ក្រសួងសុខាភិបាលគ្រោងប្រើយុទ្ធវិធីក្នុងការធ្វើតេស្តរកមេរោគអេដស៍ដោយខ្លួនឯងក្នុងពេលឆាប់ៗខាងមុខ
ក្រសួងសុខាភិបាលគ្រោងនឹងធ្វើយុទ្ធនាការក្នុងការធ្វើតេស្តឈាមរកមេរោគអេសដ៍ដោយខ្លួនឯង ដើម្បីបង្កើនការរុករកអ្នកផ្ទុកមេរោគអេសដ៍ឲ្យបានកាន់តែច្រើនថែមទៀត ពិសេសអ្នកដែលផ្ទុកមេរោគអេសដ៍ប្រមាណជាង១ម៉ឺននាក់ដែលមិនទាន់ដឹងពីស្ថានភាពនៅឡើយ។យុទ្ធវិធីនេះកំពុងរៀបចំពិភាក្សាជាមួយដៃគូជំនាញផ្សេងៗដែលប្រតិបត្តិ ការងារលើផ្នែកជំងឺអេសដ៍។
ចុះផ្សាយនៅថ្ងៃ៖
ស្តាប់ - ០១:៥២
អត្ថបទដោយ៖ ជក់ សុភា
លោក មាន ឈីវុន ទីប្រឹក្សាអមក្រសួងសុខាភិបាល បានឱ្យដឹងនៅថ្ងៃទី១៤ ខែសីហា នេះថា ការធ្វើតេស្តឈាមរកមេរោគអេសដ៍ដោយខ្លួនឯងនេះ បានផ្តល់ភាពងាយស្រួយដល់ប្រជាពលរដ្ឋ មានភាពលឿន រហ័ស ចំណេញទាំងថវិកានិងពេលវេលា រូមទាំងទទួលបានការព្យាបាលភ្លាមៗ។ លោកបន្តថា ការដាក់ចេញនូវយុទ្ធវិធីនេះ ក្នុងគោលបំណង ដើម្បីបង្កើនការស្វែងរក អ្នកផ្ទុកមេរោគអេដស៍ជាង១ម៉ឺននាក់ទៀត ដែលបច្ចុប្បន្ននេះ នៅមិនទាន់បានដឹងពីស្ថានភាពឆ្លងជំងឺនេះ នៅឡើយ។ តាមរយៈយុទ្ធវិធីនេះ នឹងអាចរកឃើញបានច្រើនពោលគឺរក ឱ្យបាន៩០០០នាក់ នៅក្នុងឆ្នាំ២០២៥ខាងមុខនេះ។
គួររឭកថា មេរោគអេដស៍បានផ្ទុះរីករាលដាលនៅកម្ពុជាខ្លាំង នៅឆ្នាំ១៩៩៨ ដែលមានអត្រាឆ្លង១០០នាក់ក្នុងមួយថ្ងៃ ហើយនៅពេលនោះ គឺមានអ្នកផ្ទុកមេរោគអេដស៍រហូតដល់ ១៦៩ ០០០ នាក់។ ផ្ទុយទៅវិញ ក្នុងរយៈពេលជិត២០ឆ្នាំមកនេះ ចំនួនអ្នកផ្ទុកមេរោគបានថយចុះមកនៅត្រឹម ៥៧ ០០០នាក់ ដែលអត្រាអ្នកឆ្លងមេរោគនេះ មានត្រឹម២នាក់ ក្នុងមួយឆ្នាំ។
យ៉ាងណាមិញ លោក មាន ឈីវុន លើកឡើងថា យុទ្ធវិធីនៃការធ្វើតេស្តឈាមដោយខ្លួនឯងនេះ នៅមិនទាន់ ដឹងថា ត្រូវអនុវត្តន៍តាម របៀបណានោះទេ ដោយរង់ចាំពិភាក្សាឱ្យបាន ល្អិតល្អន់រវាងមជ្ឈមណ្ឌលជាតិប្រយុទ្ធនឹងជំងឺអេដស៍ សើរស្បែក និងកាមរោគ ជាមួយអង្គការដៃគូនានា ដែលធ្វើការងារផ្នែកជំងឺអេដស៍ ជាមុនសិនទើបអាចអនុវត្តន៍បាន។
សូមបញ្ជាក់ថា តាមរយៈទិសដៅ ៩០-៩០-៩០ ដែលដាក់ចេញដោយអង្គការសហប្រជាជាតិប្រយុទ្ធនឹងជំងឺអេដស៍នេះ មានន័យថា ទី១) ត្រូវធានាថា ៩០% នៃអ្នករស់នៅជាមួយមេរោគអេដស៍ត្រូវដឹងពីស្ថានភាពនៃការឆ្លងមេរោគនេះ។ ទី២) ៩០% នៃអ្នកដែលរកឃើញមានឆ្លងមេរោគអេដស៍ ត្រូវតែទទួលបានការព្យាបាលដោយឱសថប្រឆាំងនឹងមេរោគអេដស៍។ និងទី៣ ៩០% នៃអ្នកដែលកំពុងទទួលបានការព្យាបាលដោយឱសថប្រឆាំងនឹងមេរោគអេដស៍ ត្រូវមានបន្ទុកមេរោគអេដស៍ក្នុងឈាមកម្រិតទាបបំផុត ឬ ស្ទើរមិនអាចរកឃើញ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ