ពលរដ្ឋខ្មែរចំណាកស្រុកនៅតែប្រថុយគ្រោះថ្នាក់ជាថ្នូរនឹងបានការងារធ្វើនៅក្រៅប្រទេស
ចុះផ្សាយនៅថ្ងៃ៖
ស្តាប់ - ០៤:៤៦
ពលរដ្ឋខ្មែរដែលចំណាកស្រុកនៅប្រទេសថៃ និងប្រទេសដែលសំបូរការងារមួយចំនួនទៀត នៅតែបន្តរងគ្រោះ នៅពេលដែលពួកគេ ចេញទៅធ្វើការដោយប្រថុយប្រថាន។ ភាពក្រីក្រ និងកង្វះខាតការងារក្នុងស្រុក រួមទាំងប្រាក់ឈ្នួលតិចតួច ហើយបរិយាកាសការងារ មិនអំណោយផល ជាមូលហេតុ រុញច្រានពលរដ្ឋក្រីក្រមួយចំនួន ដែលមិនសូវមានចំណេះ និងជំនាញ ចាំបាច់ត្រូវតែធ្វើការចំណាកស្រុក ទៅធ្វើការខាងក្រៅ បើទោះណាជាត្រូវប្រឈមនឹងឧបសគ្គច្រើនក៏ដោយ។
ស្ថានអគ្គកុងស៊ុលខ្មែរប្រចាំខេត្តសាកែវ ប្រទេសថៃ កាលពីថ្ងៃ ១៩វិច្ឆិកា កន្លងទៅនេះបានជូនដំណឹងមកសមត្ថកិច្ចច្រកទ្វារ អន្តរជាតិប៉ោយប៉ែត ស្នើឲ្យជួយសម្រួលសពពលរដ្ឋខ្មែរមួយរូប ត្រឡប់ទៅកាន់ប្រទេសកម្ពុជាវិញ។ ស្ថានអគ្គកុងស៊ុលកម្ពុជាបញ្ជាក់ថា បុរសពលរដ្ឋខ្មែរ ដែលមានអាយុ ៣១ឆ្នាំ ជាកម្មករដកដំឡូង នៅខេត្តសាកែវប្រទេសថៃ បានស្លាប់ដោយសារថៅកែបាញ់សម្លាប់ កាលពីថ្ងៃទី ១៨ វិច្ឆិកា ឆ្នាំ២០១៦។
តាមរយៈការជូនដំណឹងដូច្នេះ នេះមិនមែនជាលើកទី១ទេ ដែលកម្មករខ្មែរចំណាកស្រុកទៅធ្វើការនៅប្រទេសថៃជួបប្រទះ។ កន្លងមកមានរឿងជាច្រើន ដែលពលករខ្មែរទទួលរងគ្រោះ រហូតដល់ស្លាប់ និងរបួសធ្ងន់ធ្ងរនៅលើទឹកដីប្រទេសជិតខាងខ្មែរមួយនេះ។ នោះគឺជាភាពញឹកញាប់ដែលគេឃើញរថយន្តថៃ ដឹកសពពលរដ្ឋខ្មែរ មានច្រើនមានតិច ទៅតាមទំហំនៃហេតុការណ៍ ឬឧប្បត្តិវហេតុ នៅលើទឹកដីរបស់គេមកកម្ពុជា។
គ្រោះថ្នាក់ដែលពលករខ្មែរ តែងជួបប្រទះ គឺបញ្ហាគ្រោះថ្នាក់ចរាចរណ៍ ជម្លោះទាស់ទែងគ្នាជាមួយជនជាតិថៃ ដែលជាម្ចាស់ស្រុក ការលួចចូលទៅកាប់ឈើក្រញ៉ូងនៅក្នុងទឹកដីថៃ ហើយត្រូវទាហ៊ានថៃបាញ់សម្លាប់ដូចសត្វធាតុ ស្លាប់ដោយស្ថានភាពការងារយ៉ាប់យ៉ឺន នៅពេលធ្វើជាកម្មករទូកនេសាទ និងដោយសារជំងឺផ្សេងៗជាដើម។
ទាំងអស់នេះ គឺជាសោកនាដកម្ម ដែលផ្ទុយស្រឡះពីការផ្តែផ្តាំពីបុព្វបុរសខ្មែរ ដែលថា «ជួញជិត ស្រួលចិត្តជាងជួញឆ្ងាយ»។ តើមូលហេតុអ្វីធ្វើឲ្យពលរដ្ឋខ្មែរមួយចំនួនមានៈ នឹងទ្រឹស្តីនេះ? ប្រាកដណាស់គ្មានអ្នកណាចង់ចាកចេញពីស្រុកកំណើត ឃ្លាតឆ្ងាយពីឪពុកម្តាយ បងប្អូន ទៅផ្សងព្រេងនៅស្រុកគេនោះទេ។
មានហេតុផលមួយចំនួន ដែលជម្រុញឲ្យពលរដ្ឋខ្មែរចាកចេញពីមាតុភូមិ ឥតស្តាយស្រណោះនិងមិនខ្វល់ពីគ្រោះថ្នាក់ដល់ខ្លួននោះគឺទី១. កត្តាស្ថានភាពការងារ។ បើទោះណាជារដ្ឋាភិបាលបានបញ្ជាក់ពីអត្រាអត់កាងារធ្វើរបស់ពលរដ្ឋខ្មែរប្រមាណតែ ២ភាគរយប៉ុណ្ណោះ ក៏ប៉ុន្តែភាពក្រីក្រ និងអត់ការងារធ្វើជាក់ស្តែងក្នុងចំណោមពលរដ្ឋខ្មែរពេញវ័យនៅមានច្រើនដដែល។
ទី២. ការងារក្នុងស្រុកគ្រប់ប្រភេទ ជាទូទៅមិនបានរៀបចំប្រព័ន្ធផ្តល់ប្រាក់ឈ្នួលឲ្យបានត្រឹមត្រូវ និងលក្ខខ័ណ្ឌការងារមិនសូវល្អ ដែលអាចធានាថាមានសុខដុមនីយកម្មវិជ្ជាជីវៈនឹងគ្នាបានរវាងនិយោជកនិងកម្មករនិយោជិក។
ទី៣. ការមើលឃើញចំណុចវិជ្ជមានតៗគ្នា ដែលថាអ្នកដែលបានធ្វើចំណាកស្រុកមួយចំនួនអាចរកប្រាក់ ដើម្បីដោះស្រាយបញ្ហាគ្រួសារ ដូចជាជួយដោះបំណុលមីក្រូហិរញ្ញវត្ថុគ្រួសារ និងអាចធ្វើផ្ទះសម្បែង ឲ្យបានល្អជាងមុន។ នេះជាកត្តាទាក់ទាញបំផុត ដែលគេអាចធ្វើឡើងតាម រយៈមិត្តភក្តិ និងក្រុមគ្រួសារ រហូតដល់ចេញទៅស្ងាត់ភូមិក៏មាន ចំពោះមនុស្សពេញកំលាំង។
ចំណុចទី៤. គេអាចនិយាយបានថា ពលរដ្ឋខ្មែរដែលពេញវ័យធ្វើការងារ តែគ្មានការងារធ្វើគ្រប់គ្រាន់ ដែលផ្តល់កម្រៃគួរសម ពិតជាត្រូវការការងារមួយចាំបាច់ ដើម្បីបម្រើដល់ការរស់នៅ ដែលពោរពេញទៅដោយភាពហ៊ឺហារ យ៉ាងហោចណាស់ក៏មានទូរស័ព្ទស្មាតហ្វូន ១គ្រឿងដែរ ដើម្បីទាន់សម័យនឹងគេ។ ដូច្នេះ តម្រូវការការងារវាជាការចាំបាច់ ទោះចំណាកស្រុកជិតក្តី ក្រៅស្រុកក្តី និងប្រឈមនឹងគ្រោះថ្នាក់ក្តី ឬអាចហៅម្យ៉ាងទៀតថា អត់ជម្រើស។
ជាដំណោះស្រាយ ការនិយាយអាចចាត់ទុកថាជាការងាយក៏ថាបាន តែការអនុវត្តជាក់ស្តែង ហាក់ដូចជាលំបាក។ ប្រជាពលរដ្ឋខ្មែរពេញកម្លាំង ត្រូវគេគិតថាមានប្រមាណជា ៨លាននាក់ ក្នុងចំណោមពលរដ្ឋជិត ១៥លាននាក់។ ក្នុងនោះរដ្ឋាភិបាលអាចនឹងបង្កើតការងារជាក់ស្តែងឲ្យបានច្រើន ជាពិសេសការងារកសិកម្ម ដោយសារតែកម្ពុជាជាប្រទេសមានសក្តានុពលកសិកម្ម ព្រមទាំងបង្កបរិយាកាសការងារល្អ និងប្រាក់ឈ្នួលសមរម្យ។
ការបណ្តុះបណ្តាលជំនាញបន្ថែម និងឲ្យបានគ្រប់គ្រាន់ ជាជាងបណ្តោយឲ្យពលរដ្ឋខ្មែរទៅធ្វើការដោយចំណាកស្រុកនៅប្រទេសគេទាំងប្រថុយប្រថាន។ បង្កើនឧស្សាហកម្មកែច្នៃ ក្នុងស្រុកឲ្យបានច្រើនដូចជាវិស័យរ៉ែជាដើម ដើម្បីបង្កើតការងារនៅក្នុងស្រុក ចៀសវាងនាំចេញដោយមិនមានការកែច្នៃ ដែលធ្វើឲ្យបាត់បង់កម្លាំងពលកម្ម និងបាត់បង់ចំណូលក្នុងស្រុក។ លើសពីនេះ វិស័យសក្តានុពលផ្សេងទៀតដូចជាទេសចរណ៍ជាដើម គឺអាចបង្កើនសេវាកម្មទេសចរណ៍ធម្មជាតិ និងធ្វើឲ្យកម្លាំងពលកម្មសហគមន៍ដើរ។ល។និង។ល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ