វិបត្តិដីធ្លី៖ បក្សកាន់អំណាចដាច់ចិត្តចាត់ការឧកញ៉ាគ្រាក់ៗ ដើម្បីស្ដារប្រជាប្រិយភាព
ចុះផ្សាយនៅថ្ងៃ៖
ស្តាប់ - ០៥:០៤
ដើមឆ្នាំ ២០១៧នេះ រដ្ឋាភិបាលគណបក្សប្រជាជនកម្ពុជា បានសម្រេចចិត្តចាត់វិធានការលើឧកញ៉ាគ្រាក់ៗយ៉ាងហោចណាស់ពីររូប ដែលជាប់ពាក់ព័ន្ធក្នុងសំណុំរឿងវិបត្តិដីធ្លីជាមួយប្រជាពលរដ្ឋ ។ អ្នកតាមដានព្រឹត្តិការណ៍សង្គមមើលឃើញថា ចំណាត់ការនេះ ធ្វើឡើងដើម្បីស្ដារប្រជាប្រិយភាពរបស់គណបក្សកាន់អំណាច ប្រឈមនឹងការបោះឆ្នោតដែលខិតជិតចូលមកដល់។
ឆ្នាំ ២០១៧ទើបតែបើកឆាកបានមិនដល់ពីរខែផង មានឧកញ៉ាយ៉ាងហោចណាស់ពីររូប ដែលត្រូវបានរដ្ឋាភិបាលចាត់ការ ដោយសារជាប់ពាក់ព័ន្ធនឹងបញ្ហាវិបត្តិដីធ្លីជាមួយប្រជាពលរដ្ឋ។ ទី១គឺលោកឧកញ៉ា ឡោក ហួរ។ និងទី២ គឺលោកស្រីឧកញ៉ា ស៊ុយ សុផាន។
ដំបូងនិយាយពីលោក ឡោក ហួរ ដែលមានងារជាឧកញ៉ា និងជាតំណាងរាស្ត្រមណ្ឌលបាត់ដំបងកូតាគណបក្សកាន់អំណាច។ កាលពីខែមករា រដ្ឋាភិបាលនៃគណបក្សប្រជាជនកម្ពុជា បានសម្រេចដកហូតដីពីលោកឧកញ៉ា ឡោក ហួរ ចំនួនជិតបីពាន់ហិកតានៅស្រុកកៀនស្វាយនិងស្រុកស្អាងខេត្តកណ្ដាល ឲ្យទៅប្រជាពលរដ្ឋវិញ។ បើតាមការអះអាងរបស់ក្រសួងដែនដី ផ្ទៃដីនៅចំណុចនោះ គឺជាដីបឹងរបស់រដ្ឋ ដែលប្រជាជនធ្លាប់រស់នៅអាស្រ័យផល ប៉ុន្តែចាប់តាំងពីឆ្នាំ២០០៥មក លោកឧកញ៉ា ឡោក ហួរ បានចេញមុខអះអាងថា ជាកម្មសិទ្ធិរបស់ខ្លួន បង្កើតបានជាទំនាស់រ៉ាំរ៉ៃមកទល់សព្វថ្ងៃ។ មិនត្រឹមតែដកហូតផ្ទៃដីដូចលើកឡើងប៉ុណ្ណោះទេ រដ្ឋាភិបាលបាននិរាករណ៍ប័ណ្ណសម្គាល់សិទ្ធិកាន់កាប់អចលនវត្ថុចំនួន ២៩ប័ណ្ណ ហើយថែមទាំងបានដាក់ឈ្មោះលោក ឡោក ហួរ ចូលទៅក្នុងបញ្ជីខ្មៅផងដែរ។
ចេញពីសំណុំរឿងលោក ឡោក ហួរ ចូលដល់សំណុំរឿងលោកស្រីឧកញ៉ា ស៊ុយ សុផាន។ រដ្ឋាភិបាល នៅដើមខែកុម្ភៈនេះ បានសម្រេចប្រគល់អំណាចឲ្យក្រសួងដែនដី កោះហៅលោកស្រី ស៊ុយ សុផាន ប្រធានក្រុមហ៊ុនផានអ៊ីម៉ិច ឲ្យចូលខ្លួនទៅដោះស្រាយជម្លោះដីធ្លីជាមួយប្រជាពលរដ្ឋចំនួនជាង ៥រយគ្រួសារ ស្ថិតនៅក្នុងរាជធានីភ្នំពេញ និងខេត្តកណ្ដាល។ រដ្ឋាភិបាលក៏បានបង្គាប់ឲ្យរដ្ឋបាលសុរិយោដី ផ្អាកការចុះបញ្ជីឬផ្ទេរដីដែលមិនទាន់ដោះស្រាយផងដែរ ដើម្បីចៀសវាងធ្វើឲ្យវិវាទកាន់តែរីករាលដាល។
ចំណាត់ការរបស់រដ្ឋាភិបាលលើឧកញ៉ាគ្រាក់ៗ ដែលជាសមាជិកគណបក្សប្រជាជនកម្ពុជានាពេលនេះ ត្រូវបានគេមើលឃើញថា ធ្វើឡើងដើម្បីស្ដារប្រជាប្រិយភាពរបស់គណបក្សកាន់អំណាច ប្រឈមនឹងការបោះឆ្នោតដែលខិតជិតចូលមកដល់។
មែនទែនទៅ នេះមិនមែនរឿងថ្មីទេ។ បន្ទាប់ពីធ្លាក់អាសនៈពី ៩០មកនៅត្រឹម ៦៨ នៅក្នុងការបោះឆ្នោតឆ្នាំ ២០១៣ គណបក្សប្រជាជនកម្ពុជា បានចេញមុខទទួលស្គាល់ពីចំណុចខ្វះខាតរបស់ខ្លួន និងថែមទាំងបានជំរុញឲ្យមន្ដ្រីរបស់ខ្លួនឆ្លុះកញ្ចក់ដុះក្អែលសម្អាតខ្លួនថែមទៀតផង។ កំណែទម្រង់ការងារនិងស្ថាប័នរដ្ឋមួយចំនួនត្រូវបានធ្វើឡើងជាបន្តបន្ទាប់។ មន្ដ្រីមួយចំនួនដែលប្រើប្រាស់អំណាច ប្រព្រឹត្តតាមអំពើចិត្តខុសនឹងច្បាប់ ក៏ត្រូវបានចាប់ខ្លួនយកទៅផ្ដន្ទាទោសផងដែរ។ ដើម្បីការពារប្រជាប្រិយភាពរបស់ខ្លួន គណបក្សកាន់អំណាចហាក់ដូចជាមិនញញើតនឹងដាក់ចាត់វិធានការ និង ទោសទណ្ឌមន្ដ្រីរបស់ខ្លួនដែលប្រព្រឹត្តខុសឡើយ។
ការសម្រេចចិត្តរបស់គណបក្សកាន់អំណាចដូច្នេះ ត្រូវអ្នកវិភាគនយោបាយផ្ដល់តម្លៃថា អាចរួមចំណែកស្ដារប្រជាប្រិយភាពរបស់គណបក្សនេះបានខ្លះនៅលើឆាកនយោបាយ។ ក្នុងនោះ គណបក្សប្រជាជនកម្ពុជា និងថ្នាក់ដឹកនាំរបស់គណបក្សនេះ ត្រូវរក្សាភាពរ៉ឹងប៉ឹងបំផុត នៅក្នុងការអនុវត្តគោលនយោបាយកំណែទម្រង់ស៊ីជម្រៅដូចដែលបានសន្យា។ គោលការណ៍ច្បាប់ ដាច់ខាតត្រូវតែគ្របដណ្ដប់លើមនោសញ្ចេតនា។ មន្ដ្រីប្រព្រឹត្តខុសច្បាប់ត្រូវតែដកគ្រវាត់ចោល ហើយផ្ដល់ឱកាសឲ្យមន្ដ្រីដែលមានសមត្ថភាព។
ជាការពិត ចំណាត់ការលើអ្នកប្រព្រឹត្តខុសឬបង្កបញ្ហា មានសារៈសំខាន់ណាស់ ប៉ុន្តែវាមិនទាន់គ្រប់គ្រាន់ដើម្បីធានានូវជ័យជំនះផ្ដាច់មុខនៅក្នុងការបោះឆ្នោតនាពេលខាងមុខទេ។ បើតាមអ្នកវិភាគ មានការងារច្រើនណាស់ដែលរដ្ឋាភិបាលដឹកនាំដោយគណបក្សប្រជាជនកម្ពុជាត្រូវធ្វើឲ្យបាន បើចង់ទាញយកការគាំទ្រពីប្រជាពលរដ្ឋបន្ថែមទៀត។
ការងារនោះត្រូវចាប់ផ្ដើមពីមន្ដ្រីថ្នាក់លើ ដែលត្រូវតែធ្វើជាគំរូល្អដល់មន្ដ្រីថ្នាក់ក្រោម ដើម្បីឲ្យមានការកែប្រែឥរិយាបថក្នុងការបំពេញការងារប្រកបដោយការទទួលខុសត្រូវ មានភាពស្អាតស្អំ និងតម្កល់ផលប្រយោជន៍ជាតិ ធំជាងផលប្រយោជន៍ផ្ទាល់ខ្លួន និងផលប្រយោជន៍បក្ស។ ទន្ទឹមគ្នានេះ ការលុបបំបាត់អំពើពុករលួយត្រូវធ្វើគ្រប់កម្រិត ពីថ្នាក់លើដល់ថ្នាក់ក្រោម ក៏ត្រូវតែអនុវត្តឲ្យបានផងដែរ។ ការដាក់ទណ្ឌកម្មចំពោះការប្រព្រឹត្តពុករលួយនេះ ទាមទារឲ្យដើរស្របគ្នានឹងការផ្ដល់រង្វាន់ដល់មន្ដ្រីរាជការ។ មន្ដ្រីរាជការដែលល្អ ត្រូវតែទទួលបានការលើកទឹកចិត្ត និងការបង្កើនប្រាក់ខែ។ ជាមួយគ្នានោះ គណបក្សប្រជាជន ចាំបាច់ត្រូវតែអប់រំមន្ដ្រីថ្នាក់ក្រោមរបស់ខ្លួនឲ្យបានម៉ឺងម៉ាត់បំផុត ធ្វើយ៉ាងណាឲ្យពួកគេបម្រើប្រជាជនបានត្រឹមត្រូវ។
ទាំងនេះ គឺជាវិញ្ញាសារសាកល្បងសម្រាប់គណបក្សប្រជាជន ដើម្បីជួយស្ដារមុខមាត់ និងប្រជាប្រិយភាព សម្រាប់ការបោះឆ្នោតខាងមុខ។ យ៉ាងណាក៏ដោយ ការអនុវត្តតែងតែពិបាកជាងទ្រឹស្តី។ មានតែឆន្ទៈពិតប្រាកដទេ ទើបជួយឲ្យគណបក្សកាន់អំណាច សម្រេចការងារទាំងនេះបាន។ ប៉ុន្តែប្រសិនបើអនុវត្តបាន គណបក្សកាន់អំណាចនេះ នឹងអាចមានទឹកមាត់ប្រៃខ្លះ ដើម្បីឃោសនារកសំឡេងឆ្នោតនាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ