លោក ហោ ណាំហុង៖ ពលរដ្ឋខ្មែរនៅតាមព្រំដែនអាចឆ្លងទៅធ្វើការនៅប្រទេសថៃវិលល្ងាចបាន
កិច្ចព្រមព្រៀងថ្មីស្ដីពីការឆ្លងកាត់ព្រំដែនរវាងកម្ពុជា-ថៃ បានអនុញ្ញាតឲ្យប្រជាពលរដ្ឋខ្មែរដែលរស់នៅតាមតំបន់ព្រំដែន អាចឆ្លងចូលទៅធ្វើការនៅក្នុងប្រទេសថៃ ដោយវិលល្ងាចបាន។ បើតាមលោក ហោ ណាំហុង បច្ចុប្បន្ន មានពលករខ្មែរជាង៧០ម៉ឺននាក់ កំពុងរស់នៅ និងធ្វើការនៅក្នុងប្រទេសថៃ ខណៈតួលេខក្រៅផ្លូវការថា មានជាង១លាននាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
តាមរយៈកិច្ចព្រមព្រៀងថ្មីនេះ នឹងអនុញ្ញាតឲ្យប្រជាជនខ្មែរដែលរស់នៅតំបន់ព្រំដែនថៃ ដែលមានប័ណ្ណព្រំដែន ឬ (Border Pass) អាចឆ្លងចូលទៅធ្វើការនៅប្រទេសថៃដោយវិលល្ងាចបាន ។ នេះបើតាមការសរសេរនៅលើទំព័រ Facebook របស់លោក ហោ ណាំហុង រដ្ឋមន្ត្រីការបរទេសកម្ពុជានៅថ្ងៃអាទិត្យនេះ។ លោក ហោ ណាំហុង សរសេរថា តាមរយៈកិច្ចព្រមព្រៀង នោះ មានន័យថា បងប្អូនប្រជាពលរដ្ឋដែលរស់នៅតាមតំបន់ព្រំដែនជាមួយថៃ អាចទៅទំនាក់ទំនងជាមួយអាជ្ញាធរមានសមត្ថកិច្ចកម្ពុជា ដើម្បីធ្វើប័ណ្ណព្រំដែន សំរាប់សំរួលដល់ការធ្វើដំណើរឆ្លងកាត់ព្រំដែនថៃ ដូចបានកំណត់ក្នុងកិច្ចព្រមព្រៀងនោះ។
កិច្ចព្រមព្រៀងថ្មី ដែលបានចូលជាធរមាននៅថ្ងៃដែលលោក ហោ ណាំហុង រដ្ឋមន្ត្រីការបរទេសកម្ពុជា និងលោក ថាណាសក្តិ ប៉ាទីម៉ាប្រាកន រដ្ឋមន្ត្រីការបរទេសថៃ បានចុះហត្ថលេខានៅទីក្រុងបាងកកប្រទេសថៃ កាលពីថ្ងៃទី១១កក្កដាឆ្នាំ២០១។
ក្នុងពេលវិលត្រលប់មកពីបំពេញទស្សនកិច្ចរយៈពេល២ថ្ងៃនៅប្រទេសថៃ កាលពីថ្ងៃទី១២កក្កដាកន្លងទៅនោះ លោក ហោ ណាំហុង បានបញ្ជាក់ដែរថា កិច្ចព្រមព្រៀងថ្មីនេះ ក៍បានអនុញ្ញាតឲ្យពលករខ្មែរ ស្នាក់នៅក្នុងតំបន់ព្រំដែនប្រទេសថៃ ក្នុងរយៈពេលពី១៥ទៅ៣០ថ្ងៃ បន្ទាប់ពីពួកគេបានបំពេញតាមបែបបទដែលកំណត់ដោយអាជ្ញាធរថៃ។ ប័ណ្ណព្រំដែន ឬ Border Pass ក្នុងកិច្ចព្រមព្រៀងថ្មីនេះ មិនបានទាមទារឲ្យពលរដ្ឋខ្មែរមានលិខិតឆ្លងដែននោះទេ។
សូមបញ្ជាក់ថា បច្ចុប្បន្នមានពលករខ្មែរប្រមាណជា៧០ម៉ឺននាក់កំពុងរស់នៅនិងធ្វើការនៅក្នុងប្រទេសថៃ ហើយពួកគេភាគច្រើនជាពលករខុសច្បាប់ ដែលខ្លះមានទាំងប្រពន្ធ និងកូនផង។ នេះបើតាមការបញ្ជាក់ពីលោក ហោ ណាំហុង រដ្ឋមន្ត្រីការបរទេសកម្ពុជា។ ប៉ុន្តែបើតាមតួលេខក្រៅផ្លូវការខ្លះថា មានពលករខ្មែរប្រមាណជា១លាននាក់ឯណោះ ដែលកំពុងធ្វើការនៅក្នុងប្រទេសថៃ។
លោក យ៉ា ណាវុធ ប្រធានអង្គការខារ៉ាមកម្ពុជា បានបង្ហាញការសោកស្តាយ ដែលកំលាំងពលកម្មកម្ពុជាបានហូរចេញទៅក្រៅប្រទេសក្នុងចំនួនដ៍ច្រើនសន្ធឹកសន្ធាប់បែបនេះ ខណៈដែលពលរដ្ឋផ្សេងកំពុងហូរចូលមកក្នុងប្រទេសកម្ពុជាវិញនោះ។ ការធ្វើចំណាកស្រុកដ៍ច្រើនបែបនេះ នឹងធ្វើឲ្យប៉ះពាល់ដល់វិស័យកសិកម្ម និងសិប្បកម្មខ្នាតតូចរបស់កម្ពុជា។
ក្នុងពេលទស្សនកិច្ចនៅប្រទេសថៃនោះដែរ លោក ហោ ណាំហុង ក៍បានស្នើទៅភាគីថៃពន្យាពេលចាប់បញ្ចូនពលករខ្មែរដែលប័ណ្ណការងាររបស់ពួកគេអស់សុពលភាពកាលពីថ្ងៃទី៣០ខែមិថុនាកន្លងទៅ ដោយពន្យារហូតដល់អំឡុងខែមិនាឆ្នាំ២០១៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ