដែលប្រដាប់ដោយអាវុធបានប៉ុនប៉ងចាប់ខ្លួនលោកពាក់ព័ន្ធនឹងករណីដែលលោក កឹម សុខា មិនបានចូលខ្លួនទៅបំភ្លឺតាមការកោះហៅរបស់សាលាដំបូង កាលពីថ្ងៃទី២៦ ឧសភា។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យដឹង គ្មានអ្នកណាធ្វើឲ្យលោកកឹម សុខា ឈឺចាប់ទេ គឺគាត់ធ្វើឲ្យឈឺចាប់ខ្លួនឯង ដោយសារតែរឿងស្រីកំណាន់របស់គាត់ប្តឹងវិញ។
ជុំវិញស្ថានភាពនយោបាយ ដែលមេដឹកនាំគណបក្សប្រឆាំងកំពុងតែទទួលរងការចោទប្រកាន់តាមរយៈតុលាការនោះ អ្នកនាំពាក្យគណបក្សប្រជាជនកម្ពុជាបញ្ជាក់ថា ស្ថានភាពនយោបាយនៅដូចដើមទេ។ ចំណែករឿងលោកថ្នាក់ដឹកនាំរបស់គណបក្សសង្គ្រោះជាតិ គឺដោយសារពួកគាត់ប្រព្រឹត្តល្មើសច្បាប់ ដែលត្រូវទទួលខុសត្រូវចំពោះមុខច្បាប់។ លោកបញ្ជាក់ថាវាមិនមានទំនាស់រវាងគណបក្សនយោបាយនឹងគណបក្សនយោបាយទេ។
ថ្មីៗនេះលោកកឹម សុខា ត្រូវបានចៅក្រមស៊ើបស៊ួរសាលាដំបូងរាជធានីភ្នំពេញចេញដីកាបង្គាប់មួយទៀតឲ្យចូលខ្លួននៅថ្ងៃទី១៤ ខែមិថុនាខាងមុខទាក់ទងនឹងបទបដិសេធក្នុងការចូលខ្លួន ដែលលោកកឹម សុខាបានប្រព្រឹត្តកាលពីថ្ងៃទី២៦ ខែឧសភា តាមបញ្ញតិ្តមាត្រា៥៣៨នៃក្រមព្រហ្មទណ្ឌ។ នេះបើតាមដីកាបង្គាប់របស់តុលាការកាលពីថ្ងៃទី ២ មិថុនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ