ក្រសួងសុខាភិបាលបារម្ភពីជំងឺផ្ដាសាយប្រភេទថ្មីដែលកំពុងរីករាលដាលនៅចិន
ក្រសួងសុខាភិបាលនៅថ្ងៃនេះបានធ្វើសន្និសីទកាសែត បង្ហាញក្ដីព្រួយបារម្ភជុំវិញជំងឺផ្ដាសាយប្រភេទថ្មីH7N9 ដែលកំពុងតែរីករាលដាលនៅប្រទេសចិន។ ជំងឺនេះក៏បានធ្វើដំណើរមកដល់ប្រទេសឡាវ និងវៀតណាមហើយដែរ។ នៅឡើយ កម្ពុជា និងថៃជំងឺនេះមិនទាន់ផ្ទុះឡើង។
ចុះផ្សាយនៅថ្ងៃ៖
ក្ដីព្រួយបារម្ភរបស់ក្រសួងសុខាភិបាលចំពោះប្រភេទជំងឺផ្ដាសាយប្រភេទថ្មី H7N9នេះក៏ព្រោះតែវាជាប្រភេទជំងឺមួយដែលឆ្លងមកសត្វមាន់ ឬបក្សីផ្សេងទៀតមានលក្ខណៈសម្ងាត់ គឺពិបាកព្យាបាល។ មិនដូចប្រភេទជំងឺផ្ដាសាយបក្សី H5N1ឆ្លងទៅមាន់ស្ដែងឲ្យឃើញនៅនឹងកន្លែងតាមរយៈការប្រកាច់ងាប់ភ្លាមៗ។ H7N9នេះបើឆ្លងទៅមនុស្សនឹងកើតមានរោគសញ្ញា គ្រុន ក្ដៅ ពិបាក ដកដង្ហើប ជាដើម។
លោកវេជ្ជបណ្ឌិត លី សុវណ្ណ អ្នកនាំពាក្យក្រសួងសុខាភិបាលគូសបញ្ជាក់ថា កន្លងមកH7N9នេះបានឆ្លងទៅបុរសជនជាតិចិនម្នាក់នៅពេលគាត់ធ្វើដំណើរទៅដល់ប្រទេសម៉ាឡេស៊ី ប៉ុន្តែគាត់បានជាទៅវិញក្រោយព្យាបាលនៅម៉ាឡេស៊ី។ ចំពោះវិធានការទប់ស្កាត់ទៅលើH7N9នេះគឺក្រសួងបានប្រើប្រាស់វិធានការចាស់ដដែលគឺឲ្យពលរដ្ឋរាយការណ៍មកកាន់លេខទូរសព្ទ១១៥ប្រសិនបើសង្ស័យថា កើតមានជំងឺផ្ដាសាយបក្សីដែលកើតឡើងចំពោះមនុស្ស ឬសត្វ។
លោក លី សុវណ្ណ បន្តថា H7N9 កើតមានតែនៅចិនមួយប៉ុណ្ណោះដែលជំងឺនេះបានកើតឡើងតាំងពីឆ្នាំ២០១៣មកម្លេះ។ តាំងពីឆ្នាំ២០១៣ដល់២០១៧ H7N9បានកើតឡើង១៥៣៣ករណី និងបានសម្លាប់មនុស្ស៥៩២នាក់នៅក្នុងប្រទេសចិន។ ក្រសួងសុខាភិបាលកម្ពុជាក៏បានអំពាវនាវឲ្យពលរដ្ឋប្រុងប្រយ័ត្ននៅក្នុងការចំអិនសាច់ ព្រោះខ្លាចកើតមានជំងឺផ្ដាសាយបក្សី ដោយសារតែភាគច្រើនសាច់នាំចូលពីក្រៅមានចំនួនច្រើន។
ដោយឡែកនៅក្នុងសន្និសីទកាសែតក្នុងពេលតែមួយនេះដែរ ក្រសួងសុខាភិបាលក៏បានអំពាវនាវឲ្យពលរដ្ឋប្រុងប្រយ័ត្នចំពោះប្រភេទជំងឺផ្លូវដង្ហើមមជ្ឈឹមបូព៌ាហៅកាត់MERS។ ដូចគ្នានេះMERSមិនទាន់មកដល់កម្ពុជាទេ ប៉ុន្តែបច្ចុប្បន្នជំងឺនេះកំពុងរាលដាលខ្លាំងនៅក្នុងប្រទេសកូរ៉េ។ វាឆ្លងតាមរយៈការប៉ះពាល់ជិតស្និទ្ធ។ គិតចាប់តាំងពីឆ្នាំ២០១២មកដល់ឥលូវMERSបានសម្លាប់មនុស្ស៧១២នាក់នៅក្នុងប្រទេសចំនួន២៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ