តំណាងរាស្រ្តគណបក្សប្រឆាំងអះអាងថា រកឃើញផែនទីបោន២៦ផ្ទាំងនៅសហរដ្ឋអាមេរិកតែគ្មានត្រាវៀតណាម
លោក អ៊ុំ សំអាន តំណាងរាស្រ្តគណបក្សសង្រ្គោះជាតិបានប្រកាសពីសហរដ្ឋអាមេរិកមកថាលោកបានរកឃើញផែនទីចំនួន២៦ផ្ទាំងដែលលោកអះអាងថាជា ផែនទីបោន ដែលមិនមានត្រាប្រទេសវៀតណាមនោះទេ។ លោក អ៊ុំ សំអាន បានបញ្ជាក់ថា ផែនទីនេះ ជាផែនទីបោន ដែលព្រះបរមរតនកោដ្ឋបានយកទៅតម្កល់ទុកនៅសហរដ្ឋ អាមេរិកតាំងពីឆ្នាំ១៩៦៤។ ប៉ុន្តែមន្រ្តីទទួលបន្ទុកកិច្ចការព្រំដែនកម្ពុជា អះអាងថា ផែនទីនេះ មិនមានអ្វីខុសប្លែកពីផែនទីរបស់រដ្ឋាភិបាលនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ផែនទីទាំង២៦ផ្ទាំង ដែលលោក អ៊ុំ សំអាន តំណាងរាស្រ្តគណបក្សប្រឆាំងអះអាងថា ទើបនឹងរកឃើញនេះ ជាផែនទីបោនដែលអតីតព្រះមហាក្សត្រព្រះបរមរតនកោដ្ឋ យកទៅតម្កល់ទុកនៅសហរដ្ឋអាមេរិក និងបានស្នើសុំឲ្យប្រទេសមហាអំណាចមួយនេះ ទទួលស្គាល់ខ្សែបន្ទាត់ព្រំដែនម្ពុជានៅថ្ងៃទី២ខែមេសាឆ្នាំ១៩៦៤។
លោក អ៊ុំ សំអាន ដែលកំពុងស្នាក់នៅសហរដ្ឋអាមេរិក បានអះអាងនៅលើទំព័រ Facebook របស់លោកថា លោកបានទៅរកឃើញផែនទីនេះនៅបណ្ណាល័យសភា (Library of Congress) សហរដ្ឋអាមេរិកនៅ Washington DC ដែលមានទាំងផែនទីជា Digital និងផែនទីជាក្រដាស។ ហើយថា ផែនទីទាំងនេះ គ្មានឡើយត្រារបស់ប្រទេសវៀតណាម (យួន) និងហត្ថលេខារបស់លោក ឌិត មុន្ទី និងលោក លីវ វាន់ឡឺយ ដែលតំណាងឲ្យគូរភាគីរដ្ឋាភិបាលកម្ពុជា-វៀតណាម ចុះហត្ថលេខានៅឆ្នាំ១៩៨៥ ដូចផែនទីរបស់រដ្ឋាភិបាលសព្វថ្ងៃ។
ប៉ុន្តែយ៉ាងណាក៏ដោយ លោកស្រី កុយ ពិសី អនុប្រធានគណៈកម្មាធិការទទួលបន្ទុកកិច្ចកា0រព្រំដែនកម្ពុជាអះអាងថា ផែនទីទាំងនេះ មិនមានអ្វីប្លែកពីផែនទីរបស់រដ្ឋាភិបាលកំពុងប្រើប្រាស់សព្វថ្ងៃនេះទេ ព្រោះថា រដ្ឋាភិបាលបានទៅយកផែនទីនេះតាំងពីឆ្នាំ២០០៣មកម្លេះ។
គួរជំរាបជូនថា កាលពីពេលថ្មីៗនេះ ប្រមុខរដ្ឋាភិបាលកម្ពុជាលោក ហ៊ុន សែន បានព្រមាន
ចាត់វិធានការផ្លូវច្បាប់ ប្រឆាំងនឹងបុគ្គលឬក្រុមណា ដែលនិយាយថា រដ្ឋាភិបាលប្រើប្រាស់ផែនទីក្លែងក្លាយ។ ការព្រមាននេះ បានធ្វើឡើង ក្រោយពីបញ្ចប់ការផ្ទៀងផ្ទាត់ផែនទីចំនួន១៨ផ្ទាំងមកពីអង្គការសហប្រជាជាតិ និងផែនទីរបស់រដ្ឋាភិបាលបង្ហាញថា មានលក្ខណៈដូចគ្នា។ ក្រៅពីការផ្ទៀងផ្ទាត់ផែនទីមកពីអង្គការសហប្រជាជាតិ កម្ពុជាកំពុងទន្ទឹងរងចាំផ្ទៀងផ្ទាត់ផែនទីមកពីប្រទេសបារាំងថែមទៀត ដែលនឹងធ្វើនៅដើមសប្តាហ៍ក្រោយនេះ។ កាលពីថ្ងៃទី២៦សីហា លោកឧបនាយករដ្ឋមន្រ្តី ហោ ណាំហុង រដ្ឋមន្រ្តីការបរទេសកម្ពុជាបញ្ជាក់ថា គណបក្សប្រឆាំងនឹងភ្លឺភ្នែក នៅពេលផែនទីមកពីប្រទេសបារាំងមកដល់។
លោក អ៊ុំ សំអាន ដែលកំពុងស្ថិតនៅសហរដ្ឋអាមេរិក មានគម្រោងវិលមកកាន់ប្រទេសវិញនៅខែកញ្ញាខាងមុខនេះ បន្ទាប់ពីលោកបញ្ចប់ដំណើរទៅកាន់ទីស្នាក់ការអង្គការសហប្រជាជាតិ ដើម្បីស្វែងរកមូលហេតុថា តើហេតុអ្វីបានជាអង្គការសហប្រជាជាតិរកផែនទីខ្មែរមិនឃើញ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ