ខុទ្ទកាល័យរដ្ឋមន្ត្រីការពារជាតិកម្ពុជា៖ គ្មានការព្រមព្រៀងអភិវឌ្ឍន៍រួមគ្នាជាមួយថៃទេ
ល្ងាចម្សិលមិញ ខុទ្ទកាល័យរដ្ឋមន្ត្រីក្រសួងការពារជាតិកម្ពុជាបានបដិសេធដំណឹងរបស់សារព័ត៌មានបាងកកប៉ុស្តិ៍ដែលថានឹងមានការអភិវឌ្ឍរួមគ្នាលើភូមិនានា និងច្រកព្រំដែនអានសេះ ក្នុងតំបន់ប្រទាញប្រទង់គ្នាជាមួយថៃ។ នៅក្នុងសេចក្តីបំភ្លឺព័ត៌មានលើវ៉េបសាយត៍របស់ខ្លួន ក្រសួងការពារជាតិកម្ពុជា អះអាងថា បាងកកប៉ុស្តិ៍រាយការណ៍«ព័ត៌មានខុសឆ្គង» និងបានស្នើឱ្យកាសែតនេះកែតម្រូវជាបន្ទាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
នៅក្នុងច្បាប់ចេញផ្សាយថ្ងៃទី២៣ ខែមករា ម្សិលមិញ សារព័ត៌មានបាងកកប៉ុស្តិ៍របស់ថៃបានរាយការណ៍ថា ភាគីកម្ពុជា និងភាគីថៃ បានឯកភាពគ្នាអំពី«ការអភិឌ្ឍន៍រួមគ្នាលើភូមិនានានៅតំបន់ព្រំដែន ដែលមានការប្រទាញប្រទង់»ហើយ «ភាគីថៃក៏បានស្នើសុំដាក់ច្រកព្រំដែនប្រទាញប្រទង់ (ច្រកអានសេះ) ជាតំបន់សផងដែរ សម្រាប់អភិវឌ្ឍន៏រួមគ្នា»។
ខុទ្ទកាល័យរបស់លោក ទៀ បាញ់ បានបដិសេធដំណឹងនេះ ដោយចាត់ទុកថា សេចក្តីរាយការណ៍ ដែលផ្អែកលើខ្លឹមសារនៃកិច្ចប្រជុំនៅភ្នំពេញ នាថ្ងៃទី២១ ខែមករា ឆ្នាំ២០១៥ រវាងរដ្ឋមន្ត្រីក្រសួងការពារជាតិកម្ពុជា និងអនុរដ្ឋមន្ត្រីក្រសួងការពារជាតិថៃ ដែលជាអគ្គមេបញ្ជាការកងទ័ពជើងគោកភូមិន្ទថៃផងនោះ ជា«ព័ត៌មានខុសឆ្គង»។
សេចក្តីបំភ្លឺព័ត៌មានរបស់ខុទ្ទកាល័យរដ្ឋមន្ត្រីក្រសួងការពារជាតិកម្ពុជាបាន«ប្រកាសច្រានចោលទាំងស្រុង នូវព័ត៌មានប្រាស់ចាកពីការពិតខាងលើ» និងបានបំភ្លឺថា«ជំនួបសវនការសំដែងការគួរសមនៃគណៈប្រតិភូកងទ័ពជើងគោកថៃចំពោះក្រសួងការពារជាតិកម្ពុជា គឺពុំបានលើកឡើងអំពីបញ្ហាដូចបញ្ជាក់ខាងលើនោះទេ»។ ទន្ទឹមនឹងនេះដែរ ខុទ្ទកាល័យរបស់លោក ទៀ បាញ់ ក៏បានស្នើឱ្យសារព័ត៌មានបាងកកប៉ុស្តិ៍ «កែតម្រូវព័ត៌មានខុសឆ្គងនោះជាបន្ទាន់»។
គួររម្លឹកផងដែរថា ចាប់តាំងពីថ្ងៃទី២៤ ខែធ្នូ ឆ្នាំ២០១៤មក ភាគីកម្ពុជា និងភាគីថៃ បានប្រជុំគ្នាជាញឹកញាប់ ទាំងក្នុងក្របខ័ណ្ឌគណៈកម្មាធិការព្រំដែនទូទៅកម្ពុជា ថៃ លើកទី១០ ទាំងក្នុងក្របខ័ណ្ឌគណៈកម្មការចម្រុះស្តីពីកិច្ចសហប្រតិបត្តិការទ្វេភាគីកម្ពុជា ថៃ លើកទី ៩ ទាំងក្នុងក្របខ័ណ្ឌក្រុមការងារទំនាក់ទំនងព្រំដែនកម្ពុជា ថៃ ថ្នាក់យុទ្ធភូមិភាគ។
បើផ្អែកតាមសេចក្តីប្រកាសព័ត៌មានដែលផ្សាយដោយក្រសួងការពារជាតិកម្ពុជា និងក្រសួងការបរទេសនិងសហប្រតិបត្តិការអន្តរជាតិកម្ពុជា ខ្លឹមសារនៃកិច្ចប្រជុំទាំងនោះមិនបានបង្ហាញឱ្យឃើញនូវកិច្ចព្រមព្រៀងណាមួយស្តីពីការអភិវឌ្ឍរួមគ្នារវាងកម្ពុជានិងថៃ នៅតាមតំបន់ព្រំដែនដែលកំពុងមានជម្លោះនោះទេ។ កម្ពុជាកំពុងតែរងចាំភាគីថៃក្នុងការអនុវត្តតាមសាលដីការបស់តុលាការយុត្តិធម៌អន្តរជាតិលើបណ្ដឹងរបស់កម្ពុជា ដែលសុំឱ្យបកស្រាយសាលដីកាឆ្នាំ១៩៦២ ពាក់ព័ន្ធនឹងរឿងក្តីប្រាសាទព្រះវិហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ