លោក គង់ គាំ៖«បើសង្គ្រោះជាតិឈ្នះនឹងធ្វើច្បាប់ដាក់នាយករដ្ឋមន្ត្រីចាស់ ជានាយករដ្ឋមន្ត្រីកិត្តិយស និងសរសេរប្រវត្តិសាស្ត្ររួមគ្នា»
លោក គង់ គាំ ឧត្តមទីប្រឹក្សាគណបក្សសង្គ្រោះជាតិ បានថ្លែងថាគេគួរតែធ្វើច្បាប់មួយដាក់នាយករដ្ឋមន្ត្រីចាស់ ជានាយករដ្ឋមន្ត្រីកិត្តិយស និងសរសេរប្រវត្តិសាស្ត្រជាមួយគ្នា ប្រសិនគណបក្សសង្គ្រោះជាតិឈ្នះឆ្នោតនៅពេលខាងមុខ។ ការលើកឡើងរបស់លោក គង់ គាំ ដូច្នេះបានធ្វើឡើងខណៈដែលលោកចូលរួមពិធីសូត្រមន្ត បង្សុកូលដល់វិញ្ញាណក្ខន្ធអ្នកបាត់បង់ជីវិត ថ្ងៃ ៥-៦ កក្កដា ១៩៩៧ គម្រប់២០ឆ្នាំ នៅទីស្នាក់ការគណបក្សសង្គ្រោះជាតិនាព្រឹកថ្ងៃព្រហស្បតិ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
នៅចំពោះមុខ មន្ត្រីគណបក្សសង្គ្រោះជាតិ និងអតីតមន្ត្រីគណបក្សហ្វ៊ុនស៊ីនប៊ិច ដែលមានការចូលរួមពីព្រឹទ្ធាចារ្យ លឺ ឡាយស្រេង ផងនោះ លោក គង់ គាំ បានថ្លែងតាមរយៈក្បាលមេក្រូថា ប្រសិនបើមានការផ្លាស់ប្តូរ នៅឆ្នាំ២០១៨ ខាងមុខនេះមែនតាមរយៈការបោះឆ្នោតសកល ក្នុងនាមជាទីប្រឹក្សាជាន់ខ្ពស់គណបក្សសង្គ្រោះជាតិ លោកនឹងស្នើឲ្យមានការធ្វើច្បាប់ឲ្យនាយកចាស់ជានាយករដ្ឋមន្ត្រី កិត្តិយស ដូចជាករណីអតីតនាយករដ្ឋមន្ត្រី លី ក្វាន់យូ នៃប្រទេស សឹង្ហបុរីដូច្នោះដែរ។
ការលើកឡើងបែបនេះ លោក គង់ គាំ យល់ថាជាមធ្យោបាយបញ្ចប់អំពើហិង្សា និងចៀសវាងបាននូវការសងសឹកគ្នា តាមដកធ្មេញគ្នា និងខ្វេះភ្នែកគ្នារកទីបំផុតគ្មាន ព្រមទាំងឧទ្ទិសការជួបជុំនេះជាទិវាបញ្ចប់សង្គ្រាមពិតប្រាកដនៅកម្ពុជា។
ជាមួយគ្នានេះ លោក គង់ គាំ ក៏បានលើកឡើងដែរថា នៅប្រទេសកម្ពុជាកំពុងមានបញ្ហាប្រវត្តិសាស្ត្រ ដោយអ្នកឈ្នះសរសេរប្រវត្តិសាស្ត្រផ្សេង ហើយអ្នកចាញ់សរសេរប្រវត្តិសាស្ត្រផ្សឹង។
បើតាមឧត្តមទីប្រឹក្សាជាន់ខ្ពស់គណបក្សប្រឆាំងរូបនេះ ការសរសេរប្រវត្តិសាស្ត្រគួរតែអ្នកឈ្នះនិងអ្នកចាញ់អង្គុយសរសេរប្រវត្តិសាស្ត្ររួមគ្នា។
ក៏ប៉ុន្តែបញ្ហាប្រវត្តិសាស្ត្រនេះ លោកនាយករដ្ឋមន្ត្រី ហ៊ុន សែន តែងបានលើកឡើងជាច្រើនដងហើយនៅក្នុងពិធីជាសាធារណៈថា «មានតែអ្នកឈ្នះប៉ុណ្ណោះ ដែលជាអ្នកសរសេរប្រវត្តិសាស្ត្រ»។ ទោះយ៉ាងណាប្រវត្តិសាស្ត្រប្រទេសកម្ពុជា ត្រូវគេសង្កេតឃើញថាបានសរសរឡើងដោយអ្នកគ្រប់គ្រងអំណាច ដូចជាអំឡុងពេលឆ្នាំ១៩៥៣ ដល់ឆ្នាំ១៩៧០ អ្នកសរសេរប្រវត្តិសាស្ត្រ គឺរបបសង្គមរាស្ត្រនិយម។ ហើយចាប់ពីសម័យកាលតស៊ូផ្តួលរំលំ របបប្រល័យពូជសាសន៍ ប៉ុលពត រហូតមកដល់បច្ចុប្បន្នអ្នកសរសេរប្រវត្តិសាស្ត្រគឺគណបក្សប្រជាជនកម្ពុជាដែលកាន់អំណាចសព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ