ស្លាប់៣០នាក់ដោយសារបាតុភូតរន្ទះបាញ់ក្នុងរយៈពេល៥ខែដើមឆ្នាំ២០១៥
ស្លាប់៣០នាក់ដោយសារបាតុភូតរន្ទះបាញ់ក្នុងរយៈពេល៥ខែដើមឆ្នាំ២០១៥។ ប៉ុន្តែចំនួននេះ បានថយចុះ បើប្រៀបធៀបនឹងរយៈពេលដូចគ្នានៃឆ្នាំ២០១៤កន្លងទៅ។ ផ្ទុយពីនេះ ចំនួនអ្នករងគ្រោះដោយសារបាតុភូតធម្មជាតិ ដូចជា ខ្យល់ព្យុះ រឺ ខ្យល់កន្រ្តាក់វិញ បានកើនឡើងដល់ទៅ៥០ភាគរយបើប្រៀបធៀបនឹងរយៈពេលដូចគ្នា។
ចុះផ្សាយនៅថ្ងៃ៖
ស្តាប់ - ០២:១៨
ដោយគិតមកដល់ដំណាច់ខែឧសភាដើមឆ្នាំ២០១៥នេះ ចំនួនអ្នកស្លាប់ដោយសាររន្ទះបាញ់មានចំនួន៣០នាក់ហើយ ហើយក្នុងនោះរន្ទះបាញ់ក៏បានបណ្តាលឱ្យពលរដ្ឋខ្មែររងរបួសចំនួន២១នាក់ ងាប់គោក្របីចំនួន២៨ក្បាលនិងខូចខាតផ្ទះចំនួន៥ខ្នង។ នេះបើតាមរបាយការណ៍របស់គណកម្មាធិការជាតិគ្រប់គ្រងគ្រោះមហន្តរាយ ក្នុងរយៈពេល៥ខែដើមឆ្នាំ២០១៥នេះ។ ក៏ប៉ុន្តែចំនួននេះ បានថយចុះបើប្រៀបធៀបនឹងរយៈពេលដូចគ្នាកាលពីឆ្នាំ២០១៤កន្លងទៅ ដែលអ្នកស្លាប់មានចំនួនដល់ទៅ៤៤នាក់និងរបួស២៧នាក់។ នេះបើតាមការបញ្ជាក់បន្ថែមពីលោក កែវ វី នាយកខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយ។
បើតាមលោក កែវ វី ដដែល បើទោះជាចំនួនអ្នករងគ្រោះដោយរន្ទះបាញ់បានថយចុះក្តី ក៏ប៉ុន្តែចំនួនអ្នករងគ្រោះដោយសារតែបាតុភូតធម្មជាតិដូចជាខ្យល់ខ្យុះ រឺខ្យល់កន្ត្រាក់វិញ បានកើនឡើងដល់ទៅ៥០% បើធៀបនឹងរយៈពេលដូចគ្នាកាលពីឆ្នាំទៅ។
លោក កែវ វី នាយកខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយបានបញ្ជាក់ថា គ្រាន់តែនៅដើមរដូវវស្សា ចាប់ពីខែមេសាដល់ដំណាច់ខែឧសភានេះ ខ្យល់កន្រ្តាក់បានកើតឡើងចំនួន១០៨លើក នៅទូទាំង២៤រាជធានីខេត្ត ដែលបានធ្វើឱ្យរលំផ្ទះខូចខាតទាំងស្រុងចំនួន១២១៩ខ្នង ខូចខាតមធ្យមចំនួន៤១៣៩ខ្នង របើកដំបូលអាគារសាលារៀនចំនួន២៧ខ្នង និងរលំបាក់ផ្សារនិងដំបូលផ្សារជាដើម។ ខ្យល់កន្រ្តាក់ក៏បានបណ្តាលឱ្យពលរដ្ឋខ្មែរចំនួន៧នាក់បានស្លាប់បាត់បង់ជីវិត និង៨៧នាក់បានរងរបួស។
បើទោះបីជាថយចុះ រឺក៏កើនឡើងក្តី ក៏ប៉ុន្តែគ្រោះមហន្តរាយធម្មជាតិកំពុងក្លាយជាក្តីព្រួយបារម្ភយ៉ាងខ្លាំងរបស់មន្រ្តីជំនាញនៃគណៈកម្មាធិការជាតិគ្រប់គ្រងគ្រោះមហន្តរាយ និងជាក្តីព្រួយបារម្ភជាទូទៅរបស់ប្រជាពលរដ្ឋខ្មែរ ពិសេសអ្នកស្រុកស្រែចំការ ដែលងាយនឹងរងគ្រោះជាងគេ នៅក្នុងបរិបទនៃគ្រោះមហន្តរាយធម្មជាតិដែលបានកើនឡើងទាំងនៅក្នុងតំបន់ និងពិភពលោក។
គ្រោះរន្ទះបាញ់ចុងក្រោយ បានកើតឡើងទៅលើគ្រួសារប្តីប្រពន្ធពីរនាក់រស់នៅខេត្តកំពង់ឆ្នាំង ខណៈដែលពួកគេបានទៅរាវខ្យងក្នុងបឹងទួលអំពិល ដែលបានបណ្តាលឱ្យប្តីស្លាប់ ហើយប្រពន្ធរងរបួសធ្ងន់ កាលពីល្ងាចថ្ងៃទី២៩ ឧសភាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ