ថ្ងៃបិទបញ្ចប់យុទ្ធនាការឃោសនាបោះឆ្នោត៖ គណបក្សនយោបាយបង្អូតកម្លាំងអ្នកគាំទ្រ
ដូចការគ្រោងទុក ថ្ងៃទី២៧ខែកក្កដានេះ គឺថ្ងៃបិទបញ្ចប់នៃយុទ្ធនាការឃោសនាបោះឆ្នោត។ យុទ្ធនាការឃោសនាបោះឆ្នោត ដែលបានចាប់ផ្ដើមតាំងតែពីថ្ងៃទី៧ខែកក្កដាមកម្ល៉េះ។ ជាការកត់សម្គាល់ គណបក្សចំនួន៧ ក្នុងចំណោមគណបក្ស២០ដែលចូលរួមការបោះឆ្នោត បានយករាជធានីភ្នំពេញជាគោលដៅឃោសនាថ្ងៃចុងក្រោយ។ ក្នុងចំណោមគណបក្សទាំង៧ គឺគណបក្សប្រជាជនកម្ពុជាបានបង្អួតកម្លាំងអ្នកគាំទ្រយ៉ាងច្រើនក្រាស់ក្រែលនៅកោះពេជ្រ ខណៈគណបក្សសម្ព័ន្ធដើម្បីប្រជាធិបតេយ្យជ្រើសយកតំបន់ជាយក្រុងបង្ហាញកម្លាំងក៏មិនស្ទើរដែរ។
ចុះផ្សាយនៅថ្ងៃ៖
ស្តាប់ - ០៣:៥៦
តាំងតែពីព្រឹកព្រលឹមស្រាំងៗ អ្នកគាំទ្រគណបក្សប្រជាជនកម្ពុជា ជាច្រើនរយនាក់បានជួបជុំប្រមូលផ្ដុំគ្នា ចាប់ពីមជ្ឈមណ្ឌលពិព័រណ៍កោះពេជ្រ រហូតដល់ទីតាំងវត្តបទុមវត្តី។ ក្នុងនោះ អ្នកគាំទ្រ ក្មេង ចាស់ ប្រុស ស្រី បានលើកទង់បក្សមានរូបទេវតា ហើយស្រែកហ៊ោជ័យឃោសទៅតាមសុន្ទរកថារបស់ប្រមុខបក្សប្រជាជន លោក ហ៊ុន សែន ដែលបានទៅដល់ទីតាំងប្រារព្ធពិធីនោះតាំងពីម៉ោង៧ព្រឹក។ ក្រោយបញ្ចប់សន្ទរកថា លោក ហ៊ុន សែន ក៏បានធ្វើដំណើរដោយថ្មើរជើងចុះជួបអ្នកគាំទ្ររបស់ខ្លួនដែលឈរហែហមសងខាងផ្លូវ ខណៈអ្នកគាំទ្រគណបក្សប្រជាជនកម្ពុជាមួយចំនួនធំ បានរាំលេងជាក្រុមៗ នៅត្រង់បរិវេណរថយន្តប្រគុំតន្ដ្រី ដែលដាក់បណ្ដាក់គ្នាជាច្រើនកន្លែង។
សូមបញ្ជាក់ថា នៅក្នុងពិធីបិទយុទ្ធនាការឃោសនាបោះឆ្នោតនេះ មានមនុស្សជាង១៥ម៉ឺននាក់មកពីខណ្ឌទាំង១២ បានចូលរួមឃោសនាជាមួយគណបក្សប្រជាជនកម្ពុជា។ អ្នកគាំទ្រគណបក្សប្រជាជនកម្ពុជា បានបង្ហាញពីចំណាប់អារម្មណ៍ប្រហាក់ប្រហែលគ្នានាឱកាសបិទយុទ្ធនាការឃោសនាបោះឆ្នោតនេះ៖
ងាកមកមើលក្បួនឃោសនា របស់គណបក្សសម្ព័ន្ធដើម្បីប្រជាធិបតេយ្យវិញ! ដឹកនាំដោយ លោក ខឹម វាសនា ប្រមុខបក្សនេះ បានជ្រើសយកតំបន់ជាយរាជធានីភ្នំពេញ គឺនៅបណ្ដោយ៦០ម៉ែត្រ ដើម្បីធ្វើការជួបជុំ មុនចេញដំណើរឃោសនា។ ក្បូនឃោសនារបស់គណបក្សសម្ព័ន្ធដើម្បីប្រជាធិបតេយ្យ មានអ្នកចូលរួមចន្លោះពី៦ទៅ៧ម៉ឺននាក់។ ហើយក្នុងនោះ មធ្យោបាយធ្វើដំណើររបស់គេមានលាយឡំចម្រុះ ពោលគឺមានតាំងពីម៉ូតូ រថយន្ត និងរ៊ឺម៉ក់កង់បីជាដើម។ ក្បួនឃោសនានៃគណបក្សនេះ មានចម្ងាយឆ្ងាយ មើលសឹងដាច់កន្ទុយភ្នែក។
ជួបជាមួយអ្នកគាំទ្រគណបក្សសម្ព័ន្ធដើម្បីប្រជាធិបតេយ្យដែលភាគច្រើនជាយុវជន ពួកគេមានមោទនភាពនឹងកំណើននៃអ្នកគាំទ្របក្សរបស់ខ្លួនក្នុងអាណត្តិនេះ៖
ក្រៅពីគណបក្សប្រជាជនកម្ពុជានិងគណបក្សសម្ព័ន្ធដើម្បីប្រជាធិបតេយ្យ គណបក្សនយោបាយ៥ផ្សេងទៀតបានធ្វើការឃោសនាបោះឆ្នោតនាថ្ងៃចុងក្រោយនេះ យ៉ាងសាមញ្ញទៅតាមសន្ទុះនៃអ្នកគាំទ្ររបស់គណបក្សនីមួយៗ។ ជាក់ស្ដែងគណបក្សហ្វ៊ុនស៊ិនប៉ិច ក្បួនឃោសនារបស់បក្សចាប់ចេញដំណើរពីម្ដុំស្ពានជ្រោយចង្វារ ដោយមានអ្នកចូលរួមប្រមាណជា១៥០០នាក់។ ជាសរុប គណបក្សទាំង៧ដែលឃោសនាបោះឆ្នោតនាថ្ងៃបញ្ចប់នេះ មានមនុស្សចូលរួមជាង៣២ម៉ឺននាក់។
ដោយឡែក សម្រាប់បណ្ដាគណបក្សនយោបាយ១៣ផ្សេងទៀតដែលមិនមានសកម្មភាពនៅភ្នំពេញ ក៏ដោយសារពួកគេចុះឃោសនានៅតាមបណ្ដាខេត្ត។ ជាក់ស្ដែង គណបក្សសម្បុកឃ្មុំសង្គមប្រជាធិបតេយ្យ បានចុះទៅឃោសនានៅតាមឃុំ ជាលក្ខណៈទ្រង់ទ្រាយតូច ដើម្បីប្រាប់ពលរដ្ឋអំពីលេខរៀងគណបក្ស។ បើតាមគណបក្សសម្បុកឃ្មុំមិនមានធនធានសម្បូរបែបនៅក្នុងការឃោសនាជាទ្រង់ទ្រាយធំទេ។ ចំណែកគណបក្សយុវជនកម្ពុជា បានធ្វើយុទ្ធនាការឃោសនាបោះឆ្នោតនៅថ្ងៃចុងក្រោយនេះដែរ នៅឯខេត្តត្បូងឃ្មុំ ដែលជាមូលដ្ឋានរឹងមាំបំផុតរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ